കണ്ണൂർ: തിരഞ്ഞെടുപ്പ് ഫലം പുറത്തുവന്നതിന് പിന്നാലെ സിപിഎം നേതൃത്വത്തെ പ്രതിക്കൂട്ടിലാക്കുന്ന തരത്തിലുള്ള പോസ്റ്ററുകളും ഫ്ലക്സുകളുമാണ് കണ്ണൂരിൽ പ്രത്യക്ഷപ്പെടുന്നത്. പാർട്ടിയുടെ ശക്തികേന്ദ്രങ്ങളായ മട്ടന്നൂരിലും തളിപ്പറമ്പിലും അഴീക്കോടും നേതൃത്വത്തിനെതിരെ രൂക്ഷവിമർശനമാണ് ഉയരുന്നത്.(Kannur CPM Poster Protest Against Pinarayi Vijayan And MV Govindan)
രക്തസാക്ഷി ഫണ്ട് തട്ടിപ്പ് ആരോപണവിധേയനായ ടി.ഐ. മധുസൂദനനെ വീണ്ടും സ്ഥാനാർത്ഥിയാക്കിയത് അണികൾക്കിടയിൽ വലിയ പ്രതിഷേധത്തിന് കാരണമായി. പരാതി നൽകിയ വി. കുഞ്ഞികൃഷ്ണനെ അവഗണിച്ച് മധുസൂദനന് സീറ്റ് നൽകിയത് തിരിച്ചടിയായെന്ന് ഇവർ വിശ്വസിക്കുന്നു. എം.വി. ഗോവിന്ദന് പിന്നാലെ ഭാര്യ പി.കെ. ശ്യാമളയെ തളിപ്പറമ്പിൽ മത്സരിപ്പിച്ചത് പാർട്ടിയിൽ അതൃപ്തിയുണ്ടാക്കി. ടി.കെ. ഗോവിന്ദൻ ഉൾപ്പെടെയുള്ള മുതിർന്ന നേതാക്കൾ പാർട്ടി വിട്ടുപോയിട്ടും നേതൃത്വം തിരുത്താൻ തയ്യാറായില്ലെന്ന വിമർശനം ശക്തമാണ്.
ജനപ്രിയ നേതാവായ കെ.കെ. ശൈലജയെ മട്ടന്നൂരിൽ നിന്ന് മാറ്റി പേരാവൂരിലേക്ക് അയച്ചത് അവരെ ഒതുക്കാനുള്ള തന്ത്രമാണെന്ന വികാരം അണികൾക്കിടയിലുണ്ട്. അഴീക്കോട്ടെ പോസ്റ്ററുകളിൽ പി. ജയരാജൻ പാർട്ടിയെ നയിക്കണമെന്ന ആവശ്യം പരസ്യമായി ഉന്നയിച്ചിട്ടുണ്ട്. മുഖ്യമന്ത്രിയുടെ ചിത്രം ഉൾപ്പെടെയുള്ള ഫ്ലക്സുകൾ മട്ടന്നൂരിൽ ഉയർന്നു. പാർട്ടിക്ക് അവമതിപ്പുണ്ടാക്കുന്ന നേതാക്കൾ വേണ്ടെന്ന് എം.വി. ഗോവിന്ദന്റെ നാട്ടിൽ പതിച്ച പോസ്റ്ററുകൾ വ്യക്തമാക്കുന്നു. പാർട്ടി ഗ്രാമങ്ങളിൽ പോലും നേതൃത്വത്തിനെതിരെ ശബ്ദമുയരുന്നത് സി.പി.എമ്മിനെ സംബന്ധിച്ചിടത്തോളം വലിയ രാഷ്ട്രീയ പ്രതിസന്ധിയാണ് സൃഷ്ടിക്കുന്നത്.
Story Summary
Poster protests against CM Pinarayi Vijayan and State Secretary MV Govindan continue in Kannur following the CPM’s massive poll defeat. Party workers have voiced anger over issues like the Payyannur fund scam and the shifting of KK Shailaja, with many calling for P Jayarajan to take over the party leadership.
