തിരുവനന്തപുരം: പ്രാദേശിക-സാമുദായിക സമവാക്യങ്ങളും യുവാക്കൾക്കും വനിതകൾക്കുമുള്ള പ്രാതിനിധ്യവും കൃത്യമായി തൂക്കിനോക്കിയാണ് നിയുക്ത മുഖ്യമന്ത്രി വി.ഡി. സതീശൻ തന്റെ 21 അംഗ മന്ത്രിസഭയെ പ്രഖ്യാപിച്ചിരിക്കുന്നത് (V D Satheesan cabinet analysis). തിങ്കളാഴ്ച അധികാരമേൽക്കുന്ന മന്ത്രിസഭയിൽ ഒട്ടേറെ പുതുമുഖങ്ങൾ ഇടംപിടിച്ചപ്പോൾ, അർഹതയുണ്ടായിട്ടും സാമുദായിക ബാലൻസിങ് മൂലം ഒട്ടേറെ പ്രമുഖർക്ക് കപ്പിനും ചുണ്ടിനുമിടയിൽ സ്ഥാനം നഷ്ടമായി. അർഹതപ്പെട്ട പലരെയും ഉൾപ്പെടുത്താൻ കഴിയാത്തതിൽ തനിക്ക് ദുഃഖമുണ്ടെന്ന് പട്ടിക പുറത്തുവിട്ടുകൊണ്ട് വി.ഡി. സതീശൻ തുറന്നുപറയുകയും ചെയ്തു.
കോഴിക്കോടിന് മന്ത്രിയില്ല; വയനാട്ടിൽ രാഹുൽ ഫാക്ടർ
ഇത്തവണത്തെ ഏറ്റവും വലിയ സവിശേഷത കോഴിക്കോട് ജില്ലയിൽ നിന്ന് കോൺഗ്രസിന് ഒരു മന്ത്രിപോലുമില്ല എന്നതാണ്. 20 വർഷത്തിന് ശേഷം ജില്ലയിലെ 13-ൽ 12 സീറ്റും ജയിച്ച് കോൺഗ്രസ് ചരിത്ര മുന്നേറ്റം നടത്തിയിട്ടും ഈ അവഗണന ശ്രദ്ധേയമാണ്. മുസ്ലിം ലീഗിൽ നിന്ന് രണ്ടര വർഷത്തിന് ശേഷം കോഴിക്കോട് സ്വദേശിയായ പാറയ്ക്കൽ അബ്ദുള്ള മന്ത്രിയാകുമെന്ന ഉറപ്പിലാണ് നിലവിൽ കോൺഗ്രസ് കോഴിക്കോടിനെ ഒഴിവാക്കിയത്.
വയനാട്ടിൽ നിന്ന് ടി. സിദ്ദിഖ് മന്ത്രിസഭയിലെത്തിയത് രാഹുൽ ഗാന്ധിയുടെ പ്രത്യേക താല്പര്യപ്രകാരമാണെന്നാണ് സൂചന. ഡിസിസി പ്രസിഡന്റ് എന്ന നിലയിലുള്ള മികവും സിദ്ദിഖിന് തുണയായി. ഇതോടെ ജില്ലയിൽ നിന്നുള്ള മറ്റൊരു പ്രമുഖനായ ഐ.സി. ബാലകൃഷ്ണൻ തഴയപ്പെട്ടെങ്കിലും, രണ്ടര വർഷത്തിന് ശേഷം കെ.എ. തുളസിക്ക് പകരം അദ്ദേഹത്തെ മന്ത്രിയാക്കുമെന്ന ടേം വ്യവസ്ഥയുണ്ട്.
വഴി അടഞ്ഞവരും പദവി മാറിയവരും
ടി. സിദ്ദിഖ് വന്നതോടെ മുതിർന്ന നേതാക്കളായ ഷാനിമോൾ ഉസ്മാൻ, അൻവർ സാദത്ത് എന്നിവരുടെ മന്ത്രിസ്ഥാനത്തിനുള്ള വഴി അടഞ്ഞു. സീനിയോറിറ്റി ഉണ്ടായിട്ടും സാമുദായിക സമവാക്യങ്ങളാണ് ഷാനിമോൾക്ക് തിരിച്ചടിയായത്; പകരം അവരെ ഡെപ്യൂട്ടി സ്പീക്കർ പദവിയിലേക്ക് മാറ്റി. മന്ത്രിയാകുമെന്ന് ഉറപ്പിച്ചിരുന്ന മുതിർന്ന നേതാവ് തിരുവഞ്ചൂർ രാധാകൃഷ്ണനെ സ്പീക്കർ പദവിയിലേക്കും നിയോഗിച്ചു.
ആദ്യഘട്ട ചർച്ചകളിൽ സജീവമായിരുന്ന ചാണ്ടി ഉമ്മൻ, എം. വിൻസെന്റ്, ടി.ജെ. വിനോദ് എന്നിവർക്കും സാമുദായിക ബാലൻസിങ് തിരിച്ചടിയായി. കൊല്ലത്തുനിന്ന് ആർഎസ്പിയിലെ ഷിബു ബേബി ജോൺ മന്ത്രിയായത് വിൻസെന്റിന്റെയും വിനോദിന്റെയും സാധ്യതകളെ ബാധിച്ചു. കൂടാതെ എൻ. ശക്തൻ, വി.ടി. ബൽറാം, കെ. ജയന്ത്, സേനാപതി വേണു എന്നിവരുടെ പേരുകളും അവസാന നിമിഷം വെട്ടിമാറ്റപ്പെട്ടു.
സർപ്രൈസ് എൻട്രിയും യുവരക്തങ്ങളും
യൂത്ത് കോൺഗ്രസ് സംസ്ഥാന അധ്യക്ഷൻ ഒ.ജെ. ജനീഷ് ആണ് സതീശൻ മന്ത്രിസഭയിലെ ഏറ്റവും വലിയ സർപ്രൈസ് എൻട്രി. അവസാന ഘട്ടത്തിലാണ് ജനീഷിന്റെ പേര് പട്ടികയിലേക്ക് ഉയർന്നുവന്നത്. പി.സി. വിഷ്ണുനാഥ്, എം. ലിജു, റോജി എം. ജോൺ എന്നിവരും യുവാക്കളുടെ പ്രാതിനിധ്യം ഉറപ്പിച്ചു. കൊല്ലത്തുനിന്ന് ബിന്ദു കൃഷ്ണയും പാലക്കാട്ടുനിന്ന് കെ.എ. തുളസിയും എത്തിയതോടെ കോൺഗ്രസിന് രണ്ട് വനിതാ മന്ത്രിമാരായി. മുതിർന്ന നേതാക്കളായ രമേശ് ചെന്നിത്തല, കെപിസിസി പ്രസിഡന്റ് സണ്ണി ജോസഫ്, കെ. മുരളീധരൻ എന്നിവരും മന്ത്രിസഭയ്ക്ക് കരുത്താകും.
ഘടകകക്ഷികളുടെ പങ്ക്
മുസ്ലിം ലീഗിൽ നിന്ന് പി.കെ. കുഞ്ഞാലിക്കുട്ടി, പി.കെ. ബഷീർ, എൻ. ഷംസുദ്ദീൻ, കെ.എം. ഷാജി, വി.ഇ. അബ്ദുൾ ഗഫൂർ എന്നിവരാണ് ആദ്യഘട്ട മന്ത്രിമാർ. കേരള കോൺഗ്രസിൽ നിന്ന് മോൻസ് ജോസഫും, സിഎംപിയിൽ നിന്ന് സി.പി. ജോണും, കേരള കോൺഗ്രസ് ജേക്കബ് വിഭാഗത്തിൽ നിന്ന് അനൂപ് ജേക്കബും (ടേം വ്യവസ്ഥയിൽ മാണി സി. കാപ്പനൊപ്പം) സതീശൻ സർക്കാരിന്റെ ഭാഗമാകും.
Story Summary: Designated CM V.D. Satheesan announced a 21-member UDF cabinet with a focus on youth, women, and regional balance. While surprises like Youth Congress chief O.J. Janeesh, T. Siddique, and P.C. Vishnunath made it to the list, prominent faces like Chandy Oommen, Shanimol Usman, and M. Vincent missed out due to complex communal and regional power-sharing equations.
