മുംബൈ: മഹാരാഷ്ട്ര ഉപമുഖ്യമന്ത്രി അജിത് പവാർ ഉൾപ്പെടെ അഞ്ച് പേരുടെ മരണത്തിനിടയാക്കിയ ബാരാമതി വിമാനാപകടത്തിന്റെ അന്വേഷണം സംസ്ഥാന സർക്കാർ സിഐഡിക്ക് കൈമാറി. അപകടത്തിന്റെ കൃത്യമായ കാരണം കണ്ടെത്താൻ ബ്ലാക്ക് ബോക്സ് പരിശോധന ഉൾപ്പെടെയുള്ള ശാസ്ത്രീയ നടപടികൾ പുരോഗമിക്കുകയാണ്.(Ajit Pawar’s death, CID to investigate)
വിമാനത്തിലെ വോയ്സ് റെക്കോർഡർ പരിശോധിച്ചതിൽ നിന്നും അപകടത്തിന് തൊട്ടുമുമ്പുള്ള പൈലറ്റുമാരുടെ ആശയവിനിമയം ലഭ്യമായിട്ടുണ്ട്. നിയന്ത്രണം നഷ്ടപ്പെട്ട നിമിഷത്തിൽ സഹപൈലറ്റ് “ഓ ഷിറ്റ്” എന്ന് ഭീതിയോടെ വിളിച്ചുപറയുന്നത് റെക്കോർഡിംഗിലുണ്ട്. വിമാനം ലാൻഡ് ചെയ്യുന്നതിനിടെ ഉണ്ടായ അപ്രതീക്ഷിത സാങ്കേതിക തകരാറോ തടസ്സമോ ആകാം ഇത്തരമൊരു പ്രതികരണത്തിന് കാരണമെന്ന് കരുതപ്പെടുന്നു.
മോശം കാലാവസ്ഥയും കാഴ്ചാപരിധി കുറഞ്ഞതും അപകടത്തിന്റെ ആക്കം കൂട്ടി. എയർ സ്ട്രിപ്പുകളിലെ സുരക്ഷാ വീഴ്ച ദുരന്തത്തിന്റെ തീവ്രത വർദ്ധിപ്പിച്ചുവെന്നാണ് പ്രാഥമിക കണ്ടെത്തൽ. ബാരാമതിയിൽ സ്ഥിരമായ എയർ ട്രാഫിക് കൺട്രോൾ സംവിധാനം ഇല്ലാത്തത് പൈലറ്റുമാർക്ക് കൃത്യമായ നിർദ്ദേശങ്ങൾ ലഭിക്കുന്നതിന് തടസ്സമായി. അപകടമുണ്ടായ ഉടൻ തീയണയ്ക്കാനുള്ള മതിയായ സംവിധാനങ്ങൾ എയർ സ്ട്രിപ്പിൽ ഉണ്ടായിരുന്നില്ല.
ബാരാമതിക്ക് സമാനമായി ഇന്ത്യയിലുടനീളം 150-ഓളം എയർ സ്ട്രിപ്പുകൾ പ്രവർത്തിക്കുന്നുണ്ട്. ഇവയിൽ പലയിടത്തും മതിയായ സുരക്ഷാ സംവിധാനങ്ങളില്ലാത്തത് വ്യോമയാന വിദഗ്ധർ ചൂണ്ടിക്കാട്ടുന്നു. ഇത്തരം എയർ സ്ട്രിപ്പുകളിൽ അടിയന്തര സുരക്ഷാ പരിശോധന നടത്താൻ വ്യോമയാന മന്ത്രാലയം തയ്യാറാകണമെന്ന് ആവശ്യമുയർന്നിട്ടുണ്ട്.
ബുധനാഴ്ച രാവിലെ 8:50-ഓടെ ബാരാമതി എയർസ്ട്രിപ്പിൽ ലിയർജെറ്റ് 45 വിമാനം തകർന്നു വീണു. അജിത് പവാർ, പൈലറ്റുമാരായ സുമിത് കപൂർ, സാംബവി പഥക്, രണ്ട് സുരക്ഷാ ഉദ്യോഗസ്ഥർ. മുംബൈയിൽ നിന്ന് ജില്ലാ പരിഷത്ത് തിരഞ്ഞെടുപ്പ് പ്രചാരണത്തിനായി പോയതായിരുന്നു അദ്ദേഹം. റൺവേയിൽ നിന്ന് തെന്നിമാറിയ വിമാനം നിമിഷങ്ങൾക്കകം പൊട്ടിത്തെറിക്കുകയായിരുന്നു.
