ന്യൂഡൽഹി: ജൂൺ 11-ന് അമേരിക്ക, കാനഡ, മെക്സിക്കോ എന്നീ രാജ്യങ്ങളുടെ ആതിഥേയത്വത്തിൽ ആരംഭിക്കുന്ന ഫിഫ ലോകകപ്പ് 2026-ന്റെ തത്സമയ സംപ്രേക്ഷണത്തിനുള്ള പരസ്യ നിരക്കുകൾ പ്രഖ്യാപിച്ച് ഔദ്യോഗിക ബ്രോഡ്കാസ്റ്റർമാരായ സി എന്റർടൈൻമെന്റ് (Zee FIFA Ad Rates). ഇൻഡസ്ട്രി വൃത്തങ്ങളിൽ നിന്നുള്ള വിവരങ്ങൾ പ്രകാരം, മത്സരങ്ങൾക്കിടയിലെ 10 സെക്കൻഡ് ദൈർഘ്യമുള്ള ഒരു സാധാരണ പരസ്യ സ്പോട്ടിന് 2.25 ലക്ഷം രൂപ മുതൽ 2.75 ലക്ഷം രൂപ വരെയാണ് സി ഈടാക്കാൻ ഉദ്ദേശിക്കുന്നത്. അടുത്തിടെയാണ് ഫിഫയുമായി എട്ട് വർഷത്തെ തന്ത്രപ്രധാനമായ കരാർ ഒപ്പിട്ടുകൊണ്ട് ലോകകപ്പിന്റെ ഇന്ത്യൻ ഉപഭൂഖണ്ഡത്തിലെ മാധ്യമ അവകാശങ്ങൾ സി സ്വന്തമാക്കിയത്.
ഇന്ത്യൻ വിപണിയിൽ പുതുതായി അവതരിപ്പിച്ച ‘യുണൈറ്റ്8 സ്പോർട്സ്’ലീനിയർ ടെലിവിഷൻ ചാനലുകളിലൂടെയും ഒടിടി പ്ലാറ്റ്ഫോമായ സി5 വഴിയുമായിരിക്കും ലോകകപ്പ് മത്സരങ്ങൾ തത്സമയം സംപ്രേക്ഷണം ചെയ്യുക. ടെലിവിഷനിലെ പരസ്യങ്ങൾക്ക് പുറമെ കണക്റ്റഡ് ടിവി ഇംപ്രഷനുകൾ, ഓൺ-സ്ക്രീൻ ഗ്രാഫിക്സ് പ്ലേസ്മെന്റുകൾ, ലോഗോ ബഗുകൾ തുടങ്ങിയ വിപുലമായ ഡിജിറ്റൽ ബ്രാൻഡിംഗ് പാക്കേജുകളും സി പരസ്യദാതാക്കൾക്കായി ഒരുക്കുന്നുണ്ട്. മത്സരത്തിന് മുൻപുള്ള പ്രീ-മാച്ച് ഷോയിൽ 5-6 മിനിറ്റും, പകുതി സമയത്തെ ഇടവേളയിൽ 9-12 മിനിറ്റും, മത്സരശേഷമുള്ള പോസ്റ്റ്-മാച്ച് ഷോയിൽ 6-8 മിനിറ്റും പരസ്യങ്ങൾക്കായി നീക്കിവെക്കുമെന്നാണ് റിപ്പോർട്ട്. ഇന്ത്യക്ക് പുറമെ ബംഗ്ലാദേശ്, പാകിസ്താൻ, ശ്രീലങ്ക, നേപ്പാൾ അടക്കമുള്ള അയൽരാജ്യങ്ങളിലെ സംപ്രേക്ഷണ അവകാശവും സിക്ക് തന്നെയാണ്.
കേരളം, പശ്ചിമ ബംഗാൾ തുടങ്ങിയ ഫുട്ബോളിന് കടുത്ത ആരാധകരുള്ള മേഖലകളെ ലക്ഷ്യമിട്ട് സി5 പ്ലാറ്റ്ഫോമിലും ടെലിവിഷനിലും മലയാളം, ബംഗാളി ഭാഷകളിലുള്ള പ്രത്യേക കമന്ററി ഫീഡുകളും ലഭ്യമാക്കും. യുഎസ് സമയക്രമം അനുസരിച്ച് മത്സരങ്ങൾ ഇന്ത്യയിൽ അർദ്ധരാത്രിയിലും പുലർച്ചെയുമായിട്ടാണ് സംപ്രേക്ഷണം ചെയ്യുക എന്നതിനാൽ, പരസ്യദാതാക്കളെ ആകർഷിക്കാൻ ഡിജിറ്റൽ പ്ലാറ്റ്ഫോമുകളിലെ റീച്ച് പരമാവധി പ്രയോജനപ്പെടുത്താനാണ് അണിയറപ്രവർത്തകരുടെ നീക്കം.
Summary: Zee Entertainment has officially rolled out its advertisement inventory pricing for the upcoming FIFA World Cup 2026, pitching 10-second commercial spots between ₹2.25 lakh and ₹2.75 lakh. Following its last-minute strategic media rights acquisition from FIFA running through 2034, ZEE is set to broadcast the tournament across its newly launched ‘Unite8 Sports’ television network and stream live via ZEE5.
