കോട്ടയം: നിയമസഭാ തിരഞ്ഞെടുപ്പിൽ കോട്ടയം ജില്ലയിൽ ഇടതുമുന്നണിക്ക് ആറ് സീറ്റുകൾ വരെ ലഭിക്കുമെന്ന് സിപിഎം ജില്ലാ സെക്രട്ടേറിയറ്റിന്റെ വിലയിരുത്തൽ (CPM Kottayam Election Review 2026). നിലവിൽ എൽഡിഎഫിന്റെ കൈവശമുള്ള അഞ്ച് സീറ്റുകൾ നിലനിർത്തുന്നതിനൊപ്പം പാലാ മണ്ഡലം തിരിച്ചുപിടിക്കുമെന്നുമാണ് പാർട്ടിയുടെ അവലോകന റിപ്പോർട്ട് വ്യക്തമാക്കുന്നത്.
കേരള കോൺഗ്രസ് (എം) നേതാവ് ജോസ് കെ. മാണി 6,000 മുതൽ 8,000 വരെ വോട്ടുകളുടെ ഭൂരിപക്ഷത്തിൽ വിജയിക്കുമെന്ന് പാർട്ടി കണക്കാക്കുന്നു. ഷോൺ ജോർജ് സ്ഥാനാർത്ഥിയായെത്തിയതോടെ രൂപപ്പെട്ട ത്രികോണ മത്സരം ജോസ് കെ. മാണിക്ക് അനുകൂലമായെന്നാണ് ജില്ലാ നേതൃത്വത്തിന്റെ നിഗമനം.
പുതുപ്പള്ളിയിൽ യുഡിഎഫ് സ്ഥാനാർത്ഥി ചാണ്ടി ഉമ്മൻ വിജയിക്കുമെങ്കിലും ഭൂരിപക്ഷത്തിൽ വലിയ ഇടിവുണ്ടാകും. കഴിഞ്ഞ ഉപതിരഞ്ഞെടുപ്പിലെ 35,000-ത്തിന് മുകളിലുള്ള ഭൂരിപക്ഷം ഇത്തവണ 20,000-ത്തിന് താഴേക്ക് പോകുമെന്നാണ് സിപിഎം പറയുന്നത്. രാഷ്ട്രീയമായ പോരാട്ടം മണ്ഡലത്തിൽ നടന്നുവെന്നും അത് ഇടതുപക്ഷത്തിന് വോട്ട് വർദ്ധിപ്പിക്കാൻ സഹായിച്ചെന്നും പാർട്ടി കരുതുന്നു.
ഏറ്റുമാനൂരിൽ മന്ത്രി വി.എൻ. വാസവന്റെ വ്യക്തിപ്രഭാവവും ജനകീയതയും മണ്ഡലം നിലനിർത്താൻ സഹായിക്കും. യുഡിഎഫ് സ്ഥാനാർത്ഥി കോൺഗ്രസ് ചിഹ്നത്തിൽ മത്സരിച്ചത് വെല്ലുവിളിയാണെങ്കിലും വിജയം വാസവനൊപ്പമായിരിക്കുമെന്ന് പാർട്ടി ഉറച്ചു വിശ്വസിക്കുന്നു. വൈക്കം മണ്ഡലം എൽഡിഎഫ് നിലനിർത്തും. കൂടാതെ കടുത്തുരുത്തിയിൽ ഇത്തവണ അട്ടിമറി വിജയത്തിന് സാധ്യതയുണ്ടെന്നും സിപിഎം വിലയിരുത്തുന്നു.
കോട്ടയത്തെ രാഷ്ട്രീയ സമവാക്യങ്ങളിൽ കേരള കോൺഗ്രസ് (എം) ഘടകത്തിന്റെ സാന്നിധ്യം വലിയ മാറ്റങ്ങൾ ഉണ്ടാക്കിയിട്ടുണ്ടെന്നും, അത് ജില്ലയിലെ മൊത്തത്തിലുള്ള ഫലത്തെ സ്വാധീനിക്കുമെന്നും സി.പി.എം വിലയിരുത്തുന്നു. മെയ് നാലിന് വോട്ടെണ്ണുമ്പോൾ ഈ കണക്കുകൾ എത്രത്തോളം ശരിയാകുമെന്ന് വ്യക്തമാകും.
Story Summary:
The CPM District Secretariat in Kottayam has assessed that the LDF will win six seats in the district. The party expects Jose K. Mani to win the Pala constituency with a margin of 6,000–8,000 votes, benefiting from a three-way contest. In Puthuppally, the party predicts a significant drop in Chandy Oommen’s majority to below 20,000. The assessment also confirms confidence in Minister V.N. Vasavan’s victory in Ettumanoor and anticipates a potential upset in Kaduthuruthy.
