വിശാഖപട്ടണം: രാജ്യാന്തര തലത്തിൽ ശ്രദ്ധേയമായ തങ്ങളുടെ ഔദ്യോഗിക ലോഗോ പരിഷ്കരിച്ച് ഇന്ത്യൻ റെയിൽവേ. രാജ്യത്തെ പതിനെട്ടാമത് റെയിൽവേ സോൺ ആയി ദക്ഷിണ തീരദേശ റെയിൽവേയെ ഔദ്യോഗികമായി വിജ്ഞാപനം ചെയ്തതിന് പിന്നാലെയാണ് ലോഗോയിൽ മാറ്റം വരുത്തിയത്. നിലവിലുണ്ടായിരുന്ന 17 ചുവന്ന നക്ഷത്രങ്ങൾക്ക് പകരം പുതിയ 18 നക്ഷത്രങ്ങൾ ഉൾപ്പെടുത്തിയ ലോഗോയ്ക്ക് റെയിൽവേ ബോർഡ് ചെയർമാനും ചീഫ് എക്സിക്യൂട്ടീവ് ഓഫീസറും അനുമതി നൽകി.(Indian Railways New Logo 18 Stars South Coast Railway Zone )
പുതുക്കിയ റെയിൽവേ ചിഹ്നം 2026 ജൂൺ 1 മുതൽ രാജ്യത്തുടനീളമുള്ള റെയിൽവേ സ്ഥാപനങ്ങളിൽ ഔദ്യോഗികമായി ഉപയോഗിച്ചു തുടങ്ങും. ഇത് സംബന്ധിച്ച നിർദ്ദേശം റെയിൽവേ ബോർഡ് എല്ലാ സോണൽ റെയിൽവേകൾക്കും പ്രൊഡക്ഷൻ യൂണിറ്റുകൾക്കും പൊതുമേഖലാ സ്ഥാപനങ്ങൾക്കും കൈമാറിക്കഴിഞ്ഞു.
എസ്റ്റാബ്ലിഷ്മെന്റ് ആൻഡ് റിഫോംസ് ഡയറക്ടറേറ്റ് പുറപ്പെടുവിച്ച ഗസറ്റ് വിജ്ഞാപന പ്രകാരം 2026 ജൂൺ 1 മുതലാണ് ദക്ഷിണ തീരദേശ റെയിൽവേ ഔദ്യോഗികമായി പ്രവർത്തനം ആരംഭിക്കുന്നത്. ആന്ധ്രാപ്രദേശിലെ വിശാഖപട്ടണം ആസ്ഥാനമായാണ് പുതിയ സോൺ രൂപീകരിച്ചിരിക്കുന്നത്. 2014-ൽ ആന്ധ്രാപ്രദേശ് വിഭജനത്തിന് ശേഷം ഉയർന്നുവന്ന സംസ്ഥാനത്തിന്റെ ദീർഘകാലത്തെ ആവശ്യമാണ് ഇതിലൂടെ യാഥാർത്ഥ്യമാകുന്നത്. പുതിയ സോണിന്റെ വരവോടെ ആന്ധ്രയിലും സമീപ പ്രദേശങ്ങളിലും റെയിൽവേ ഭരണസംവിധാനം കൂടുതൽ ശക്തമാകുമെന്നും അടിസ്ഥാന സൗകര്യ വികസനത്തിന് വേഗതയേറുമെന്നുമാണ് വിലയിരുത്തൽ.
പുതിയ ദക്ഷിണ തീരദേശ റെയിൽവേ സോണിൽ സൗത്ത് സെൻട്രൽ റെയിൽവേയുടെ ഭാഗമായിരുന്ന വിജയ്വാഡ, ഗുണ്ടൂർ, ഗുണ്ടക്കൽ ഡിവിഷനുകൾ ഉൾപ്പെടും. ഇതോടൊപ്പം ഈസ്റ്റ് കോസ്റ്റ് റെയിൽവേയുടെ വാൾട്ടെയർ ഡിവിഷൻ പുനഃസംഘടിപ്പിച്ച് രൂപീകരിച്ച വിശാഖപട്ടണം ഡിവിഷനും ഇതിന്റെ ഭാഗമാകും. വാൾട്ടെയർ ഡിവിഷന്റെ മറ്റ് ചില ഭാഗങ്ങൾ ഈസ്റ്റ് കോസ്റ്റ് റെയിൽവേയ്ക്ക് കീഴിലുള്ള റായഗഡ ഡിവിഷനുമായി ലയിപ്പിച്ചു. ഔദ്യോഗിക ആശയവിനിമയങ്ങൾ, ലെറ്റർപാഡുകൾ, സൈൻബോർഡുകൾ, ഡിജിറ്റൽ പ്ലാറ്റ്ഫോമുകൾ, പരസ്യങ്ങൾ എന്നിവയിലെല്ലാം പുതിയ 18 നക്ഷത്രങ്ങളുള്ള ലോഗോ ജൂൺ 1 മുതൽ നിർബന്ധമായും ഉപയോഗിക്കാൻ റെയിൽവേ നിർദ്ദേശിച്ചിട്ടുണ്ട്.
Story Summary
The Ministry of Railways approved a revised Indian Railways logo featuring 18 stars, marking the official launch of the South Coast Railway (SCoR) as India’s 18th railway zone. Headquartered in Visakhapatnam, the new zone will become fully operational on June 1, 2026, combining several key divisions.
