കണ്ണൂർ: തലശ്ശേരി കൊളശ്ശേരിയിൽ വൻ ലഹരിവേട്ട. 4.19 ഗ്രാം എം.ഡി.എം.എ (MDMA) യുമായി മൂന്ന് യുവാക്കളെ പൊലീസ് അറസ്റ്റ് ചെയ്തു (Thalassery mdma arrest kolassery). പന്ന്യന്നൂർ സ്വദേശി മുഹമ്മദ് റഫ്നാസ്, പുന്നോൽ സ്വദേശി മുസ്തഫിൻ വി.പി, ചമ്പാട് സ്വദേശി മുഹമ്മദ് ഷദാബ് റോഷൻ എന്നിവരാണ് പോലീസിന്റെ പിടിയിലായത്.
കണ്ണൂർ സിറ്റി പൊലീസ് കമ്മിഷണറേറ്റിന് കീഴിലുള്ള ഡാൻസാഫ് (DANSAF) സംഘവും തലശ്ശേരി പൊലീസും സംയുക്തമായി നടപ്പിലാക്കുന്ന ‘ഓപ്പറേഷൻ തൂഫാൻ’ (Operation Toofan) പദ്ധതിയുടെ ഭാഗമായി നടത്തിയ വാഹന പരിശോധനയ്ക്കിടെയാണ് പ്രതികൾ വലയിലായത്.
പൊലീസ് സംഘത്തെ കണ്ടതോടെ അമിതവേഗത്തിൽ വാഹനം ഓടിച്ചു രക്ഷപ്പെടാൻ ശ്രമിച്ച സംഘത്തെ പിന്തുടർന്ന് സാഹസികമായി വളഞ്ഞുവെച്ചാണ് പൊലീസ് പിടികൂടിയത്. തുടർന്ന് നടത്തിയ വിശദമായ പരിശോധനയിൽ ഇവരുടെ പക്കൽ നിന്ന് 4.19 ഗ്രാം എം.ഡി.എം.എ കണ്ടെത്തുകയായിരുന്നു.
അറസ്റ്റിലായ മുഹമ്മദ് റഫ്നാസ് മുൻപും എം.ഡി.എം.എ കടത്തുമായി ബന്ധപ്പെട്ട കേസിൽ പ്രതിയായിട്ടുണ്ടെന്ന് പൊലീസ് അറിയിച്ചു. സംഭവത്തിൽ കേസ് രജിസ്റ്റർ ചെയ്ത പൊലീസ്, ഇവർക്ക് ലഹരിമരുന്ന് എത്തിച്ചുനൽകുന്ന പ്രധാന ശൃംഖലയെക്കുറിച്ചും സാമ്പത്തിക ഇടപാടുകളെക്കുറിച്ചും അന്വേഷണം വ്യാപിപ്പിച്ചു. രാത്രികാല വാഹന പരിശോധനകളും നിരീക്ഷണവും നഗരത്തിൽ കൂടുതൽ ശക്തമാക്കുമെന്ന് പൊലീസ് മുന്നറിയിപ്പ് നൽകി.
Story Summary: Thalassery police and the DANSAF team arrested three youths—Muhammed Rafnas, Musthafin V.P., and Muhammed Shadab Roshan—with 4.19 grams of MDMA during a vehicle check under ‘Operation Toofan’ at Kolassery in Kannur.
