മലപ്പുറം: മലപ്പുറം വെള്ളിയാമ്പുറത്ത് ജനവാസ മേഖലകളിൽ വ്യാപക തെരുവുനായ ആക്രമണം. വഴിയാത്രക്കാരും കുട്ടികളുമടക്കം അഞ്ച് പേർക്കാണ് തെരുവുനായയുടെ കടിയേറ്റത് (Stray dog attack Malappuram Velliyampuram). വെള്ളിയാമ്പുറം അമ്പലപ്പടി, എസ്.എൻ. യു.പി സ്കൂൾ പരിസരം തുടങ്ങിയ ജനനിബിഡമായ പ്രദേശങ്ങളിലാണ് കഴിഞ്ഞ ദിവസം തെരുവുനായ ഭീകരാന്തരീക്ഷം സൃഷ്ടിച്ച് പരക്കെ ആക്രമണം നടത്തിയത്. നായയുടെ ആക്രമണത്തിൽ ഗുരുതരമായി പരിക്കേറ്റ ഒരാളെ വിദഗ്ദ്ധ ചികിത്സയ്ക്കായി കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
കടിയേറ്റ മറ്റ് നാല് പേരെ തിരൂരങ്ങാടി താലൂക്ക് ആശുപത്രിയിലും പ്രവേശിപ്പിച്ചിരിക്കുകയാണ്. നിലവിൽ ആശുപത്രിയിൽ കഴിയുന്ന ആരുടെയും പരിക്ക് ജീവന് ഭീഷണിയുള്ളതല്ലെന്നും എല്ലാവരുടെയും ആരോഗ്യനില തൃപ്തികരമാണെന്നും മെഡിക്കൽ അധികൃതർ അറിയിച്ചു. സ്കൂൾ പരിസരത്ത് വെച്ച് കുട്ടികൾക്കും നായയുടെ ആക്രമണമേറ്റത് പ്രദേശവാസികളിൽ വലിയ ഭീതി പരത്തിയിട്ടുണ്ട്.
കഴിഞ്ഞ കുറച്ചുദിവസങ്ങളായി പ്രദേശത്ത് തെരുവുനായ ശല്യം അതിരൂക്ഷമാണെന്നും, അധികൃതർ അടിയന്തരമായി ഇടപെട്ട് അക്രമാസക്തരായ നായകളെ പിടികൂടാൻ നടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.
Story Summary: Five people were injured in a stray dog attack at Velliyampuram, Malappuram. The incident occurred near Ambalappadi and the SN UP School premises. One of the injured was admitted to Kozhikode Medical College Hospital, while the other four are undergoing treatment at Tirurangadi Taluk Hospital. All are reported to be in stable condition.
