കൊച്ചി: കരുമാല്ലൂർ പുറപ്പിള്ളിക്കാവ് മുറിയാക്കൽ ഭാഗത്ത് പേവിഷബാധയേറ്റ് പോത്ത് ചത്തത് നാട്ടുകാരെ പരിഭ്രാന്തിയിലാഴ്ത്തി. ഇന്നലെ രാവിലെയാണ് പോത്ത് ചത്തത്. കുറുനരിയുടെ കടിയേറ്റതിനെത്തുടർന്നാണ് പേവിഷബാധ ഉണ്ടായതെന്നാണ് പ്രാഥമിക നിഗമനം.(Jackal attack, Buffalo dies of rabies)
റോഡിനോട് ചേർന്നുള്ള തരിശുപാടത്താണ് പോത്തിനെ മേയാൻ വിട്ടിരുന്നത്. ഞായറാഴ്ച വൈകുന്നേരം മുതൽ പോത്ത് അസാധാരണമായി പെരുമാറുകയും നിർത്താതെ കരയുകയും ചെയ്തിരുന്നു. ഇതോടെയാണ് പേവിഷബാധയുടെ ലക്ഷണമാണോ എന്ന സംശയം ഉയർന്നത്.
തിങ്കളാഴ്ച പുലർച്ചെയോടെ ആരോഗ്യനില വഷളായതിനെത്തുടർന്ന് മൃഗഡോക്ടറെ വിവരമറിയിച്ചെങ്കിലും പോത്ത് ചത്തു. പ്രദേശത്ത് കുറുനരികളുടെ സാന്നിധ്യം വർദ്ധിച്ചുവരുന്നതായാണ് നാട്ടുകാരുടെ പരാതി.
