ചെന്നൈ: തമിഴ്നാട് മുഖ്യമന്ത്രി വിജയ്ക്കെതിരെയും പുതുതായി അധികാരമേറ്റ തമിഴക വെട്രി കഴകം സർക്കാരിനെതിരെയും കടുത്ത രാഷ്ട്രീയ ആക്രമണവുമായി ഡി.എം.കെ അധ്യക്ഷൻ എം.കെ സ്റ്റാലിൻ. സംസ്ഥാനത്ത് നിലവിലുള്ള ഭരണസംവിധാനം അഞ്ചുവർഷത്തെ കാലാവധി പൂർത്തിയാക്കില്ലെന്നും ഡി.എം.കെയുടെ കാരുണ്യത്തിലാണ് വിജയ് സർക്കാർ മുന്നോട്ടുപോകുന്നതെന്നും സ്റ്റാലിൻ അവകാശപ്പെട്ടു. പാർട്ടി പ്രവർത്തകരെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.(MK Stalin Attacks CM Vijay TVK Government Stability Tamil Nadu Politics Election Defeat)
നിയമസഭാ തെരഞ്ഞെടുപ്പ് ഫലം ഒരു രാഷ്ട്രീയ തരംഗമല്ല, മറിച്ച് കേവലം ഒരു ‘സിനിമ സുനാമി’ മാത്രമാണെന്ന് സ്റ്റാലിൻ പരിഹസിച്ചു. രാഷ്ട്രീയ ബോധ്യത്തിന്റെ അടിസ്ഥാനത്തിലല്ല, പ്രിയപ്പെട്ട ഒരു ചലച്ചിത്ര താരത്തോടുള്ള ആവേശം കൊണ്ടാണ് വോട്ടർമാർ വിജയിയെ പിന്തുണച്ചതെന്ന് അദ്ദേഹം വാദിച്ചു.”തങ്ങളുടെ പ്രിയപ്പെട്ട നടൻ പുതിയ പാർട്ടി തുടങ്ങിയ ആവേശത്തിലാണ് ജനങ്ങൾ വോട്ട് ചെയ്തത്. കുറച്ചു ദിവസങ്ങൾക്കുള്ളിൽ ഈ കളിപ്പാട്ടത്തോടുള്ള താല്പര്യം അവർക്ക് നഷ്ടപ്പെടും. ഒടുവിൽ ഒരു കുട്ടി അമ്മയെ അന്വേഷിക്കുന്നത് പോലെ ജനങ്ങൾ വീണ്ടും ഡി.എം.കെയെ തിരഞ്ഞുപിടിക്കും,” സ്റ്റാലിൻ പറഞ്ഞു.
ഭരണകക്ഷിയായ ടി.വി.കെ.ക്ക് നിയമസഭയിൽ തനിച്ച് ഭൂരിപക്ഷം തെളിയിക്കാനായിട്ടില്ലെന്ന് ചൂണ്ടിക്കാട്ടിയാണ് സ്റ്റാലിൻ സർക്കാരിന്റെ സ്ഥിരതയെ ചോദ്യം ചെയ്തത്. 234 അംഗ നിയമസഭയിൽ ഭൂരിപക്ഷത്തിന് വേണ്ട 118 സീറ്റുകൾ മറികടക്കാൻ വിജയിയുടെ പാർട്ടിക്ക് സാധിച്ചിട്ടില്ല.
സഖ്യകക്ഷികൾ പിന്നീട് മന്ത്രിസഭയുടെ ഭാഗമായ കാര്യവും അദ്ദേഹം പരാമർശിച്ചു. എന്ത് സംഭവിക്കുമെന്ന് വരും ദിവസങ്ങളിൽ കാത്തിരുന്ന് കാണാമെന്നും ഈ സർക്കാർ അഞ്ചുവർഷം തികയ്ക്കില്ലെന്ന് ഉറപ്പാണെന്നും അദ്ദേഹം കൂട്ടിച്ചേർത്തു. അതോടൊപ്പം, അണ്ണാ ഡി.എം.കെയെ പിളർത്താൻ ശ്രമങ്ങൾ നടന്നെങ്കിലും അത് പരാജയപ്പെട്ടുവെന്നും സംസ്ഥാനത്തെ ഇപ്പോഴത്തെ രാഷ്ട്രീയ സാഹചര്യം തികച്ചും അസ്ഥിരമാണെന്നും സ്റ്റാലിൻ ആരോപിച്ചു.
Story Summary
DMK President M.K. Stalin launched a scathing attack on Tamil Nadu Chief Minister Vijay and his newly formed Tamilaga Vettri Kazhagam (TVK) government, labeling their election victory a “cinema tsunami” rather than a genuine political wave. Speaking to party workers, Stalin claimed the administration is surviving on DMK’s mercy and will fail to complete its full five-year term due to lacking a solo majority.
