മുംബൈ: ദശലക്ഷക്കണക്കിന് ആരാധകരെ നിരാശയിലാഴ്ത്തി പ്രമുഖ പിന്നണി ഗായകൻ അർജിത് സിങ് സിനിമ സംഗീത ലോകത്തുനിന്നും വിരമിക്കൽ പ്രഖ്യാപിച്ചു. സിനിമകൾക്കായി ഇനി പുതിയ പാട്ടുകൾ പാടില്ലെന്ന് വ്യക്തമാക്കിയ താരം, നിലവിൽ ഏറ്റെടുത്ത കരാറുകൾ പൂർത്തിയാക്കിയ ശേഷം പിന്നണി ഗാനരംഗത്തുനിന്ന് പൂർണ്ണമായും പടിയിറങ്ങുമെന്ന് അറിയിച്ചു.(Arijit Singh’s retirement announcement shocks the music world)
ഇതൊരു അത്ഭുതകരമായ യാത്രയായിരുന്നുവെന്ന് അർജിത് സിങ് ഇൻസ്റ്റാഗ്രാമിൽ കുറിച്ചു. പിന്നണി ഗായകൻ എന്ന ലേബലിൽ നിന്ന് മാറി സ്വതന്ത്രമായി സംഗീതം സൃഷ്ടിക്കാനും ഒരു വിദ്യാർത്ഥിയായി സംഗീതത്തെ കൂടുതൽ പഠിക്കാനുമാണ് തന്റെ തീരുമാനമെന്ന് അദ്ദേഹം വ്യക്തമാക്കി.
“ദൈവം എന്നോട് അങ്ങേയറ്റം ദയ കാണിച്ചു. ഇനി മുതൽ പിന്നണി ഗായകനായി പുതിയ ജോലികൾ ഏറ്റെടുക്കില്ല. ഭാവിയിൽ ഒരു ചെറിയ കലാകാരനായി കൂടുതൽ പഠിക്കാനും സ്വന്തമായി കാര്യങ്ങൾ ചെയ്യാനും ആഗ്രഹിക്കുന്നു. എന്നാൽ ഞാൻ സംഗീതം ചെയ്യുന്നത് നിർത്തുന്നില്ല, സ്വതന്ത്രമായി സംഗീതം സൃഷ്ടിക്കുന്നത് തുടരും.” – അർജിത് സിങ്
നിലവിൽ പൂർത്തിയാക്കാനുള്ള ജോലികൾ ഈ വർഷം തന്നെ പുറത്തിറങ്ങുമെന്നും അതിനുശേഷം പുതിയ ചലച്ചിത്ര ഗാനങ്ങൾ ഉണ്ടാവില്ലെന്നും അദ്ദേഹം കൂട്ടിച്ചേർത്തു. ബോളിവുഡിൽ വികാരനിർഭരമായ ഗാനങ്ങളിലൂടെ ഒരു കാലഘട്ടത്തെ അടയാളപ്പെടുത്തിയ ഗായകനാണ് അർജിത് സിങ്.
‘ആഷിഖി 2’ലെ തും ഹി ഹോ, ‘ബ്രഹ്മാസ്ത്ര’യിലെ കേസരിയാ, ‘തമാശ’യിലെ അഗർ തും സാഥ് ഹോ, ‘കബീർ സിങ്ങി’ലെ ഗാനങ്ങൾ തുടങ്ങിയവ ലോകമെമ്പാടുമുള്ള സംഗീതപ്രേമികൾക്കിടയിൽ തരംഗമായിരുന്നു. മികച്ച ഗായകനുള്ള ദേശീയ പുരസ്കാരം രണ്ട് തവണ അദ്ദേഹം സ്വന്തമാക്കിയിട്ടുണ്ട്.
