ഇന്ത്യയും അമേരിക്കയും തമ്മിലുള്ള ഉഭയകക്ഷി വ്യാപാര കരാർ അന്തിമഘട്ടത്തിലാണെന്ന് അമേരിക്കൻ അംബാസഡർ സെർജിയോ ഗോർ വ്യക്തമാക്കി. വാഷിംഗ്ടണിൽ നടന്ന യുഎസ്-ഇന്ത്യ സ്ട്രാറ്റജിക് പാർട്ണർഷിപ്പ് ഫോറം (USISPF) ഉച്ചകോടിയിലാണ് വ്യാപാര കരാറിന്റെ 98 ശതമാനവും പൂർത്തിയായതായി അദ്ദേഹം അറിയിച്ചത്. പ്രധാനമന്ത്രി നരേന്ദ്ര മോദിയും പ്രസിഡന്റ് ഡൊണാൾഡ് ട്രംപും തമ്മിലുള്ള വ്യക്തിപരമായ സൗഹൃദം ഇരുരാജ്യങ്ങളും തമ്മിലുള്ള ബന്ധത്തിലെ സുപ്രധാന തൂണാണെന്നും അദ്ദേഹം കൂട്ടിച്ചേർത്തു. (Modi Donald Trump Friendship)
മിയാമിയിൽ നടന്ന ഒരു പരിപാടിക്കിടെ, പുലർച്ചെ സമയം നോക്കാതെ പ്രധാനമന്ത്രി മോദിയെ ഫോണിൽ വിളിക്കാൻ ട്രംപ് കാണിച്ച താൽപ്പര്യം അംബാസഡർ ഗോർ അനുസ്മരിച്ചു. അപ്പോൾ ഇന്ത്യയിൽ സമയം രാവിലെ 6 മണിയാണെന്ന് ചൂണ്ടിക്കാട്ടിയപ്പോൾ, “അദ്ദേഹം ഉണർന്നിട്ടുണ്ടാകും, എന്നെപ്പോലെയാണ് അദ്ദേഹം” എന്നായിരുന്നു ട്രംപിന്റെ മറുപടി. മോദിയെ ഒരു ഉറ്റ സുഹൃത്തായിട്ടാണ് ട്രംപ് കാണുന്നതെന്നും, ഇരുനേതാക്കളും തമ്മിലുള്ള ഈ അഗാധമായ സൗഹൃദം നയതന്ത്ര ബന്ധത്തിന് വലിയ കരുത്താണെന്നും ഗോർ പറഞ്ഞു.
ഇന്ത്യയും യുഎസും തമ്മിലുള്ള വ്യാപാര ബന്ധം കൂടുതൽ ശക്തമാക്കുന്നതിന്റെ ഭാഗമായി ഈ വർഷം 20.5 ബില്യൺ ഡോളറിന്റെ നിക്ഷേപമാണ് ന്യൂഡൽഹിയിലെ യുഎസ് എംബസിയിലൂടെ സമാഹരിച്ചത്. ആഗോളതലത്തിൽ തന്നെ നിക്ഷേപ പ്രോത്സാഹനത്തിൽ ഏറ്റവും മികച്ച പ്രകടനമാണ് ഇന്ത്യൻ എംബസി കാഴ്ചവെച്ചത്. ഇന്ത്യയെ ആഗോള സാമ്പത്തിക വ്യവസ്ഥയിലെ ഒരു പ്രധാന കണ്ണിയായി വിശേഷിപ്പിച്ച ഇന്ത്യൻ അംബാസഡർ വിനയ് മോഹൻ ക്വാത്ര, 2030-ഓടെ ഉഭയകക്ഷി വ്യാപാരം 500 ബില്യൺ ഡോളറിലെത്തിക്കുകയാണ് ലക്ഷ്യമെന്നും വ്യക്തമാക്കി.
പ്രതിരോധം, സെമികണ്ടക്ടർ, ആർട്ടിഫിഷ്യൽ ഇന്റലിജൻസ്, ബയോടെക്നോളജി എന്നീ മേഖലകളിൽ ഇന്ത്യയുമായുള്ള സഹകരണം അമേരിക്കയ്ക്ക് നിർണ്ണായകമാണെന്ന് യുഎസ് അണ്ടർ സെക്രട്ടറി ജേക്കബ് ഹെൽബർഗ് പറഞ്ഞു. ചൈനയ്ക്ക് ബദലായി കരുത്തുറ്റ വിതരണ ശൃംഖല കെട്ടിപ്പടുക്കുന്നതിൽ ഇന്ത്യയുടെ എഞ്ചിനീയറിംഗ് മികവും സാങ്കേതിക കഴിവുകളും അമേരിക്കൻ തന്ത്രങ്ങളിൽ വലിയ സ്വാധീനം ചെലുത്തുന്നുണ്ടെന്നും അദ്ദേഹം വ്യക്തമാക്കി. ഇന്ത്യയുമായുള്ള സാങ്കേതിക സഹകരണം പരസ്പര ഗുണകരമായ ഒരു നേട്ടമാണെന്നും, ഇതൊരു മത്സരമല്ലെന്നും അദ്ദേഹം കൂട്ടിച്ചേർത്തു.
Summary: US Ambassador to India Sergio Gor announced that the long-awaited India-US bilateral trade agreement is nearly complete, with 98-99% of the deal finalized. Highlighting the personal bond between President Donald Trump and Prime Minister Narendra Modi, Gor recalled Trump’s spontaneous wish to call Modi early one morning, remarking that “he’s like me” in terms of his work ethic. The summit also underscored India’s emergence as an “indispensable anchor” of the global economy, with strategic cooperation in semiconductors, AI, and defense aimed at strengthening supply chains and reducing reliance on China.
