തിരുവനന്തപുരം: കനത്ത മഴയെത്തുടർന്ന് പ്രമുഖ വിനോദസഞ്ചാര കേന്ദ്രമായ പൊന്മുടിയിൽ നാളെ (08/06/2026) മുതൽ സന്ദർശകർക്ക് കർശന പ്രവേശന വിലക്കേർപ്പെടുത്തി (Ponmudi travel ban). മലയോര മേഖലകളിൽ ശക്തമായ മഴ തുടരുന്ന സാഹചര്യത്തിൽ മണ്ണൊലിപ്പും മണ്ണിടിച്ചിൽ സാധ്യതയും മുൻകൂട്ടി കണ്ടാണ് അധികൃതരുടെ ഈ അടിയന്തിര നടപടി. തിരുവനന്തപുരം ഡിവിഷണൽ ഫോറസ്റ്റ് ഓഫീസറുടെ (DFO) പ്രത്യേക നിർദ്ദേശപ്രകാരമാണ് പൊന്മുടി എക്കോ ടൂറിസത്തിലേക്കുള്ള സന്ദർശകരുടെ പ്രവേശനം താൽക്കാലികമായി നിർത്തിവെച്ചത്.
കഴിഞ്ഞ കുറച്ചുദിവസങ്ങളായി ജില്ലയുടെ മലയോര മേഖലകളിൽ ഉടനീളം കനത്ത മഴയാണ് രേഖപ്പെടുത്തുന്നത്. പൊന്മുടിയിലേക്കുള്ള ചുരങ്ങളിലും റോഡുകളിലും മണ്ണിടിച്ചിൽ ഉണ്ടാകാനുള്ള സാധ്യതയേറിയ സാഹചര്യത്തിലാണ് സഞ്ചാരികളുടെ സുരക്ഷ മുൻനിർത്തി വനംവകുപ്പ് ഈ മുൻകരുതൽ എടുത്തത്. കാലാവസ്ഥ അനുകൂലമാവുകയും സുരക്ഷ ഉറപ്പാക്കുകയും ചെയ്ത ശേഷം ഇനിയൊരു അറിയിപ്പ് ഉണ്ടാകുന്നത് വരെ ഈ നിയന്ത്രണം തുടരുമെന്ന് ഡിഎഫ്ഒ വ്യക്തമാക്കി. അതുവരെ പൊതുജനങ്ങളും വിനോദസഞ്ചാരികളും പൊന്മുടി മേഖലയിലേക്കുള്ള യാത്രകൾ പൂർണ്ണമായും ഒഴിവാക്കണമെന്ന് വനംവകുപ്പ് അധികൃതർ അഭ്യർത്ഥിച്ചു.
Story Summary: Visitor entry to Ponmudi Eco-Tourism has been suspended starting tomorrow (June 8, 2026) until further notice due to heavy rains and potential risk of landslides. The temporary ban was issued based on directives from the Thiruvananthapuram Divisional Forest Officer to ensure safety.
