കോഴിക്കോട്: വലിയ വിവാദമുണ്ടാക്കിയ ‘കാഫിർ’ സ്ക്രീൻഷോട്ട് കേസിൽ ജാമ്യം ലഭിച്ച് പുറത്തിറങ്ങിയ പ്രതി ജിതിൻ ഭാസ്കർ പരസ്യ വെല്ലുവിളിയുമായി രംഗത്ത്. താൻ ഇരുനൂറോളം പേർക്ക് ഈ സ്ക്രീൻഷോട്ട് വാട്സാപ്പ് ബ്രോഡ്കാസ്റ്റ് ലിസ്റ്റ് വഴി അയച്ചെന്ന പൊലീസിന്റെയും വാദികളുടെയും ആരോപണം തെളിയിക്കാൻ ഫേസ്ബുക്ക് കുറിപ്പിലൂടെ ജിതിൻ ആവശ്യപ്പെട്ടു.(Kafir Screenshot Case Accused Jithin Bhaskar Challenges Police On Facebook Post)
തന്റെ ബ്രോഡ്കാസ്റ്റ് ലിസ്റ്റിൽ കോൺഗ്രസ് പ്രവർത്തകരും അവരുടെ മക്കളും അടക്കം ഇരുന്നൂറ്റമ്പതോളം പേരുണ്ടെന്ന് ജിതിൻ വ്യക്തമാക്കി. അതിൽ വെറും പത്തുപേർക്കെങ്കിലും താൻ ഈ സ്ക്രീൻഷോട്ട് അയച്ചതായി കാണിച്ചുതരാൻ സാധിക്കുമോ എന്ന് ജിതിൻ ചോദിച്ചു. കേസ് കോടതിയുടെ പരിഗണനയിൽ ആയതിനാലും പാർട്ടി നേതൃത്വം വിലക്കിയതിനാലും പല കാര്യങ്ങളും ഇപ്പോൾ തുറന്നു പറയുന്നില്ല. എങ്കിലും, ബ്രോഡ്കാസ്റ്റ് വഴി താൻ ഇത് പ്രചരിപ്പിച്ചു എന്ന് തെളിയിക്കാൻ കഴിഞ്ഞാൽ കുറ്റം തന്റേതാണെന്ന് ഉറപ്പിക്കാമെന്നും ജിതിൻ ഫേസ്ബുക്കിൽ കുറിച്ചു.
ഭരണനേട്ടങ്ങളും പ്രതിപക്ഷത്തിന്റെ പൊള്ളത്തരങ്ങളും പങ്കുവെക്കാൻ കോൺഗ്രസുകാരായ സുഹൃത്തുക്കളും അയൽവാസികളും ഉൾപ്പെടുന്ന ബ്രോഡ്കാസ്റ്റ് ലിസ്റ്റ് താൻ ഉപയോഗിക്കാറുണ്ടെന്ന് ജിതിൻ പറയുന്നു. എന്നാൽ വിവാദ സ്ക്രീൻഷോട്ട് ഇതിലൂടെ അയച്ചിട്ടില്ലെന്നും, ഒപ്പമുള്ള കോൺഗ്രസ് സുഹൃത്തുക്കളുടെ കൈയിൽ നിന്നുപോലും അങ്ങനെയൊരു തെളിവ് ഹാജരാക്കാൻ ആരോപണം ഉന്നയിക്കുന്നവർക്ക് സാധിക്കില്ലെന്നും വ്യക്തമാക്കിയാണ് ജിതിൻ ഭാസ്കറിന്റെ ഫേസ്ബുക്ക് പോസ്റ്റ്.
Story Summary
Jithin Bhaskar, an accused released on bail in the Vadakara ‘Kafir’ screenshot case, has openly challenged the police and political rivals on Facebook. He dared them to prove that he sent the controversial screenshot via his broadcast list, noting that despite having around 250 contacts including Congress supporters, not even ten people received it from him.
