ബീഡ്: മഹാരാഷ്ട്രയിലെ ബീഡ് ജില്ലയിൽ ആളുകൾ നോക്കിനിൽക്കെ യുവതി പരസ്യമായി മുഖത്തടിച്ചതിൽ മനംനൊന്ത് യുവാവ് ജീവനൊടുക്കി (Maharashtra Suicide Case Public Slapping). പാർലി വൈജ്നാഥ് തഹസിലിലെ മോഹ ഗ്രാമ സ്വദേശിയായ ചന്ദ്രഹാർ രാജേഭാവു ഷിൻഡെയാണ് മരിച്ചത്. കാരെവാഡി ഗ്രാമത്തിന്റെ അതിർത്തിയോടു ചേർന്നുള്ള മുംഗല്യാചമല പ്രദേശത്ത് ഇക്കഴിഞ്ഞ മേയ് 15-നാണ് ഷിൻഡെയെ തൂങ്ങിമരിച്ച നിലയിൽ കണ്ടെത്തിയത്.
മേയ് 13-നായിരുന്നു കേസിനാസ്പദമായ സംഭവം നടന്നത്. പൊതുസ്ഥലത്ത് വെച്ച് നിരവധി ആളുകളുടെ സാന്നിധ്യത്തിൽ യുവതി ഇയാളെ പരസ്യമായി മുഖത്തടിക്കുകയായിരുന്നു. ഈ സംഭവം യുവാവിനെ മാനസികമായി കടുത്ത സങ്കടത്തിലാഴ്ത്തിയതായി പോലീസ് ഉദ്യോഗസ്ഥർ വ്യക്തമാക്കി.
ജീവനൊടുക്കുന്നതിന് തൊട്ടുമുമ്പ് ഷിൻഡെ തന്റെ പിതാവിനെ ഫോണിൽ വിളിച്ച് ഇതാണ് തന്റെ അവസാനത്തെ കോളെന്ന് പറഞ്ഞിരുന്നതായി സിർസാല പോലീസ് സ്റ്റേഷനിലെ ഉദ്യോഗസ്ഥൻ അറിയിച്ചു. യുവാവിന്റെ മരണത്തിന് കാരണക്കാരിയായ യുവതിക്കെതിരെ പോലീസ് കേസെടുത്തിട്ടുണ്ട്. സംഭവത്തിന്റെ കൃത്യമായ പശ്ചാത്തലം കണ്ടെത്താനും കൂടുതൽ വിവരങ്ങൾ ശേഖരിക്കാനുമായി സംഭവസ്ഥലത്തുണ്ടായിരുന്ന ദൃക്സാക്ഷികളുടെയും ബന്ധുക്കളുടെയും മൊഴി പോലീസ് രേഖപ്പെടുത്തി വരികയാണ്.
Summary: A man named Chandrahar Rajebhau Shinde allegedly died by suicide in Maharashtra’s Beed district after being deeply distressed by a public slapping incident. The confrontation occurred in Moha village on May 13, following which Shinde hanged himself on May 15. Before taking the extreme step, he made a final phone call to his father. The Sirsala police have registered a case against the woman involved and are recording witness statements to determine the exact sequence of events.
