പഞ്ചാബ്: അടുത്ത വർഷം നടക്കാനിരിക്കുന്ന പഞ്ചാബ് നിയമസഭാ തിരഞ്ഞെടുപ്പിനുള്ള കോൺഗ്രസിന്റെ പുതിയ സംഘടനാ ഘടന പ്രഖ്യാപിച്ചതിന് പിന്നാലെ മുതിർന്ന നേതാവ് മനീഷ് തിവാരിയുടെ അതൃപ്തി. പഞ്ചാബ് കോൺഗ്രസിന്റെ പുതിയ തിരഞ്ഞെടുപ്പ് സമിതികളിൽ തന്നെ ഉൾപ്പെടുത്താത്തതിൽ പ്രതിഷേധിച്ച് എക്സിലൂടെ (ട്വിറ്റർ) അദ്ദേഹം ഒളിയമ്പുകളെയ്തു (Manish Tewari Punjab Congress). “കഴിവുള്ളവനാകുന്നത് വലിയൊരു തെറ്റായിപ്പോയി, ആളുകളുടെ അരക്ഷിതാവസ്ഥയ്ക്ക് മരുന്ന് കണ്ടുപിടിക്കാൻ കഴിഞ്ഞിരുന്നെങ്കിൽ എന്ന് ആശിക്കുന്നു” എന്ന് തിവാരി കുറിച്ചു.
സംസ്ഥാന അധ്യക്ഷനെയും പ്രതിപക്ഷ നേതാവിനെയും നിലനിർത്തിക്കൊണ്ടാണ് കോൺഗ്രസ് പുതിയ സമിതികൾ രൂപീകരിച്ചത്. എന്നാൽ, മുൻപ് ലുധിയാന, ആനന്ദ്പൂർ സാഹിബ് എന്നിവിടങ്ങളിൽ നിന്ന് എംപിയായിരുന്ന മനീഷ് തിവാരിയെ തഴഞ്ഞത് പാർട്ടിക്കുള്ളിൽ ചർച്ചയായിട്ടുണ്ട്. ചണ്ഡിഗഡ് എംപിയായതുകൊണ്ടാണ് അദ്ദേഹത്തെ പഞ്ചാബ് ടീമിൽ ഉൾപ്പെടുത്താത്തതെന്നാണ് പാർട്ടി വൃത്തങ്ങൾ നൽകുന്ന വിശദീകരണം. എന്നാൽ, 2020-ൽ കോൺഗ്രസ് നേതൃത്വത്തിനെതിരെ കത്തയച്ച ‘ജി-23’ സംഘത്തിലെ അംഗമായിരുന്നു മനീഷ് തിവാരി എന്നതും ഈ നീക്കത്തിന് പിന്നിലുണ്ടോ എന്ന സംശയം ബലപ്പെടുന്നുണ്ട്.
പാർട്ടിയിലെ പ്രമുഖ നേതാക്കളെ വിവിധ സമിതികളുടെ തലപ്പത്ത് നിയമിച്ചിട്ടുണ്ട്. ചരൺജിത് സിംഗ് ചന്നിയാണ് തിരഞ്ഞെടുപ്പ് പ്രചാരണ സമിതിയെ നയിക്കുന്നത്. അമരീന്ദർ സിംഗ് രാജ വാറിംഗിനെ പഞ്ചാബ് കോൺഗ്രസ് അധ്യക്ഷനായി നിലനിർത്തിയതിലും പാർട്ടിയിൽ അതൃപ്തിയുണ്ടെന്ന് റിപ്പോർട്ടുകളുണ്ട്. സുഖ്ജിന്ദർ സിംഗ് രാന്ധവയെ കോർ കമ്മിറ്റി അധ്യക്ഷനായും നിയമിച്ചു. സ്ഥാനമാനങ്ങൾ ലഭിക്കാത്തതിൽ മനീഷ് തിവാരിയോടൊപ്പം മറ്റ് പല നേതാക്കളും അസംതൃപ്തരാണെന്നാണ് സൂചന.
Summary: Senior Congress leader Manish Tewari has expressed deep dissatisfaction after being excluded from the party’s newly announced election committees for the upcoming Punjab Assembly polls. Tewari posted a cryptic message on X, alluding to “people’s insecurities” regarding his skills, though party sources stated his exclusion was due to his current status as the Chandigarh MP. While the Congress retained key leaders like Amarinder Singh Raja Warring in state roles, the exclusion of Tewari—a former ‘G-23’ reformist—has sparked reports of internal friction within the state unit.
