മനാലി: മലനിരകളുടെ ശാന്തതയിലും പ്രകൃതി സൗന്ദര്യത്തിനുമിടയിൽ ജീവിക്കണമെന്നത് പലരുടെയും സ്വപ്നമാണ്. എന്നാൽ അത്തരമൊരു ജീവിതത്തിന് എത്ര ചെലവ് വരുമെന്ന ചോദ്യത്തിന് മറുപടിയുമായി എത്തിയിരിക്കുകയാണ് റിമോട്ട് ജോലിക്കാരനായ അജയ് ശർമ്മ (Manali Cost Of Living). മനാലിയിൽ ഒറ്റയ്ക്ക് താമസിച്ച് ജോലി ചെയ്യുന്ന തന്റെ മാസച്ചെലവുകളുടെ വിശദാംശങ്ങളാണ് അദ്ദേഹം സോഷ്യൽ മീഡിയയിലൂടെ പങ്കുവെച്ചത്. ഒരു ബെഡ്റൂം ഫ്ലാറ്റിലാണ് അജയ് താമസിക്കുന്നത്. പ്രതിമാസം 14,000 രൂപയാണ് വാടക. ഈ തുകയ്ക്കുള്ളിൽ വൈ-ഫൈയും വൈദ്യുതി ബില്ലും ഉൾപ്പെടുന്നുവെന്നതാണ് പ്രത്യേകത. റിമോട്ട് ജോലിക്കാർക്ക് ഏറ്റവും പ്രധാനപ്പെട്ട ഇന്റർനെറ്റ് സൗകര്യം അധിക ചെലവില്ലാതെ ലഭിക്കുന്നതും ശ്രദ്ധേയമാണ്. ആരോഗ്യകരമായ ജീവിതശൈലി പിന്തുടരുന്ന അജയ് ഭക്ഷണത്തിന്റെ ഭൂരിഭാഗവും വീട്ടിൽ തന്നെ തയ്യാറാക്കുകയാണ് ചെയ്യുന്നത്. പലചരക്ക് സാധനങ്ങൾക്കായി പ്രതിമാസം ഏകദേശം 3,500 രൂപയാണ് ചെലവാകുന്നത്. എന്നാൽ ചില ദിവസങ്ങളിൽ പുറത്തുനിന്ന് ഭക്ഷണം കഴിക്കാറുണ്ടെന്നും അതിനായി ആഴ്ചയിൽ ഏകദേശം 500 രൂപ വീതം ചെലവഴിക്കാറുണ്ടെന്നും അദ്ദേഹം പറയുന്നു.
ഫിറ്റ്നസ് നിലനിർത്തുന്നതിനായി പ്രാദേശിക ജിമ്മിലും അജയ് അംഗമാണ്. സാധാരണയായി 1,800 രൂപയായിരുന്ന ജിം അംഗത്വ ഫീസ് ചർച്ചയിലൂടെ 1,500 രൂപയാക്കി കുറയ്ക്കാൻ കഴിഞ്ഞതായും അദ്ദേഹം വെളിപ്പെടുത്തി.
യാത്രാ ചെലവുകളുടെ കാര്യത്തിൽ അജയ് സ്വീകരിച്ചിരിക്കുന്ന രീതി വേറിട്ടതാണ്. ദിവസേന ആവശ്യമായ സ്ഥലങ്ങളിലേക്ക് നടക്കാൻ തന്നെയാണ് അദ്ദേഹം മുൻഗണന നൽകുന്നത്. ഇതിലൂടെ ഫിറ്റ്നസ് ലക്ഷ്യങ്ങൾ കൈവരിക്കാനും യാത്രാചെലവ് ഏകദേശം പൂജ്യത്തിലേക്ക് കുറയ്ക്കാനും സാധിക്കുന്നുവെന്ന് അദ്ദേഹം പറയുന്നു.
വാടക, ഭക്ഷണം, ജിം അംഗത്വം, മറ്റ് ദൈനംദിന ആവശ്യങ്ങൾ എന്നിവ ഉൾപ്പെടെ മനാലിയിലെ തന്റെ ആകെ പ്രതിമാസ ചെലവ് ഏകദേശം 21,000 രൂപയാണെന്നാണ് അജയ് വ്യക്തമാക്കുന്നത്. നഗരങ്ങളിലെ ഉയർന്ന ജീവിതച്ചെലവുമായി താരതമ്യം ചെയ്യുമ്പോൾ ഇത് താരതമ്യേന കുറഞ്ഞ തുകയാണെന്ന് പലരും അഭിപ്രായപ്പെടുന്നു. “മലനിരകളിലെ ജീവിതച്ചെലവ്” എന്ന തലക്കെട്ടോടെ പങ്കുവെച്ച വീഡിയോ ഇതിനോടകം ലക്ഷക്കണക്കിന് ആളുകളാണ് കണ്ടത്. മലനിരകളിലെ ജീവിതം സ്വപ്നസമാനമാണെന്ന് ചിലർ അഭിപ്രായപ്പെട്ടപ്പോൾ, റിമോട്ട് ജോലി എങ്ങനെ കണ്ടെത്താമെന്ന് മറ്റുചിലർ ചോദിച്ചു. മനാലിയിലെ ജീവിതച്ചെലവിനെക്കുറിച്ചുള്ള ഈ വെളിപ്പെടുത്തൽ സോഷ്യൽ മീഡിയയിൽ വലിയ ചർച്ചയ്ക്കും വഴിവെച്ചിരിക്കുകയാണ്.
View this post on Instagram
