മുംബൈ: വാങ്കഡെ സ്റ്റേഡിയത്തിൽ നടന്ന ഐപിഎൽ 2026 പോരാട്ടത്തിൽ മുംബൈ ഇന്ത്യൻസിനെതിരെ ചെന്നൈ സൂപ്പർ കിംഗ്സ് താരം സഞ്ജു സാംസണ് സെഞ്ചുറി. ഐപിഎൽ ചരിത്രത്തിലെ സഞ്ജുവിന്റെ അഞ്ചാമത്തെ സെഞ്ചുറിയാണിത്. ഇന്നിംഗ്സിലെ അവസാന പന്തിൽ കൃഷ് ഭഗത്തിനെ ഫോറടിച്ചാണ് സഞ്ജു നൂറ് തികച്ചത്. ഈ സീസണിലെ സഞ്ജുവിന്റെ രണ്ടാം സെഞ്ചുറിയാണിത്.(Sanju Samson completed his century on the last ball of the innings with a four )
മുംബൈ ഇന്ത്യൻസിനെതിരെ ഒരു സിഎസ്കെ താരം നേടുന്ന ആദ്യ സെഞ്ചുറി എന്ന നേട്ടവും ഇതോടെ സഞ്ജു സ്വന്തമാക്കി. ഈ പ്രകടനത്തോടെ ഇന്ത്യക്കാർക്കിടയിൽ ഏറ്റവും കൂടുതൽ ടി20 സെഞ്ചുറികൾ നേടിയവരുടെ പട്ടികയിൽ രോഹിത് ശർമ്മയ്ക്കൊപ്പം രണ്ടാം സ്ഥാനത്തെത്താനും സഞ്ജുവിനായി.
കൂടുതൽ ടി20 സെഞ്ചുറികൾ നേടിയ ഇന്ത്യൻ താരങ്ങൾ:
9 – വിരാട് കോഹ്ലി
9 – അഭിഷേക് ശർമ്മ
8 – രോഹിത് ശർമ്മ
8 – സഞ്ജു സാംസൺ*
കൂടുതൽ ഐപിഎൽ സെഞ്ചുറികൾ:
8 – വിരാട് കോഹ്ലി
7 – ജോസ് ബട്ട്ലർ
6 – ക്രിസ് ഗെയ്ൽ
5 – കെ.എൽ രാഹുൽ
5 – സഞ്ജു സാംസൺ*
സഞ്ജുവിന്റെ പുറത്താകാതെയുള്ള 101 റൺസ് മികവിൽ അഞ്ച് തവണ ചാമ്പ്യന്മാരായ ചെന്നൈ സൂപ്പർ കിംഗ്സ് മുംബൈയ്ക്കെതിരെ 207/6 എന്ന കൂറ്റൻ സ്കോർ പടുത്തുയർത്തി. സിഎസ്കെ ഓപ്പണറും വിക്കറ്റ് കീപ്പറുമായ സഞ്ജു, ഒരു വശത്ത് വിക്കറ്റുകൾ വീഴുമ്പോഴും ഒരറ്റം കാത്ത് ടീമിനെ മുന്നോട്ട് നയിച്ചു. 54 പന്തുകൾ നേരിട്ട താരം 10 ഫോറുകളും 6 സിക്സറുകളും പറത്തി. സിഎസ്കെ ജേഴ്സിയിൽ സഞ്ജു നേടുന്ന രണ്ടാമത്തെ സെഞ്ചുറിയാണിത്. മുംബൈ ഇന്ത്യൻസിനായി ഗസൻഫർ, അശ്വനി കുമാർ എന്നിവർ രണ്ട് വിക്കറ്റ് വീതം വീഴ്ത്തി. ജസ്പ്രീത് ബുംറ നാല് ഓവറിൽ 31 റൺസ് വഴങ്ങി ഒരു വിക്കറ്റ് നേടി.
