ന്യൂഡൽഹി: ആഗ്ര കനാലിൽ ചാടി ആത്മഹത്യ ചെയ്തെന്ന് കരുതിയ യുവാവിന്റെയും യുവതിയുടെയും മൃതദേഹങ്ങൾ കൈകൾ ഡാറ്റാ കേബിൾ ഉപയോഗിച്ച് കൂട്ടിക്കെട്ടിയ നിലയിൽ കണ്ടെത്തി. മുഖത്ത് ഗുരുതരമായ പരിക്കേറ്റ നിലയിലാണ് മൃതദേഹങ്ങൾ കണ്ടെടുത്തത്. സെക്ടർ 31 സ്വദേശി ആകാശ് എന്ന അക്കു (23), രശ്മി എന്ന രജനി (27) എന്നിവരാണ് മരിച്ചത്. ഞായറാഴ്ച വൈകുന്നേരത്തോടെ ഷാപൂർ കലന് സമീപമുള്ള ആഗ്ര കനാലിൽ നിന്നാണ് മൃതദേഹങ്ങൾ കണ്ടെടുത്തത്. ഇതോടെ സംഭവത്തിൽ വൻ ദുരൂഹത ആരോപിച്ച് പോലീസ് അന്വേഷണം വിപുലീകരിച്ചു.(Agra Canal Death Mystery Missing Man’s And Womans Bodies Recovered With Hands Tied)
ശനിയാഴ്ച ഉച്ചയ്ക്ക് രണ്ട് മണിയോടെയാണ് രശ്മി സ്വന്തം കാറിൽ ആകാശിനെ കാണാനായി വീട്ടിൽ നിന്നും ഇറങ്ങിയത്. വൈകിട്ട് 4.30-ഓടെ ബിപിടിപി പാലത്തിന് സമീപം ഒരു പുരുഷനും സ്ത്രീയും ആഗ്ര കനാലിലേക്ക് ചാടിയതായി പോലീസിന് വിവരം ലഭിക്കുകയായിരുന്നു. പോലീസ് സംഭവസ്ഥലത്ത് എത്തിയപ്പോൾ രശ്മിയുടെ കാർ ഉപേക്ഷിക്കപ്പെട്ട നിലയിൽ കണ്ടെത്തി. കാർ പരിശോധിച്ച പോലീസിന് രണ്ട് മൊബൈൽ ഫോണുകളും രക്തം പുരണ്ട ഒരു ചുറ്റികയും ലഭിച്ചു. തുടർന്ന് നടത്തിയ തിരച്ചിലിലാണ് പിറ്റേന്ന് മൃതദേഹങ്ങൾ കണ്ടെത്തിയത്.
രശ്മിയെ ആകാശ് നിരന്തരം ശല്യം ചെയ്തിരുന്നതായി കാണിച്ച് രശ്മിയുടെ ഭർത്താവ് ശിവം കുമാർ ശനിയാഴ്ച പോലീസിൽ പരാതി നൽകിയിരുന്നു. ജിമ്മിൽ വെച്ചുള്ള പരിചയം വെച്ച് ആകാശ് രശ്മിയെ ഫോണിലൂടെ ശല്യം ചെയ്യുകയായിരുന്നു എന്നാണ് പരാതി. എന്നാൽ ഇരുവരെയും ആസൂത്രിതമായി വിളിപ്പിച്ചു കൊലപ്പെടുത്തിയതാണെന്ന് ആകാശിന്റെ ബന്ധുക്കൾ ആരോപിക്കുന്നു. ഇരുവരും കനാലിൽ വീണു മരിച്ചതാണോ അതോ ചുറ്റിക കൊണ്ട് തലയ്ക്കടിച്ച് കൊലപ്പെടുത്തിയ ശേഷം കനാലിൽ തള്ളിയതാണോ എന്നാണ് പോലീസ് പരിശോധിക്കുന്നത്. മൃതദേഹങ്ങളുടെ കൈകൾ ഡാറ്റാ കേബിൾ ഉപയോഗിച്ച് കെട്ടിയിരുന്നതും മുഖത്തെ പരിക്കുകളും കൊലപാതക സാധ്യതയിലേക്കാണ് വിരൽ ചൂണ്ടുന്നത്.
Story Summary
The bodies of a 23-year-old man, Akash, and a 27-year-old woman, Rashmi, who were initially suspected to have jumped into the Agra Canal, were recovered with their hands tied using data cables and facial injuries. The discovery of a blood-stained hammer in the woman’s abandoned car has prompted the police to investigate the incident as a potential murder conspiracy.
