ചണ്ഡിഗഡ്: പഞ്ചാബ് മുഖ്യമന്ത്രി ഭഗവന്ത് മന്നിനെതിരെ രൂക്ഷമായ ആരോപണങ്ങളുമായി സ്വാതി മലിവാൾ. മുഖ്യമന്ത്രി നിയമസഭയിൽ എത്തിയത് മദ്യപിച്ചാണെന്ന് ആരോപിച്ച അവർ, അദ്ദേഹത്തെ വൈദ്യപരിശോധനയ്ക്ക് വിധേയനാക്കണമെന്നും ആവശ്യപ്പെട്ടു. എഎപി വിട്ട് ബിജെപിയിൽ ചേർന്നതിന് പിന്നാലെയാണ് സ്വാതി മലിവാൾ ഭഗവന്ത് മന്നിനെതിരെ പുതിയ പോർമുഖം തുറന്നിരിക്കുന്നത്.(Came to the House drunk, Swati Maliwal slams Punjab Chief Minister)
മുഖ്യമന്ത്രി സഭയിൽ സംസാരിക്കുന്ന വീഡിയോ എക്സിൽ പങ്കുവെച്ചുകൊണ്ടാണ് സ്വാതി മലിവാൾ തന്റെ ആരോപണങ്ങൾ ഉന്നയിച്ചത്. ജനാധിപത്യത്തിന്റെ ശ്രീകോവിലായ നിയമസഭയിൽ മൻ എത്തിയത് മദ്യലഹരിയിലാണെന്ന് അവർ ആരോപിച്ചു.
സർക്കാർ യോഗങ്ങളിലും ആരാധനാലയങ്ങളിലും മദ്യപിച്ചാണ് അദ്ദേഹം എത്തുന്നതെന്നും മുമ്പ് വിമാനത്തിൽ നിന്ന് ഇറക്കിവിട്ട സംഭവം ഇതിന് തെളിവാണെന്നും അവർ പറഞ്ഞു. തന്ത്രപ്രധാന അതിർത്തി സംസ്ഥാനമായ പഞ്ചാബിന്റെ മുഖ്യമന്ത്രി ഫയലുകളിൽ ഒപ്പിടുന്നത് പോലും മദ്യലഹരിയിലാണെന്നും ഇത് നാണക്കേടാണെന്നും സ്വാതി മലിവാൾ കൂട്ടിച്ചേർത്തു.
