ന്യൂഡൽഹി: അന്താരാഷ്ട്ര വിഷയങ്ങളിലെ തന്റെ നിലപാടുകളെ ബിജെപി അനുകൂലമായി വ്യാഖ്യാനിക്കരുതെന്ന് മുതിർന്ന കോൺഗ്രസ് നേതാവ് ശശി തരൂർ എംപി. ചില വിഷയങ്ങളിൽ താൻ സ്വീകരിക്കുന്ന ഗവൺമെന്റ് അനുകൂല നിലപാടുകൾ യഥാർത്ഥത്തിൽ ‘ഇന്ത്യ അനുകൂല’ നിലപാടുകളാണെന്നും അദ്ദേഹം വ്യക്തമാക്കി. തന്റെ വിശ്വസ്തത ആവർത്തിച്ച് ചോദ്യം ചെയ്യുന്നതിലുള്ള അതൃപ്തിയും അദ്ദേഹം പ്രകടിപ്പിച്ചു.(I am in Congress, not going anywhere, says Shashi Tharoor)
അന്താരാഷ്ട്ര വേദികളിൽ രാഷ്ട്രീയ കാഴ്ചപ്പാടിലൂടെ സംസാരിക്കുന്നതിനേക്കാൾ രാജ്യത്തിനുവേണ്ടി സംസാരിക്കാനാണ് താൻ മുൻഗണന നൽകുന്നതെന്ന് തരൂർ പറഞ്ഞു. ചില വിദേശകാര്യ വിഷയങ്ങളെ രാഷ്ട്രീയവത്കരിക്കാൻ താൻ ആഗ്രഹിക്കുന്നില്ല. ഇത് തന്റെ പണ്ടേയുള്ള നിലപാടാണെന്നും പുതിയ കാര്യമല്ലെന്നും അദ്ദേഹം കൂട്ടിച്ചേർത്തു.
തന്റെ ചില നിലപാടുകൾ ബിജെപിയുടേതുമായി സാമ്യമുള്ളതായി മാധ്യമങ്ങൾ കരുതിയിരിക്കാം. എന്നാൽ അവ രാജ്യതാൽപ്പര്യം മുൻനിർത്തിയുള്ളവ മാത്രമാണെന്ന് അദ്ദേഹം വിശദീകരിച്ചു. കഴിഞ്ഞ വർഷം പഹൽഗാം ആക്രമണത്തിന്റെ പശ്ചാത്തലത്തിൽ ഇന്ത്യ-പാക് നയതന്ത്ര ബന്ധത്തെക്കുറിച്ച് തരൂർ നടത്തിയ പരാമർശങ്ങൾ കോൺഗ്രസിന്റെ ഔദ്യോഗിക നിലപാടിൽ നിന്ന് ഭിന്നമാണെന്ന വിമർശനം ഉയർന്നിരുന്നു.
