കായംകുളം: കായംകുളം എം.എസ്.എം കോളേജ് ഫിസിക്സ് വിഭാഗം മേധാവി പ്രൊഫ. കെ.എം. അനിൽകുമാറിന് നേരെ കൊലവിളി നടത്തിയ കെ.എസ്.യു ആലപ്പുഴ ജില്ലാ സെക്രട്ടറി മുഹമ്മദ് സുഹൈലിനെതിരെ പ്രതിഷേധം ശക്തമാകുന്നു (Alappuzha KSU Leader Muhammad Suhail). വാട്സാപ്പിലൂടെ അയച്ച ശബ്ദസന്ദേശത്തിലാണ് സുഹൈൽ അധ്യാപകനെതിരെ മാരകമായ ഭീഷണി മുഴക്കിയത്.
“നിന്റെ അന്ത്യം കണ്ടിട്ടേ എനിക്ക് ഉറക്കമുള്ളൂ, നിന്നെ ഞാൻ നശിപ്പിക്കും” എന്നായിരുന്നു സുഹൈലിന്റെ സന്ദേശത്തിന്റെ ഉള്ളടക്കം. തങ്ങൾ കോളേജിൽ വരുന്നത് തടയാൻ ആർക്കും കഴിയില്ലെന്നും സന്ദേശത്തിൽ പറയുന്നു. കോളേജ് തിരഞ്ഞെടുപ്പ് ഫലത്തിന് പിന്നാലെ ക്യാമ്പസിൽ അതിക്രമിച്ചു കടന്ന സുഹൈൽ, അറബിക് വിഭാഗം ഓഫീസിന്റെ വാതിലിൽ പതാകകൾ കെട്ടിയ ദൃശ്യങ്ങൾ നേരത്തെ പ്രചരിപ്പിച്ചിരുന്നു. ഇതിനെ ചോദ്യം ചെയ്തതാണ് വിരോധത്തിന് കാരണമെന്നാണ് സൂചന.
ഹാജർ കുറവായതിനെ തുടർന്ന് എം.എസ്.എം കോളേജിൽ നിന്നും മുൻപ് പുറത്താക്കപ്പെട്ട വിദ്യാർത്ഥിയാണ് മുഹമ്മദ് സുഹൈൽ. നിരവധി ക്രിമിനൽ കേസുകളിൽ പ്രതിയായ ഇയാൾ, പുറത്താക്കപ്പെട്ടതിലെ വൈരാഗ്യം തീർക്കാൻ അധ്യാപകനെ ലക്ഷ്യം വെക്കുകയാണെന്ന് കോളേജ് അധികൃതർ ആരോപിക്കുന്നു.
അധ്യാപകന് നേരെ നടന്ന ഈ അതിക്രമത്തിൽ അധ്യാപക സംഘടനകൾ ശക്തമായ പ്രതിഷേധം രേഖപ്പെടുത്തി. സംഭവത്തിൽ കോളേജ് അധികൃതർ നൽകിയ പരാതിയുടെ അടിസ്ഥാനത്തിൽ കായംകുളം പോലീസ് അന്വേഷണം ആരംഭിച്ചു. ക്യാമ്പസിനുള്ളിലെ രാഷ്ട്രീയ അരാജകത്വത്തിനെതിരെ കർശന നടപടി വേണമെന്നാണ് പൊതുവായ ആവശ്യം.
Story Summary: KSU Alappuzha District Secretary Muhammad Suhail issued a death threat via WhatsApp to Prof. K.M. Anilkumar, Head of the Physics Department at Kayamkulam MSM College. Suhail, a former student expelled for low attendance, allegedly threatened to “finish off” the professor following disputes related to recent college elections.
