തൃശ്ശൂർ: ഇരിഞ്ഞാലക്കുട കോണത്തുകുന്നിൽ വിൽപനയ്ക്കു വച്ച ജീരകസോഡ കുപ്പിയിൽ ചത്ത പാമ്പിൻകുഞ്ഞിനെ കണ്ടെത്തി. മനയ്ക്കപ്പടിയിലെ തട്ടുകടയിൽ നിന്ന് സോഡ വാങ്ങിയ യുവാക്കളാണ് ഞെട്ടിക്കുന്ന കാഴ്ച കണ്ടത്.(Baby snake found dead in soda bottle, files complaint)
കോണത്തുകുന്ന് വള്ളിവട്ടത്ത് സോളാർ പാനൽ ജോലിക്കെത്തിയ ചെറായി സ്വദേശി വിഷ്ണുരാജ്, ആലുവ സ്വദേശി ഡിനൂസ് എന്നിവരാണ് കടയിൽ നിന്ന് സോഡ വാങ്ങിയത്. കുപ്പി തുറന്ന് കുടിക്കാൻ തുടങ്ങുന്നതിനിടെയാണ് ദ്രാവകത്തിന് മുകളിൽ എന്തോ തങ്ങിനിൽക്കുന്നത് ശ്രദ്ധയിൽപ്പെട്ടത്. സൂക്ഷ്മമായി പരിശോധിച്ചപ്പോഴാണ് അത് പാമ്പിൻകുഞ്ഞാണെന്ന് തിരിച്ചറിഞ്ഞത്.
യുവാക്കൾ കൊടുങ്ങല്ലൂർ ഫുഡ് സേഫ്റ്റി വിഭാഗത്തെ വിവരം അറിയിക്കുകയും കുപ്പിയുടെ വീഡിയോ ദൃശ്യങ്ങൾ കൈമാറുകയും ചെയ്തു. പരാതി ലഭിച്ച ഉടൻ തന്നെ ഫുഡ് സേഫ്റ്റി ഓഫീസറുടെ നേതൃത്വത്തിലുള്ള സംഘം സ്ഥലത്തെത്തി പരിശോധന നടത്തി.
