നീസ്: പ്രധാനമന്ത്രി നരേന്ദ്ര മോദിയുടെ ഫ്രാൻസ് സന്ദർശനത്തിന് ബോളിവുഡ് സ്പർശം നൽകി ഫ്രഞ്ച് പ്രസിഡന്റ് ഇമ്മാനുവൽ മാക്രോൺ. ‘ധുരന്ധർ’ സിനിമയിലെ ജനപ്രിയ ഗാനമായ ‘ആരി ആരി’ പശ്ചാത്തല സംഗീതമാക്കി മോദിയുടെ നീസിലെ സന്ദർശനത്തിന്റെ പ്രധാന നിമിഷങ്ങൾ ഉൾപ്പെടുത്തിയ വീഡിയോയാണ് മാക്രോൺ സമൂഹമാധ്യമങ്ങളിൽ പങ്കുവെച്ചത് (Macron Narendra Modi Meeting). ഇന്ത്യ-ഫ്രാൻസ് ബന്ധത്തിന്റെ പുതിയ അധ്യായം പ്രതിഫലിപ്പിക്കുന്ന വീഡിയോയിൽ മോദിയെയും മാക്രോണിനെയും തമ്മിലുള്ള സൗഹൃദപരമായ കൂടിക്കാഴ്ചകൾ, കൈകൊടുക്കലും ആലിംഗനവും ഉൾപ്പെടെയുള്ള ദൃശ്യങ്ങൾ ഉൾപ്പെടുത്തിയിട്ടുണ്ട്. സാങ്കേതികവിദ്യ, നവീകരണം, ഭാവി വ്യവസായങ്ങൾ എന്നിവയെക്കുറിച്ചുള്ള ചർച്ചകളുടെ ദൃശ്യങ്ങളും വീഡിയോയിൽ ഇടം നേടി. നീസിൽ നടന്ന ‘ഭാരത് ഇന്നോവേറ്റ്സ് 2026’ കോൺക്ലേവിന്റെയും ഗ്ലോബൽ എഐ സമ്മിറ്റിന്റെയും പശ്ചാത്തലത്തിലാണ് വീഡിയോ പുറത്തിറക്കിയത്. പ്രധാനമന്ത്രിയുടെ പങ്കാളിത്തത്തിന് നന്ദി അറിയിക്കുന്ന തരത്തിലുള്ള ഒരു ദൃശ്യാവിഷ്കാരമായാണ് മാക്രോണിന്റെ പോസ്റ്റ് വിലയിരുത്തപ്പെടുന്നത്.
🇮🇳🇫🇷 pic.twitter.com/MD1gMC04dp
— Emmanuel Macron (@EmmanuelMacron) June 14, 2026
വീഡിയോ സമൂഹമാധ്യമങ്ങളിൽ വേഗത്തിൽ വൈറലായതോടെ നിരവധി ഉപയോക്താക്കൾ ഇന്ത്യയും ഫ്രാൻസും തമ്മിലുള്ള സാംസ്കാരികവും നയതന്ത്രപരവുമായ ബന്ധത്തെ അഭിനന്ദിച്ചു. ജനപ്രിയ ഇന്ത്യൻ സിനിമാ സംഗീതത്തെ നയതന്ത്ര ആശയവിനിമയത്തിന്റെ ഭാഗമാക്കുന്ന മാക്രോണിന്റെ ശൈലി വീണ്ടും ശ്രദ്ധനേടി. മാക്രോണിന്റെ പോസ്റ്റിന് മറുപടിയായി പ്രധാനമന്ത്രി മോദി നന്ദി അറിയിക്കുകയും സാങ്കേതികവിദ്യ, നവീകരണം, വളർന്നുവരുന്ന വ്യവസായ മേഖലകൾ എന്നിവയിൽ ഇന്ത്യയും ഫ്രാൻസും സഹകരണം കൂടുതൽ ശക്തിപ്പെടുത്തുമെന്ന് വ്യക്തമാക്കുകയും ചെയ്തു. ഇതിന് മുമ്പും ‘ധുരന്ധർ’ സിനിമയുമായി ബന്ധപ്പെട്ട സംഗീതം ഉപയോഗിച്ച് മാക്രോൺ സോഷ്യൽ മീഡിയ പോസ്റ്റുകൾ പങ്കുവെച്ചിരുന്നു. ഇന്ത്യാ സന്ദർശനത്തിന് ശേഷമുള്ള യാത്രയയപ്പ് വീഡിയോയിലും സമാനമായ സംഗീതം ഉപയോഗിച്ചതോടെ അത് വലിയ ചർച്ചയായിരുന്നു.
Les entretiens d’aujourd’hui avec mon ami le Président Macron ont été exceptionnellement productifs. Au regard de l’amitié de longue date entre nos deux nations, nous avons décidé d’élever nos relations au rang de Partenariat stratégique global d’exception.
Nos échanges ont… pic.twitter.com/MtRO1m8q1W
— Narendra Modi (@narendramodi) June 14, 2026
നീസിലെ വില്ല കെറിലോസിൽ നടന്ന ഉഭയകക്ഷി കൂടിക്കാഴ്ചയിൽ പ്രതിരോധം, ബഹിരാകാശ സഹകരണം, ആണവോർജം, സാങ്കേതികവിദ്യ, നവീകരണം തുടങ്ങിയ മേഖലകളിലെ സഹകരണം ഇരു നേതാക്കളും വിലയിരുത്തി. ഈ വർഷം ഇന്ത്യയും ഫ്രാൻസും ബന്ധം ‘സ്പെഷ്യൽ ഗ്ലോബൽ സ്ട്രാറ്റജിക് പാർട്ണർഷിപ്പ്’ നിലവാരത്തിലേക്ക് ഉയർത്തിയതിന് ശേഷമുള്ള ആദ്യ കൂടിക്കാഴ്ച കൂടിയായിരുന്നു ഇത്. ‘ഭാരത് ഇന്നോവേറ്റ്സ് 2026’ കോൺക്ലേവിന്റെ ഉദ്ഘാടനം ഇരുനേതാക്കളും സംയുക്തമായി നിർവഹിച്ചു. കൃത്രിമ ബുദ്ധി, സ്റ്റാർട്ടപ്പുകൾ, വ്യാപാരം, ബഹിരാകാശ സാങ്കേതികവിദ്യ, ഉയർന്നുവരുന്ന സാങ്കേതിക മേഖലകൾ എന്നിവയെക്കുറിച്ചുള്ള ചർച്ചകൾക്ക് ഇരുവരും നേതൃത്വം നൽകി.
ഉന്നത സാങ്കേതികവിദ്യകൾ, പ്രതിരോധ നിർമ്മാണം, മനുഷ്യ ബഹിരാകാശ യാത്ര, ചെറുകിട മോഡുലാർ ആണവ റിയാക്ടറുകൾ തുടങ്ങിയ മേഖലകളിൽ സഹകരണം കൂടുതൽ വിപുലീകരിക്കാനും ഇരുരാജ്യങ്ങളും ധാരണയിലെത്തി. ഇന്ത്യ-ഫ്രാൻസ് ബന്ധം കൂടുതൽ ശക്തമാക്കാനുള്ള പ്രതിബദ്ധത ഇരുനേതാക്കളും ആവർത്തിച്ചു.
Summary: French President Emmanuel Macron shared a Bollywood-style video of Prime Minister Narendra Modi’s visit to Nice, using the popular song “Aari Aari” from Dhurandhar. The video highlighted key moments from their meetings and showcased the growing cultural and strategic partnership between India and France.
