വയനാട് : ദുരന്തബാധിതർക്കായി കോൺഗ്രസ് നിർമ്മിച്ചു നൽകുന്ന വീടുകളുടെ തറക്കല്ലിടൽ ഈ മാസം 26-ന് ഉച്ചയ്ക്ക് 2.30-ന് നടക്കും. രാഹുൽ ഗാന്ധിയാണ് നിർമ്മാണോദ്ഘാടനം നിർവ്വഹിക്കുന്നത്. മേപ്പാടി പഞ്ചായത്തിലെ കുന്നംപറ്റയിലാണ് ആദ്യഘട്ടത്തിലെ 50 വീടുകൾ നിർമ്മിക്കുന്നത്.(Wayanad rehabilitation, Foundation stone laying of houses being built by Congress on 26th)
ഓരോ വീടും 1100 സ്ക്വയർ ഫീറ്റ് വിസ്തീർണ്ണത്തിലാണ് നിർമ്മിക്കുന്നത്. സാങ്കേതിക കാരണങ്ങൾ പറഞ്ഞ് സർക്കാർ പുനരധിവാസ പട്ടികയിൽ നിന്ന് ഒഴിവാക്കിയവർക്കായിരിക്കും കോൺഗ്രസ് വീടുകൾ നൽകുക. ദുരന്തത്തിൽ കച്ചവട സ്ഥാപനങ്ങൾ നഷ്ടപ്പെട്ടവർക്ക് 5 ലക്ഷം രൂപ വീതം ധനസഹായം നൽകുമെന്നും കെപിസിസി അറിയിച്ചു.
കുന്നംപറ്റയ്ക്ക് പുറമെ, ഏഴാം ചിറയിൽ അഞ്ചേക്കർ സ്ഥലം കൂടി കെപിസിസി കണ്ടെത്തിയിട്ടുണ്ട്. പദ്ധതി എത്രയും വേഗം പൂർത്തിയാക്കാനാണ് ലക്ഷ്യമിടുന്നതെന്ന് കെപിസിസി അധ്യക്ഷൻ സണ്ണി ജോസഫ് വ്യക്തമാക്കി. നിർമ്മാണം ആരംഭിച്ച് ആറുമാസത്തിനുള്ളിൽ തന്നെ 50 വീടുകളും പൂർത്തിയാക്കി കൈമാറാൻ കഴിയുമെന്നാണ് പ്രതീക്ഷിക്കുന്നത്.
