ഡെറാഡൂൺ: ഉത്തരാഖണ്ഡിലെ ഡെറാഡൂണിന് സമീപമുള്ള സെലാകുയിയിൽ യുവതിക്ക് നേരെ ഭർതൃവീട്ടുകാരുടെ അതിക്രൂരവും മൃഗീയവുമായ ഗാർഹിക പീഡനം (Dehradun Selakui domestic violence case). ഇരട്ടക്കുട്ടികളുടെ അമ്മയായ യുവതിയെ പത്ത് മാസത്തോളമാണ് വീടിനുള്ളിലെ ഒരു മുറിയിലും ടോയ്ലറ്റിലുമായി മാറിമാറി പൂട്ടിയിട്ട് ക്രൂരമായി പീഡിപ്പിച്ചത്. ഈ ക്രൂരത നടന്ന കാലയളവിലത്രയും പട്ടിണിക്കിടാതിരിക്കാൻ വെറും ചോറും പച്ച ഉള്ളിയും മുളകും മാത്രമാണ് ഇവർ യുവതിക്ക് നൽകിയിരുന്നതെന്ന് പെൺകുട്ടിയുടെ പിതാവ് പോലീസിൽ നൽകിയ പരാതിയിൽ വ്യക്തമാക്കുന്നു.
സംഭവത്തിൽ യുവതിയുടെ ഭർത്താവ് രാഹുൽ ഖണ്ഡൂരി, ഇയാളുടെ മാതാപിതാക്കൾ എന്നിവർക്കെതിരെ ഡെറാഡൂൺ പോലീസ് ജാമ്യമില്ലാ വകുപ്പുകൾ പ്രകാരം കേസ് രജിസ്റ്റർ ചെയ്തു. രണ്ട് വർഷം മുൻപ് വിവാഹിതരായ ദമ്പതികൾക്ക് കഴിഞ്ഞ 2025 ഫെബ്രുവരിയിലാണ് ഇരട്ടക്കുട്ടികൾ ജനിക്കുന്നത്. ഭർത്താവ് രാഹുൽ ഡൽഹിയിൽ സ്വകാര്യ കമ്പനിയിൽ ജോലി ചെയ്യുന്നതിനാൽ യുവതി സെലാകുയിയിലുള്ള ഭർതൃവീട്ടുകാർക്കൊപ്പമാണ് താമസിച്ചിരുന്നത്.
കുട്ടികൾ ജനിച്ച് ഏതാനും മാസങ്ങൾക്ക് ശേഷം കഴിഞ്ഞ വർഷം ജൂലൈ മുതൽ യുവതിയെ ഭർതൃവീട്ടുകാർ മുറിക്കുള്ളിൽ പൂട്ടിയിടാൻ തുടങ്ങി. ഡൽഹിയിലുള്ള ഭർത്താവ് അവധിക്ക് നാട്ടിലെത്തുമ്പോഴെല്ലാം ഇവർക്കൊപ്പം ചേർന്ന് യുവതിയെ ക്രൂരമായി മർദ്ദിച്ചിരുന്നതായും പരാതിയിൽ പറയുന്നു. കസേര, വടി, പ്ലാസ്റ്റിക് ഡ്രെയിൻ പൈപ്പ്, ഫ്ലോർ വൈപ്പർ എന്നിവ ഉപയോഗിച്ചാണ് ഭർതൃവീട്ടുകാർ യുവതിയെ ദിവസവും തല്ലിച്ചതച്ചിരുന്നത്.
മനുഷ്യമനസ്സാക്ഷിയെ ഞെട്ടിക്കുന്ന അതിക്രമങ്ങളാണ് യുവതിക്ക് നേരെ ഭർതൃവീട്ടിൽ നടന്നത്. യുവതിയുടെ സ്വകാര്യ ഭാഗങ്ങളിൽ കുപ്പികളും വടികളും ബലമായി ഉപയോഗിച്ച് ആഴത്തിൽ മുറിവേൽപ്പിച്ചെന്നും, ക്രൂരത മറച്ചുവെക്കാൻ തലമുടി മുഴുവൻ ബലമായി പറിച്ചെടുത്തെന്നും പോലീസിന് നൽകിയ മൊഴിയിലുണ്ട്. ഈ 10 മാസത്തിനിടയിൽ യുവതിയെ സ്വന്തം കുടുംബവുമായി സംസാരിക്കാനോ ഫോൺ ഉപയോഗിക്കാനോ പ്രസവിച്ച കുഞ്ഞുങ്ങളെ ഒന്നു കാണാനോ പോലും ഭർതൃവീട്ടുകാർ അനുവദിച്ചിരുന്നില്ല.
യുവതിയുടെ വീട്ടുകാർ ഫോണിൽ ബന്ധപ്പെടുമ്പോഴെല്ലാം അവൾ ഉറങ്ങുകയാണെന്നോ കുളിക്കുകയാണെന്നോ ഉള്ള കള്ളങ്ങളാണ് പ്രതികൾ സ്ഥിരമായി പറഞ്ഞിരുന്നത്. സംശയം തോന്നി സ്വന്തം മകളെ നേരിട്ട് കാണാൻ ഭർതൃവീട്ടിലേക്ക് ചെന്ന യുവതിയുടെ പ്രായമായ മാതാപിതാക്കളെ വീടിനകത്തേക്ക് പ്രവേശിക്കാൻ പോലും പ്രതികൾ അനുവദിച്ചതുമില്ല. മാസങ്ങളോളം നീണ്ട നിരന്തരമായ ക്രൂര ശാരീരിക-മാനസിക പീഡനങ്ങൾ യുവതിയുടെ മാനസികാരോഗ്യത്തെ (Mental Health) ഗുരുതരമായി ബാധിച്ചതായും പരാതിയിൽ പറയുന്നു. ഒളിവിൽ പോയ പ്രതികൾക്കായി പോലീസ് അന്വേഷണം ശക്തമാക്കി.
Story Summary: A shocking case of domestic violence has been reported from Selakui, Dehradun, where a mother of twins was locked in a room and toilet for 10 months by her husband Rahul Khanduri and his parents. She was fed only rice and onions, and sustained severe physical and private-part injuries.
