പട്ന/ബറേലി: ഉത്തർപ്രദേശിലെ ബറേലിയിൽ ബിഹാർ സ്വദേശിയായ മദ്റസ അധ്യാപകൻ ട്രെയിനിൽ കൊല്ലപ്പെട്ട സംഭവത്തിൽ കൊലപാതക ആരോപണവുമായി കുടുംബം (Madrasa Teacher Death UP). ബിഹാറിലെ കിഷൻഗഞ്ച് സ്വദേശിയായ മൗലാന തൗസിഫ് റാസ മസ്ഹരി (30) ആണ് മരിച്ചത്. മോഷണക്കുറ്റം ആരോപിച്ച് ഒരു സംഘം ആളുകൾ തൗസിഫിനെ മർദിച്ച ശേഷം ഓടുന്ന ട്രെയിനിൽ നിന്ന് തള്ളിയിടുകയായിരുന്നുവെന്ന് ബന്ധുക്കൾ ആരോപിച്ചു.
ഞായറാഴ്ച രാത്രി ബറേലിയിൽ നടന്ന മതപരിപാടിയിൽ പങ്കെടുത്ത ശേഷം നാട്ടിലേക്ക് മടങ്ങുകയായിരുന്നു തൗസിഫ്. യാത്രാമധ്യേ ഭാര്യ തബസ്സും ഖാതുമുമായി വീഡിയോ കോളിൽ സംസാരിക്കുന്നതിനിടെയാണ് അക്രമം നടന്നത്.
“മോഷണം ആരോപിച്ച് ഒരു സംഘം ആളുകൾ അദ്ദേഹത്തെ ചോദ്യം ചെയ്യുന്നതും മർദിക്കുന്നതും ഞാൻ വീഡിയോ കോളിൽ കണ്ടു. താൻ മദ്റസ അധ്യാപകനാണെന്ന് പറഞ്ഞ് അദ്ദേഹം ബാഗിലുള്ള പുസ്തകങ്ങൾ കാണിച്ച് കൊടുത്തു. രക്ഷപ്പെടാൻ സഹയാത്രികരോട് സഹായം തേടിയിട്ടും ആരും ഇടപെട്ടില്ല. ഷർട്ടിൽ പിടിച്ച് വലിച്ചിഴക്കുന്നതും കണ്ടു. പിന്നീട് ഫോൺ കട്ടായി. അതിനുശേഷം ഫോണിലേക്ക് നിരന്തരം വിളിച്ചിട്ടും ലഭിച്ചില്ല. പിറ്റേന്ന് റെയിൽവേ പോലീസാണ് മരണവിവരമറിയിച്ചത്- കുടുംബം പറയുന്നു.
ബറേലി റെയിൽവേ സ്റ്റേഷൻ പരിധിയിൽ ട്രാക്കിലാണ് മൃതദേഹം കണ്ടെത്തിയത്. ട്രെയിനിൽ നിന്ന് വീണുണ്ടായ അപകടമാണെന്നാണ് റെയിൽവേ പോലീസ് റിപ്പോർട്ട് ചെയ്യുന്നത്. എന്നാൽ ശരീരത്തിൽ ക്രൂരമായ മർദനമേറ്റ പാടുകളുണ്ടെന്നും ഇത് ആസൂത്രിതമായ കൊലപാതകമാണെന്നും കുടുംബം ഉറപ്പിച്ചു പറയുന്നു.
സംഭവത്തിൽ എ.ഐ.എം.ഐ.എം അധ്യക്ഷൻ അസദുദ്ദീൻ ഉവൈസി പ്രതിഷേധം രേഖപ്പെടുത്തി. അക്രമികൾക്കെതിരെ റെയിൽവേ മന്ത്രാലയവും പോലീസും കർശന നടപടി സ്വീകരിക്കണമെന്നും ഉന്നതതല അന്വേഷണം വേണമെന്നും അദ്ദേഹം ആവശ്യപ്പെട്ടു.
Story Summary: Maulana Tausif Raza Mazhari (30), a Madrasa teacher from Bihar’s Kishanganj, was allegedly killed after being thrown off a moving train in Bareilly, UP. His family claims that while on a video call with his wife, they witnessed a group of people beating him over false theft allegations. While police termed it an accident, the family alleges murder. AIMIM Chief Asaduddin Owaisi has demanded a strict probe.
