ന്യൂഡൽഹി: വായുമലിനീകരണം കുറയ്ക്കുകയും ശുദ്ധ ഊർജാധിഷ്ഠിത ഗതാഗത സംവിധാനങ്ങളെ പ്രോത്സാഹിപ്പിക്കുകയും ചെയ്യുന്നതിനുള്ള പുതിയ ‘ഇവി പോളിസി 2.0’യ്ക്ക് ഡൽഹി മന്ത്രിസഭ അംഗീകാരം നൽകി (Delhi EV Policy 2.0). മുഖ്യമന്ത്രി രേഖാ ഗുപ്തയുടെ അധ്യക്ഷതയിൽ ചേർന്ന യോഗത്തിലാണ് നിർണായക തീരുമാനങ്ങൾ ഉൾക്കൊള്ളുന്ന പുതിയ നയം പാസാക്കിയത്. ജൂലൈ 1 മുതൽ നയം പ്രാബല്യത്തിൽ വരും.
പുതിയ നയപ്രകാരം 2027 ജനുവരി 1 മുതൽ ഡൽഹിയിൽ പുതിയ ഇലക്ട്രിക് ഓട്ടോറിക്ഷകൾക്ക് മാത്രമേ രജിസ്ട്രേഷൻ അനുവദിക്കൂ. നിലവിൽ ഉപയോഗത്തിലുള്ള വാഹനങ്ങൾക്ക് നിയന്ത്രണങ്ങളില്ലെങ്കിലും പുതിയ പെട്രോൾ, സിഎൻജി ഓട്ടോറിക്ഷകളുടെ രജിസ്ട്രേഷൻ പൂർണമായും അവസാനിപ്പിക്കും.
അതുപോലെ, 2028 ഏപ്രിൽ 1 മുതൽ പുതിയ പെട്രോൾ സ്കൂട്ടറുകളും മോട്ടോർസൈക്കിളുകളും രജിസ്റ്റർ ചെയ്യുന്നത് നിർത്തലാക്കും. തുടർന്ന് ഇലക്ട്രിക് ഇരുചക്ര വാഹനങ്ങൾക്കു മാത്രമായിരിക്കും പുതിയ രജിസ്ട്രേഷൻ അനുവദിക്കുക. എന്നാൽ നിലവിൽ റോഡിലുള്ള പെട്രോൾ വാഹനങ്ങളുടെ ഉപയോഗത്തെ ഇത് ബാധിക്കില്ലെന്ന് സർക്കാർ വ്യക്തമാക്കി.
ഇലക്ട്രിക് വാഹനങ്ങളുടെ വ്യാപനം വേഗത്തിലാക്കാൻ നിരവധി സാമ്പത്തിക ആനുകൂല്യങ്ങളും നയത്തിൽ ഉൾപ്പെടുത്തിയിട്ടുണ്ട്. എക്സ്-ഷോറൂം വില 30 ലക്ഷം രൂപ വരെയുള്ള എല്ലാ ഇലക്ട്രിക് കാറുകൾക്കും റോഡ് നികുതിയും രജിസ്ട്രേഷൻ ഫീസും പൂർണമായും ഒഴിവാക്കും. അതേസമയം, ഹൈബ്രിഡ് വാഹനങ്ങൾക്ക് പ്രത്യേക നികുതി ഇളവുകൾ നൽകേണ്ടതില്ലെന്ന നിലപാടാണ് സർക്കാർ സ്വീകരിച്ചിരിക്കുന്നത്.
അടുത്ത നാല് വർഷത്തിനുള്ളിൽ ഇലക്ട്രിക് വാഹന മേഖലയിലേക്ക് 15,000 കോടി രൂപയുടെ നിക്ഷേപം ആകർഷിക്കുകയാണ് ഡൽഹി സർക്കാരിന്റെ ലക്ഷ്യം. ഇതിന്റെ ഭാഗമായി ഇലക്ട്രിക് ഇരുചക്ര വാഹനങ്ങൾ വാങ്ങുന്നവർക്ക് ആദ്യ വർഷം 30,000 രൂപയും രണ്ടാം വർഷം 20,000 രൂപയും മൂന്നാം വർഷം 10,000 രൂപയും സബ്സിഡിയായി ലഭിക്കും.
ഇലക്ട്രിക് ത്രീ-വീലർ വാങ്ങുന്നവർക്ക് ആദ്യ മൂന്ന് വർഷങ്ങളിലായി യഥാക്രമം 50,000 രൂപ, 40,000 രൂപ, 30,000 രൂപ എന്നിങ്ങനെ സബ്സിഡി അനുവദിക്കും. കൂടാതെ, പഴയ ബിഎസ്-4 നാല് ചക്ര വാഹനങ്ങൾ സ്ക്രാപ്പ് ചെയ്ത് പുതിയ ഇലക്ട്രിക് വാഹനം വാങ്ങുന്നവർക്ക് ഒരു ലക്ഷം രൂപയുടെ പ്രത്യേക പ്രോത്സാഹന ധനസഹായവും പ്രഖ്യാപിച്ചിട്ടുണ്ട്.
2030 മാർച്ച് 31-നകം ഡൽഹിയെ മലിനീകരണരഹിത നഗരമാക്കി മാറ്റുക എന്ന ലക്ഷ്യത്തോടെയാണ് പുതിയ ഇലക്ട്രിക് വാഹന നയം നടപ്പാക്കുന്നതെന്ന് സർക്കാർ അറിയിച്ചു.
Story Summary:
Delhi Cabinet has approved the new EV Policy 2.0, introducing major incentives for electric vehicles and restricting future registrations of petrol and CNG autos and two-wheelers. The policy aims to reduce pollution and accelerate the transition to clean mobility by 2030.
