ആഗ്ര: വിവാഹേതര ബന്ധത്തെത്തുടർന്നുള്ള തർക്കത്തിനൊടുവിൽ ഹോട്ടൽ മുറിയിൽ വെച്ച് കാമുകനെ യുവതി ക്രൂരമായി കൊലപ്പെടുത്തി (Agra Hotel Murder). ആഗ്രയിലെ ഇറ്റോറ മേഖലയിലുള്ള സ്വകാര്യ ഹോട്ടലിൽ ശനിയാഴ്ച ഉച്ചയോടെയാണ് സംഭവം. കൊല്ലപ്പെട്ടത് 36 വയസ്സുകാരനായ കിലോ (Khillo) എന്ന യുവാവാണ്. സംഭവത്തിൽ യുവാവിന്റെ അകന്ന ബന്ധുവും 29-കാരിയുമായ യുവതിയെ പോലീസ് അറസ്റ്റ് ചെയ്തു.
ശനിയാഴ്ച രാവിലെ 11 മണിയോടെയാണ് ഇരുവരും ഹോട്ടലിൽ മുറിയെടുത്തത്. ഉച്ചയ്ക്ക് 12.30-ഓടെ ഇവർ തമ്മിൽ രൂക്ഷമായ തർക്കമുണ്ടായി. തുടർന്ന് തന്റെ കൈവശം കരുതിയിരുന്ന ചുറ്റിക കൊണ്ട് യുവതി യുവാവിന്റെ തലയ്ക്കടിക്കുകയും, ബ്ലേഡ് ഉപയോഗിച്ച് കഴുത്തറുത്ത് മരണം ഉറപ്പാക്കുകയുമായിരുന്നു. കൊലപാതകത്തിന് ശേഷം ഹോട്ടൽ ജീവനക്കാരെ സമീപിച്ച് “ഞാൻ അയാളെ കൊന്നു” എന്ന് യുവതി വെളിപ്പെടുത്തിയത് ഏവരെയും ഞെട്ടിച്ചു.
രക്തത്തിൽ കുളിച്ച നിലയിലായിരുന്നു മൃതദേഹം പോലീസ് കണ്ടെടുത്തത്. ഭർതൃമതിയും ഒരു കുട്ടിയുടെ അമ്മയുമായ യുവതി, യുവാവുമായി ദീർഘകാലമായി പ്രണയത്തിലായിരുന്നു. എന്നാൽ തന്റെ സ്വകാര്യ ചിത്രങ്ങളും ദൃശ്യങ്ങളും കാണിച്ച് യുവാവ് തന്നെ നിരന്തരം ബ്ലാക്ക് മെയിൽ ചെയ്തിരുന്നതായും ഭർത്താവിനെ അറിയിക്കുമെന്ന് ഭീഷണിപ്പെടുത്തിയിരുന്നതായും യുവതി മൊഴി നൽകി. ഈ ഭീഷണിയിൽ നിന്നുള്ള മോചനത്തിനായാണ് കൊലപാതകം നടത്തിയതെന്ന് യുവതി പോലീസിനോട് പറഞ്ഞു.
യുവാവിന്റെ ഫോണിൽ ദൃശ്യങ്ങൾ ഉണ്ടെന്ന കരുതി കൊലപാതകത്തിന് ശേഷം യുവതി ഫോൺ തകർക്കുകയും ചെയ്തിരുന്നു. സംഭവസ്ഥലത്തുനിന്ന് ബ്ലേഡും ചുറ്റികയും പോലീസ് കണ്ടെടുത്തു. സംഭവത്തിൽ വിശദമായ അന്വേഷണം നടന്നുവരികയാണെന്ന് ഡി.സി.പി ആദിത്യ സിംഗ് അറിയിച്ചു.
Story Summary: A 29-year-old woman murdered her lover in an Agra hotel room using a hammer and a blade, allegedly to end his blackmail attempts. After the crime, she confessed to hotel staff, leading to her immediate arrest by the police.
