കാൻസാസ് സിറ്റി: ഫിഫ ലോകകപ്പ് ഗ്രൂപ്പ് എഫിലെ അവസാന പോരാട്ടത്തിൽ ടുണീഷ്യയെ ഒന്നിനെതിരെ മൂന്ന് ഗോളുകൾക്ക് പരാജയപ്പെടുത്തി നെതർലൻഡ്സ്. മികച്ച പ്രകടനത്തോടെ ഗ്രൂപ്പ് ചാംപ്യന്മാരായാണ് ‘ഓറഞ്ച് പട’ നോക്കൗട്ട് ഘട്ടത്തിലേക്ക് പ്രവേശിച്ചത്. തുടർച്ചയായ മൂന്ന് തോൽവികളോടെ ടുണീഷ്യ ലോകകപ്പിൽ നിന്ന് പുറത്തായി.(Netherlands Beats Tunisia To Top Group F And Enter Knockout Stage)
മത്സരം തുടങ്ങിയ ഉടനെ തന്നെ ഡച്ച് പട ആക്രമണം അഴിച്ചുവിട്ടു. മൂന്നാം മിനിറ്റിൽ ടുണീഷ്യൻ ക്യാപ്റ്റൻ ഏലീയാസ് സ്ഖീരിയുടെ വക ഒരു സെൽഫ് ഗോളിലൂടെ നെതർലൻഡ്സ് അക്കൗണ്ട് തുറന്നു. ആ ഞെട്ടലിൽ നിന്ന് മുക്തരാകും മുൻപേ ഏഴാം മിനിറ്റിൽ നെതർലൻഡ്സ് ലീഡ് ഉയർത്തി. ക്യാപ്റ്റൻ വിർജിൽ വാൻഡെയ്ക്കിന്റെ കൃത്യമായ ഹെഡർ പാസ് സ്വീകരിച്ച ബ്രിയാൻ ബ്രോബി, ബോക്സിനുള്ളിൽ നിന്ന് തകർപ്പൻ ഷോട്ടിലൂടെ പന്ത് വലയിലെത്തിച്ചു.
രണ്ടാം പകുതിയിൽ തിരിച്ചുവരാൻ ലക്ഷ്യമിട്ട ടുണീഷ്യ 54-ാം മിനിറ്റിൽ ഒരു ഗോൾ മടക്കി. ഹാനിബാൾ മെജ്ബ്രി എടുത്ത കോർണർ കിക്കിൽ നിന്ന് മികച്ച ഹെഡറിലൂടെ ഹസിം മസ്തൂരിയാണ് ടുണീഷ്യയുടെ ആശ്വാസ ഗോൾ നേടിയത്. എന്നാൽ ടുണീഷ്യയുടെ ആഹ്ലാദത്തിന് എട്ടു മിനിറ്റിന്റെ ആയുസ്സ് മാത്രമേ ഉണ്ടായിരുന്നുള്ളൂ. 62-ാം മിനിറ്റിൽ ടിയാനി റെയ്ൻഡേളഴ്സ് നൽകിയ ക്രോസ് ഹെഡറിലൂടെ വലയിലാക്കി യാൻ പോൾ വാൻ ഹെക്ക് നെതർലൻഡ്സിന്റെ ജയം പൂർത്തിയാക്കി. രണ്ട് ജയവും ഒരു സമനിലയുമായി മികച്ച ഫോമിലാണ് നെതർലൻഡ്സ് നോക്കൗട്ടിലേക്ക് കടക്കുന്നത്.
Story Summary
Netherlands secured their place in the World Cup knockout stage as Group F winners after a commanding 3-1 victory over Tunisia. An early own goal followed by strikes from Brian Brobbey and Jan Paul van Hecke ensured the Dutch victory, while Tunisia exited the tournament after failing to register a single point.
