കൊച്ചി: ശബരിമല സ്വർണ്ണക്കവർച്ചാ കേസിലെ പ്രതി മുരാരി ബാബുവിനെ എൻഫോഴ്സ്മെന്റ് ഡയറക്ടറേറ്റ് ചോദ്യം ചെയ്തു (Sabarimala Gold Case). 90 ദിവസത്തെ ജയിൽവാസത്തിന് ശേഷം സ്വാഭാവിക ജാമ്യം നേടി പുറത്തിറങ്ങിയതിന് പിന്നാലെയാണ് കൊച്ചിയിലെ ഇഡി ഓഫീസിൽ ഇയാൾ ഹാജരായത്.
ശബരിമലയിലെ കട്ടിലപ്പാലി കേസിൽ ആറാം പ്രതിയും ദ്വാരപാലകപ്പാലി കേസിൽ രണ്ടാം പ്രതിയുമാണ് മുരാരി ബാബു. സ്വർണ്ണം പൂശിയ പാളികൾ കടത്തിക്കൊണ്ടുപോകാനുള്ള നീക്കങ്ങൾ തുടങ്ങിയത് ഇയാളാണെന്നാണ് അന്വേഷണ സംഘത്തിന്റെ കണ്ടെത്തൽ.
സ്വർണ്ണക്കവർച്ചയുമായി ബന്ധപ്പെട്ട കള്ളപ്പണ ഇടപാടുകളെക്കുറിച്ചും ഇതിൽ ഉന്നതർക്ക് പങ്കുണ്ടോ എന്നതിനെക്കുറിച്ചും ഇഡി വിവരങ്ങൾ തേടി. രാവിലെ ആരംഭിച്ച ചോദ്യം ചെയ്യൽ വൈകുന്നേരത്തോടെയാണ് അവസാനിച്ചത്. ആവശ്യപ്പെട്ടാൽ വീണ്ടും ഹാജരാകണമെന്ന വ്യവസ്ഥയിലാണ് ഇയാളെ വിട്ടയച്ചത്. ഇതിനായി പ്രത്യേക നോട്ടീസും നൽകിയിട്ടുണ്ട്.
ശബരിമലയിലെ സ്വർണ്ണ ഉരുപ്പടികളിലും നിർമ്മാണ പ്രവർത്തനങ്ങളിലും നടന്ന ക്രമക്കേടുകളെക്കുറിച്ചുള്ള അന്വേഷണത്തിൽ മുരാരി ബാബുവിന്റെ മൊഴി നിർണ്ണായകമാണ്. വരും ദിവസങ്ങളിൽ കൂടുതൽ പേരെ ഇഡി ചോദ്യം ചെയ്യാൻ വിളിച്ചേക്കുമെന്നാണ് സൂചന.
