ബെംഗളൂരു: വിദേശത്തുനിന്നും കടത്താൻ ശ്രമിച്ച അതീവ വീര്യമുള്ള മയക്കുമരുന്ന് ബെംഗളൂരു കസ്റ്റംസ് വിഭാഗം പിടിച്ചെടുത്തു (Bengaluru Airport Drug Seizure). ചെക്ക്-ഇൻ ബാഗേജിൽ അതീവ രഹസ്യമായി ഒളിപ്പിച്ച നിലയിലായിരുന്നു കഞ്ചാവ് കണ്ടെത്തിയത്. ബാങ്കോക്കിൽ നിന്നുള്ള വിമാനത്തിൽ എത്തിയ യാത്രക്കാരനെ സംശയത്തിന്റെ അടിസ്ഥാനത്തിൽ പരിശോധിച്ചപ്പോഴാണ് ലഹരിമരുന്ന് കണ്ടെത്തിയത്. ഇയാളെ കസ്റ്റംസ് അറസ്റ്റ് ചെയ്തു.
3.66 കിലോഗ്രാം ഭാരമുള്ള ഹൈഡ്രോപോണിക് കഞ്ചാവാണ് പിടിച്ചെടുത്തത്. ഇതിന് അന്താരാഷ്ട്ര വിപണിയിൽ ഏകദേശം 1.28 കോടി രൂപ വിലവരും.
എന്താണ് ഹൈഡ്രോപോണിക് കഞ്ചാവ്?
മണ്ണ് ഉപയോഗിക്കാതെ, നിയന്ത്രിത സാഹചര്യങ്ങളിൽ ധാതുലവണങ്ങൾ അടങ്ങിയ ലായനികളിലൂടെ വളർത്തിയെടുക്കുന്ന കഞ്ചാവാണിത്. സാധാരണ കഞ്ചാവിനേക്കാൾ ഇതിന് വീര്യം കൂടുതലാണ്. സാധാരണ കഞ്ചാവിൽ ലഹരി നൽകുന്ന ഘടകമായ THC (Tetrahydrocannabinol) അളവ് 5% മുതൽ 15% വരെയാണെങ്കിൽ, ഹൈഡ്രോപോണിക് രീതിയിൽ വളർത്തുന്നവയിൽ ഇത് 25% മുതൽ 35% വരെയായി ഉയരും.
രാസഘടകങ്ങളുടെ തീക്ഷ്ണമായ ഗന്ധമാണ് ഇതിന്റെ പ്രത്യേകത. ബെംഗളൂരു കേന്ദ്രീകരിച്ച് പ്രവർത്തിക്കുന്ന വൻകിട മയക്കുമരുന്ന് ശൃംഖലകളിലേക്കാണോ ഈ ലഹരി എത്തിച്ചതെന്ന് പോലീസ് അന്വേഷിച്ചുവരികയാണ്. ലഹരി കടത്തിന് പിന്നിൽ അന്താരാഷ്ട്ര തലത്തിലുള്ള സംഘങ്ങൾക്ക് പങ്കുണ്ടോയെന്നും പരിശോധിക്കുന്നുണ്ട്.
Story Summary: Customs officials at Bengaluru’s Kempegowda International Airport seized 3.66 kg of ‘Hydroponic Ganja’ worth ₹1.28 crore from a passenger arriving from Bangkok. The contraband, hidden inside the passenger’s check-in baggage, was recovered on Tuesday. Hydroponic cannabis is grown without soil and has a significantly higher potency, with THC levels reaching 25-35% compared to the usual 5-15%. The authorities are currently investigating the international links of this drug trafficking attempt.
