Follow on Google News
കോഴിക്കോട്: മൂഴിക്കലിൽ പതിനാറുകാരി നസ്രീന കൊല്ലപ്പെട്ട സംഭവത്തിൽ പ്രാഥമിക പോസ്റ്റ്മോർട്ടം റിപ്പോർട്ട് പുറത്തുവന്നു (Moozhikkal Case Post-mortem Report). നസ്രീനയെ കൊലപ്പെടുത്തിയത് തുണി കഴുത്തിൽ മുറുക്കിയാണെന്ന് റിപ്പോർട്ട് വ്യക്തമാക്കുന്നു. പ്രതിയായ അദ്നാന്റെ മരണം ശ്വാസംമുട്ടിയുള്ള ആത്മഹത്യയാണെന്നും പോസ്റ്റ്മോർട്ടം റിപ്പോർട്ടിൽ പറയുന്നു.
കഴുത്തിൽ തുണി മുറുക്കിയതിനെത്തുടർന്നുണ്ടായ ശ്വാസംമുട്ടലാണ് നസ്രീനയുടെ മരണകാരണം. മൂക്കിലും വായിലും സെല്ലോ ടേപ്പ് പലതവണ ചുറ്റി ശ്വാസം തടസ്സപ്പെടുത്തിയാണ് അദ്നാൻ ആത്മഹത്യ ചെയ്തത്. ശ്വാസകോശത്തിലേക്കുള്ള വായുസഞ്ചാരം പൂർണ്ണമായും നിലച്ചതാണ് മരണത്തിന് ഇടയാക്കിയത്.
ചൊവ്വാഴ്ച പുലർച്ചെ അഞ്ചരയോടെയാണ് കോഴിക്കോട് ചെലവൂരിനെ നടുക്കിയ ക്രൂരകൃത്യം നടന്നത്. വീട്ടുകാരുടെ ബഹളം കേട്ട് നാട്ടുകാർ ഓടിയെത്തുമ്പോൾ വീടിന്റെ മുകൾ നിലയിലെ കിടപ്പുമുറിയിൽ നസ്രീനയെ അബോധാവസ്ഥയിൽ കണ്ടെത്തുകയായിരുന്നു. ഈ സമയം പെൺകുട്ടിയുടെ മുത്തശ്ശിയെയും അദ്നാൻ ശ്വാസം മുട്ടിച്ച് കൊലപ്പെടുത്താൻ ശ്രമിച്ചു.
ഉടൻതന്നെ അദ്നാനെ മുറിയിൽ പൂട്ടിയിട്ട ശേഷം വീട്ടുകാർ നസ്രീനയുമായി ആശുപത്രിയിലേക്ക് തിരിച്ചു. എന്നാൽ ആശുപത്രിയിൽ എത്തുന്നതിന് മുൻപേ പെൺകുട്ടി മരണപ്പെട്ടിരുന്നു. തുടർന്ന് വീട്ടുകാർ തിരികെയെത്തി പൂട്ടിയിട്ട മുറി തുറന്നപ്പോഴാണ് മുഖത്ത് സെല്ലോ ടേപ്പ് ചുറ്റി മരിച്ച നിലയിൽ അദ്നാനെ കണ്ടെത്തിയത്.
ബന്ധുവായ അദ്നാൻ മുൻപ് നസ്രീനയുടെ വീട്ടിലായിരുന്നു താമസിച്ചിരുന്നത്. എന്നാൽ ഇയാളുടെ സ്വഭാവദൂഷ്യം പെൺകുട്ടി തിരിച്ചറിയുകയും വീട്ടുകാരെ അറിയിക്കുകയും ചെയ്തതോടെ അദ്നാനെ വീട്ടിൽ നിന്നും പുറത്താക്കിയിരുന്നു. ഇതിലുള്ള കടുത്ത പകയാണ് കൊലപാതകത്തിലേക്ക് നയിച്ചതെന്നാണ് പോലീസിന്റെ നിഗമനം. കള്ളത്താക്കോൽ ഉപയോഗിച്ച് രാത്രി വീട്ടിൽ കടന്നുകൂടിയ അദ്നാൻ പുലർച്ചെ വരെ ഒളിച്ചിരുന്ന ശേഷമാണ് അക്രമം നടത്തിയത്.
മൃതദേഹങ്ങൾ കോഴിക്കോട് മെഡിക്കൽ കോളേജ് ആശുപത്രിയിൽ പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുനൽകി.
Story Summary:
The post-mortem report of the Moozhikkal murder-suicide case confirms that 16-year-old Nasreen was strangled to death using a cloth. The accused, Adnan, committed suicide by wrapping cello tape multiple times around his nose and mouth, causing suffocation. The incident, fueled by a grudge after Adnan was evicted from the house due to behavioral issues, occurred early Tuesday morning in Kozhikode.
