കൊച്ചി: വായയിലെ കാൻസർ പ്രാരംഭ ഘട്ടത്തിൽ തന്നെ കണ്ടെത്തി രോഗികൾക്ക് അതിവേഗം വിദഗ്ധ ചികിത്സ ഉറപ്പാക്കുന്നതിനായി സംസ്ഥാനതലത്തിൽ വിപ്ലവകരമായ ആരോഗ്യ പദ്ധതിക്ക് തുടക്കമായി (CanWin oral cancer project Kerala). ‘ക്യാൻവിൻ’ (CanWin) എന്ന് പേരിട്ടിരിക്കുന്ന ഈ ബൃഹദ് പദ്ധതിക്ക് നേതൃത്വം നൽകുന്നത് ഇന്ത്യൻ ഡെന്റൽ അസോസിയേഷൻ (IDA) കേരള ഘടകമാണ്. വി.പി.എസ് ലേക്ഷോർ ആശുപത്രി, ചിറ്റിലപ്പള്ളി ഫൗണ്ടേഷൻ എന്നിവയുൾപ്പെടെയുള്ള പ്രമുഖ ആരോഗ്യ-ജീവകാരുണ്യ സ്ഥാപനങ്ങളുടെ പൂർണ്ണ പിന്തുണയോടെയാണ് പദ്ധതി നടപ്പാക്കുന്നത്.
ദേശീയ തലത്തിലെ കണക്കുകൾ പ്രകാരം ആകെയുള്ള കാൻസർ രോഗികളിൽ 30 ശതമാനവും വായിലെ കാൻസർ ബാധിതരാണ്. ഇതിൽ 70 ശതമാനത്തിലധികം കേസുകളും വളരെ വൈകിയാണ് കണ്ടെത്തുന്നത് എന്നത് പ്രതിരോധ രംഗത്ത് വലിയ വെല്ലുവിളിയായിരുന്നു. ഈ സാഹചര്യത്തിലാണ് രോഗം മുൻകൂട്ടി തിരിച്ചറിഞ്ഞ് അതിജീവന നിരക്ക് ഉയർത്താൻ പുതിയ പദ്ധതി ആവിഷ്കരിച്ചിരിക്കുന്നത്.
ഡെന്റൽ ക്ലിനിക്കുകൾ ഇനി നിരീക്ഷണ കേന്ദ്രങ്ങൾ; ലക്ഷ്യം 6500 സെന്ററുകൾ
ഓറൽ ലേഷൻ സർവൈലൻസ് പ്രോഗ്രാമിന്റെ (OLSP) ഭാഗമായി സംസ്ഥാനത്തെ ഡെന്റൽ ക്ലിനിക്കുകളെയാണ് കാൻസർ നിർണ്ണയത്തിനുള്ള പ്രധാന കേന്ദ്രങ്ങളാക്കി മാറ്റുന്നത്.
കേരളത്തിലെ ഏകദേശം 6,500 ഡെന്റൽ ക്ലിനിക്കുകളെ ‘ഏർളി കാൻസർ ഡിറ്റക്ഷൻ സെന്ററുകളാക്കി’ (Early Cancer Detection Centres) വികസിപ്പിക്കും. ഐ.ഡി.എയുടെ വിവിധ ശാഖകളിലൂടെ ദന്തഡോക്ടർമാർക്ക് പ്രത്യേക പരിശീലനം നൽകും. എ.ഒ.എം.എസ്.ഐ കേരള, കെ.എസ്.ഒ.എം.പി, എ.എസ്.എം.ഐ.കെ എന്നീ സംഘടനകളുടെ സഹകരണത്തോടെ ശക്തമായ സമൂഹതല നിരീക്ഷണ ശൃംഖല രൂപപ്പെടുത്തും.
ഡെന്റൽ ക്ലിനിക്കുകളിൽ എത്തുന്ന രോഗികളിൽ സംശയാസ്പദമായ മുറിവുകളോ മാറ്റങ്ങളോ കണ്ടാൽ ഉടൻ തന്നെ കൃത്യമായ വിവരങ്ങൾ രേഖപ്പെടുത്തി വിദഗ്ധ ആശുപത്രികളിലേക്ക് മാറ്റാനുള്ള (Referral System) ചിട്ടയായ സംവിധാനവും ഇതിലൂടെ ഒരുക്കും.
ഭൂരിഭാഗം രോഗികളും രോഗം ഗുരുതരാവസ്ഥയിലെത്തിയ ശേഷമാണ് ചികിത്സ തേടുന്നതെന്ന് ഐ.ഡി.എ കേരള സംസ്ഥാന പ്രസിഡന്റ് ഡോ. ഈപ്പൻ തോമസ് പറഞ്ഞു. രോഗികൾ പ്രാഥമികമായി അഭയം പ്രാപിക്കുന്ന ദന്താശുപത്രികളിൽ വെച്ച് തന്നെ രോഗലക്ഷണങ്ങൾ കണ്ടെത്തുകയാണ് ഇതിനുള്ള പരിഹാരമെന്ന് വി.പി.എസ് ലേക്ഷോർ ഹെഡ് ആൻഡ് നെക്ക് ഓങ്കോളജി വിഭാഗം മേധാവി ഡോ. മോനി എബ്രഹാം കുര്യാക്കോസ് വ്യക്തമാക്കി.
പതിവായുള്ള ദന്തപരിശോധനകളുടെ ഭാഗമായി കാൻസർ പരിശോധനയും മാറ്റുക വഴി രോഗനിർണ്ണയത്തിലെ കാലതാമസം ഒഴിവാക്കാൻ കഴിയുമെന്ന് കൺസൾട്ടന്റ് ഡോ. അശ്വിൻ മുള്ളത്ത് ചൂണ്ടിക്കാട്ടി. മികച്ച ചികിത്സാ ഫലങ്ങൾ നേടാൻ രോഗനിർണ്ണയം സമൂഹത്തോട് ചേർന്നുനിൽക്കുന്നതാകണമെന്ന് ലേക്ഷോർ മാനേജിംഗ് ഡയറക്ടർ എസ്.കെ. അബ്ദുള്ളയും അഭിപ്രായപ്പെട്ടു.
വിവിധ സ്ഥാപനങ്ങളുടെ സഹകരണത്തോടെയും ജീവകാരുണ്യ പിന്തുണയോടെയും ഏകദേശം 50 ലക്ഷം രൂപ ചെലവിലാണ് പദ്ധതി നടപ്പാക്കുന്നത്. കേവലം രോഗനിർണ്ണയത്തിൽ മാത്രം ഒതുങ്ങാതെ, ചികിത്സാ ചെലവ് വഹിക്കാൻ ബുദ്ധിമുട്ടുന്ന നിർദ്ധനരായ രോഗികൾക്ക് പദ്ധതിയിലൂടെ സമാഹരിക്കുന്ന പ്രത്യേക ഫണ്ടിൽ നിന്നുള്ള സാമ്പത്തിക സഹായവും ലഭ്യമാക്കുമെന്ന് അണിയറപ്രവർത്തകർ അറിയിച്ചു.
Story Summary: The Indian Dental Association (IDA) Kerala, in partnership with VPS Lakeshore and Chittilappilly Foundation, has launched ‘CanWin’, a state-level initiative for early detection of oral cancer. Under this project, around 6,500 dental clinics in Kerala will be upgraded to early cancer detection centres with systematic training and referral protocols.
