ന്യൂഡൽഹി: കേന്ദ്രത്തിൽ നരേന്ദ്ര മോദി സർക്കാർ ഭരണത്തിൽ 12 വർഷം പൂർത്തിയാക്കുന്ന വേളയിൽ, സർക്കാരിന്റെ ഭരണനേട്ടങ്ങൾ ജനങ്ങളിലേക്ക് നേരിട്ടെത്തിക്കാൻ ഒരു മാസം നീണ്ടുനിൽക്കുന്ന രാജ്യവ്യാപക പ്രചാരണ പരിപാടിക്ക് ബിജെപി തുടക്കം കുറിക്കുന്നു (Modi Government 12 Years Achievements Campaign). ’12 വർഷങ്ങൾ, 12 വലിയ നേട്ടങ്ങൾ’ എന്ന പ്രമേയത്തിലൂന്നി ജൂൺ 9 മുതൽ ജൂലൈ 9 വരെയാണ് ഈ ജനസമ്പർക്ക പരിപാടി സംഘടിപ്പിച്ചിരിക്കുന്നത്. ഇതിന്റെ ഭാഗമായി കേന്ദ്രമന്ത്രിമാർ, മുഖ്യമന്ത്രിമാർ, എംപിമാർ, എംഎൽഎമാർ എന്നിവരടങ്ങുന്ന ജനപ്രതിനിധികളും ലക്ഷക്കണക്കിന് പാർട്ടി പ്രവർത്തകരും രാജ്യത്തുടനീളം പൊതുയോഗങ്ങൾ, വാർത്താ സമ്മേളനങ്ങൾ, ഭവന സന്ദർശനങ്ങൾ എന്നിവ നടത്തും. വരാനിരിക്കുന്ന നിയമസഭാ തെരഞ്ഞെടുപ്പുകൾക്കും 2027-ലെ രാഷ്ട്രീയ പോരാട്ടങ്ങൾക്കും മുന്നോടിയായി ഭരണനേട്ടങ്ങൾ ജനങ്ങളിലെത്തിച്ച് പാർട്ടിയുടെ അടിത്തറ ശക്തമാക്കുകയാണ് ബിജെപി ഇതിലൂടെ ലക്ഷ്യമിടുന്നത്. ഇതിന്റെ മുന്നോടിയായി മെയ് 21-ന് പ്രധാനമന്ത്രി നരേന്ദ്ര മോദി കേന്ദ്ര മന്ത്രിസഭാ യോഗം വിളിച്ചിട്ടുണ്ട്.
ഡിജിറ്റൽ ഇന്ത്യ, ജിഎസ്ടി പരിഷ്കാരങ്ങൾ, സാമ്പത്തിക വളർച്ച, അടിസ്ഥാന സൗകര്യ വികസനം, ക്ഷേമപദ്ധതികൾ, പ്രതിരോധ രംഗത്തെ തദ്ദേശീയവൽക്കരണം, ആർട്ടിക്കിൾ 370 റദ്ദാക്കൽ എന്നിവയ്ക്കൊപ്പം അതിർത്തി കടന്നുള്ള ഭീകരവാദത്തിനെതിരെയുള്ള ശക്തമായ നടപടികളും പ്രചാരണത്തിൽ പ്രധാന വിഷയങ്ങളാകും. സർക്കാരിന്റെ ശക്തമായ സൈനിക നയങ്ങളുടെ ഭാഗമായി അടുത്തിടെ നടന്ന ‘ഓപ്പറേഷൻ സിന്ദൂർ’, ബാലാകോട്ട് വ്യോമാക്രമണം, സർജിക്കൽ സ്ട്രൈക്കുകൾ എന്നിവയും നക്സൽ വിരുദ്ധ പ്രവർത്തനങ്ങളും ഇതിൽ എടുത്തുയർത്തും. കൂടാതെ അയോധ്യയിലെ രാമക്ഷേത്ര നിർമ്മാണം, കോവിഡ് പ്രതിരോധ പ്രവർത്തനങ്ങൾ എന്നിവയും പ്രചാരണ വിഷയങ്ങളാകും. ‘വികസിത് ഭാരത് സങ്കൽപ് സഭകൾ’ വഴി പുതിയ വോട്ടർമാരിലേക്കും യുവാക്കളിലേക്കും നേരിട്ടെത്താനാണ് പാർട്ടി പ്രവർത്തകർക്ക് നൽകിയിരിക്കുന്ന നിർദ്ദേശം. വരാനിരിക്കുന്ന തെരഞ്ഞെടുപ്പുകൾക്ക് മുന്നോടിയായി പാർട്ടി കേഡറുകളെ പൂർണ്ണ സജ്ജരാക്കാനും മോദി സർക്കാരിന്റെ ഭരണ മാതൃക ജനങ്ങളിലേക്ക് എത്തിക്കാനുമുള്ള ഒരു വലിയ രാഷ്ട്രീയ നീക്കമായാണ് ബിജെപി നേതൃത്വം ഇതിനെ കാണുന്നത്.
Summary: As the Narendra Modi government approaches the completion of 12 years in power, the BJP is gearing up to launch a massive month-long nationwide outreach campaign from June 9 to July 9, 2026. Titled “12 Years, 12 Big Achievements,” the campaign will feature Union Ministers, Chief Ministers, and party workers holding public rallies, press conferences, and door-to-door interactions.
