തിരുവനന്തപുരം: കഠിനമായ ചൂടിൽ ഉരുകുന്ന കേരളത്തിന് ആശ്വാസമായി കാലാവസ്ഥാ വകുപ്പിന്റെ മഴ മുന്നറിയിപ്പ് (Kerala Rain Alert). പത്തനംതിട്ട, കോട്ടയം, ഇടുക്കി ജില്ലകളിൽ അടുത്ത മൂന്ന് മണിക്കൂറിനുള്ളിൽ ഒറ്റപ്പെട്ടയിടങ്ങളിൽ നേരിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
സംസ്ഥാനത്തെ വിവിധയിടങ്ങളിൽ ഇടിമിന്നലോടു കൂടിയ മഴയ്ക്ക് സാധ്യതയുണ്ട്. തിങ്കൾ മുതൽ ബുധൻ വരെ ഇടിമിന്നലിനൊപ്പം മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ടെന്ന് മുന്നറിയിപ്പുണ്ട്. മഴ പ്രവചനമുണ്ടെങ്കിലും സംസ്ഥാനത്തെ പകൽ താപനില റെക്കോർഡ് നിലവാരത്തിലാണ്. വെള്ളിയാഴ്ച പാലക്കാട് 40.2 ഡിഗ്രി സെൽഷ്യസും പുനലൂരിൽ 38.6 ഡിഗ്രിയും താപനില രേഖപ്പെടുത്തി. അസഹനീയമായ ചൂട് കാരണം പലയിടങ്ങളിലും ആളുകൾക്ക് സൂര്യതാപമേൽക്കുന്ന സാഹചര്യം നിലനിൽക്കുന്നുണ്ട്. മഴ ലഭിക്കുന്നതോടെ അന്തരീക്ഷ താപനിലയിൽ നേരിയ കുറവുണ്ടാകുമെന്നാണ് പ്രതീക്ഷിക്കുന്നത്.
അതേസമയം, ഇടിമിന്നൽ സാധ്യതയുള്ളതിനാൽ കാറ്റും മഴയും ഉള്ള സമയങ്ങളിൽ മരങ്ങൾക്കും വൈദ്യുത പോസ്റ്റുകൾക്കും താഴെ നിൽക്കരുതെന്ന് ദുരന്തനിവാരണ അതോറിറ്റി നിർദ്ദേശിച്ചു.
Story Summary: In a relief to the heatwave-stricken Kerala, the IMD has predicted light rain in Pathanamthitta, Kottayam, and Idukki districts in the coming hours. Thunderstorms with gusty winds (40-50 kmph) are expected from Monday to Wednesday across the state. Despite the rain forecast, temperatures remain high, with Palakkad recording 40.2°C on Friday.
