ടോക്കിയോ: ജപ്പാനിലെ ആദ്യ ദിവസത്തെ അത്ഭുതകരമായ കാഴ്ചകൾ പങ്കുവെച്ച് ഇന്ത്യൻ സോഫ്റ്റ്വെയർ ഡെവലപ്പറും ഇൻഫ്ലുവൻസറുമായ ദേവ് വിജയ് വർഗിയ. സാധാരണയായി വിദേശ യാത്രകളിൽ ഭക്ഷണം, ഭാഷ എന്നിവയിലായിരിക്കും ആളുകൾക്ക് ‘കൾച്ചർ ഷോക്ക്’ അനുഭവപ്പെടുക (Indian Man Japan Experience). എന്നാൽ ജപ്പാനിൽ താൻ അനുഭവിച്ചത് അത്തരം കാര്യങ്ങളിലല്ല, മറിച്ച് അവിടുത്തെ ചെറിയ കാര്യങ്ങളിലെ അതീവ കൃത്യതയും ശുചിത്വവുമാണെന്ന് അദ്ദേഹം പറയുന്നു. ജപ്പാനിലെ ജീവിതത്തെ ഒരു “പ്രീമിയം സബ്സ്ക്രിപ്ഷൻ” എടുത്തതുപോലെയാണ് തനിക്ക് തോന്നുന്നതെന്ന് വർഗിയ വീഡിയോയിൽ വ്യക്തമാക്കുന്നു.
വീടിന് പുറകിലൂടെ ഒഴുകുന്ന ഡ്രെയിനേജിലെ തെളിനീര് കണ്ട് അദ്ദേഹം അത്ഭുതപ്പെടുന്നു. ജപ്പാനിലെ ‘സെവൻ-ഇലവൻ’ സ്റ്റോറുകളെക്കുറിച്ചും അദ്ദേഹം വാചാലനാകുന്നു. എപ്പോൾ വിശന്നാലും ഭക്ഷണം ലഭിക്കുന്ന, ശുചിത്വമുള്ള ഇത്തരം സ്റ്റോറുകൾ ജപ്പാനിലെ ജീവിതം എത്രമാത്രം സുഗമമാക്കുന്നുവെന്ന് അദ്ദേഹം ചൂണ്ടിക്കാട്ടുന്നു. വെറുമൊരു വിനോദസഞ്ചാരിയുടെ കാഴ്ചപ്പാടിലല്ല, മറിച്ച് അവിടുത്തെ ജനങ്ങളുടെ പൗരബോധവും വൃത്തിയും അടിസ്ഥാനമാക്കിയാണ് അദ്ദേഹം ഈ വീഡിയോ പങ്കുവെച്ചിരിക്കുന്നത്.
39 ദശലക്ഷത്തിലധികം ആളുകൾ കണ്ട ഈ വീഡിയോ ഇപ്പോൾ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്. ജപ്പാൻ ഒരു മാജിക്കല്ല, മറിച്ച് ജനങ്ങളുടെ പൗരബോധമാണെന്നും അഴിമതിയില്ലാത്ത ഭരണവും നിയമങ്ങൾ കൃത്യമായി നടപ്പിലാക്കുന്നതുമാണ് ഇത്രയും വ്യത്യാസത്തിന് കാരണമെന്നും നിരവധി പേർ കമന്റുകളിൽ കുറിക്കുന്നു. ഒരു രാജ്യം എങ്ങനെ പ്രവർത്തിക്കുന്നു എന്നതിന്റെ ഉത്തമ ഉദാഹരണമാണ് ജപ്പാനിലെ ഈ കാഴ്ചകളെന്നും പലരും അഭിപ്രായപ്പെടുന്നു. അടിസ്ഥാനപരമായ പൗരബോധം ഉണ്ടെങ്കിൽ ഏതൊരു രാജ്യത്തെയും ഇത്രത്തോളം മനോഹരമാക്കാൻ സാധിക്കുമെന്ന തിരിച്ചറിവാണ് വർഗിയയുടെ വീഡിയോ ലക്ഷക്കണക്കിന് ആളുകളിലേക്ക് എത്തിക്കുന്നത്.
