തിരുവനന്തപുരം: സണ്ണി ജോസഫ് കെ.പി.സി.സി അധ്യക്ഷ സ്ഥാനത്ത് തുടർന്നേക്കും. ഹൈക്കമാൻഡുമായി നടത്തിയ ചർച്ചകൾക്കൊടുവിലാണ് നേതൃമാറ്റം തൽക്കാലം വേണ്ടെന്ന തീരുമാനത്തിൽ എത്തിയത്. തിരഞ്ഞെടുപ്പ് പ്രവർത്തനങ്ങൾ ഏകോപിപ്പിക്കുന്നതിനൊപ്പം തന്നെ സ്ഥാനാർത്ഥിയായി മത്സരിക്കുന്നതിലും തനിക്ക് ബുദ്ധിമുട്ടില്ലെന്ന് സണ്ണി ജോസഫ് നേതൃത്വത്തെ അറിയിച്ചു.(Assembly elections, Sunny Joseph may continue as KPCC president)
രണ്ട് ദിവസമായി ഡൽഹിയിൽ നടന്ന കൂടിക്കാഴ്ചയിൽ പ്രധാന കാര്യങ്ങൾ ഉയർന്നുവന്നു. പേരാവൂർ മണ്ഡലത്തിൽ നിന്ന് സണ്ണി ജോസഫ് ജനവിധി തേടും. തിരഞ്ഞെടുപ്പ് സമയത്ത് അധ്യക്ഷനെ മാറ്റുന്നത് സംഘടനയുടെ കെട്ടുറപ്പിനെ ബാധിക്കുമെന്ന് ഹൈക്കമാൻഡ് വിലയിരുത്തി. പാർട്ടി അധികാരത്തിൽ വരികയും സർക്കാരിൽ തത്തുല്യമായ പദവികൾ ലഭിക്കുകയും ചെയ്യുന്ന ഘട്ടത്തിൽ മാത്രം അധ്യക്ഷ സ്ഥാനം ഒഴിഞ്ഞാൽ മതിയെന്നാണ് നിലവിലെ ധാരണ.
ബെന്നി ബെഹനാനെ താൽക്കാലിക അധ്യക്ഷനാക്കുന്ന കാര്യം നേരത്തെ സജീവമായി പരിഗണിച്ചിരുന്നു. നിയമസഭാ തിരഞ്ഞെടുപ്പിൽ പേരാവൂരിൽ മത്സരിക്കാനുള്ള സന്നദ്ധത സണ്ണി ജോസഫ് നേരത്തെ തന്നെ പാർട്ടിയെ അറിയിച്ചിരുന്നു. അധ്യക്ഷ പദവിയിലിരുന്ന് കൊണ്ട് തന്നെ മണ്ഡലത്തിലും സംസ്ഥാന തലത്തിലും സജീവമാകാൻ കഴിയുമെന്ന ആത്മവിശ്വാസത്തിലാണ് അദ്ദേഹം.
