കൊച്ചി: മലയാളികൾക്ക് ഏറെ പ്രിയങ്കരിയായ ഗായികയും നടിയുമാണ് അഞ്ജു ജോസഫ്. ‘ഡോക്ടർ ലവ്’ എന്ന ചിത്രത്തിലൂടെ പിന്നണി ഗാനരംഗത്ത് അരങ്ങേറ്റം കുറിച്ച താരം ‘അർച്ചന നോട്ടൗട്ട്’ എന്ന ചിത്രത്തിലൂടെ അഭിനയത്തിലും തന്റെ സാന്നിധ്യം അറിയിച്ചിട്ടുണ്ട് (Singer Anju Joseph interview Dhanya Varma). സ്റ്റേജ് ഷോകളിലും സോഷ്യൽ മീഡിയയിലും ഏറെ സജീവമായ അഞ്ജു, ഇപ്പോഴിതാ തന്റെ ജീവിതത്തിലുണ്ടായ കയ്പ്പേറിയതും നടുക്കുന്നതുമായ ഒരു അനുഭവം തുറന്നുപറഞ്ഞിരിക്കുകയാണ്. ഒരു വാഹനാപകടത്തെത്തുടർന്നുണ്ടായ തർക്കത്തിനിടെ റോഡിൽ വെച്ച് ഒരു സ്ത്രീ തന്റെ മുഖത്തടിച്ച സംഭവമാണ് ധന്യ വർമ്മയ്ക്ക് നൽകിയ അഭിമുഖത്തിൽ താരം വെളിപ്പെടുത്തിയത്.
അഞ്ജു ജോസഫിന്റെ വാക്കുകൾ ഇങ്ങനെയായിരുന്നു: “കാക്കനാടുവെച്ച് ഞാൻ ഓടിച്ച കാർ ഒരു സ്കൂട്ടറിൽ തട്ടി. വളരെ ചെറിയൊരു അപകടമായിരുന്നു അത്. അവർ സ്കൂട്ടറിൽ നിന്ന് താഴെ വീഴുകയൊന്നും ചെയ്തില്ല, ചെറുതായൊന്ന് മുന്നോട്ട് ആഞ്ഞു എന്ന് മാത്രം. ഞാൻ ആ സമയത്ത് എന്റെ തെറാപ്പിസ്റ്റിന്റെ അടുത്തുനിന്ന് കരഞ്ഞുകൊണ്ട് ഇറങ്ങിവരികയായിരുന്നു. കടുത്ത മാനസിക വിഷമത്തോടെയുള്ള ആ വരവിനിടെയാണ് അപകടം സംഭവിക്കുന്നത്. ഞാൻ ഉടൻ തന്നെ കാറിൽ നിന്ന് ഇറങ്ങി അവരോട് ക്ഷമ ചോദിച്ചു, എന്റെ ഭാഗത്തുനിന്ന് ശ്രദ്ധക്കുറവുണ്ടായെന്ന് തുറന്നുപറഞ്ഞു. എന്നാൽ, പെട്ടെന്ന് പുള്ളിക്കാരി മുന്നോട്ട് വന്ന് എന്റെ മുഖത്ത് ഒറ്റയടി തന്നു. ഞാൻ മാനസികമായി മൊത്തത്തിൽ തകർന്നുനിൽക്കുന്ന സമയമായിരുന്നു അത്. അഞ്ച് മണിക്കൂറോളം തെറാപ്പിസ്റ്റിന്റെ അടുത്തിരുന്ന് കരഞ്ഞിട്ട്, എന്തെങ്കിലും കഴിക്കാമെന്ന ചിന്തയിൽ പോകുമ്പോഴാണ് ഇത് സംഭവിക്കുന്നത്.
എന്നെയടിച്ചുകഴിഞ്ഞപ്പോൾ പുള്ളിക്കാരിക്കും എന്തോ ഒരു ഞെട്ടലായിപ്പോയി. അപ്പോഴേക്കും അവിടെ ആളുകൾ കൂടാൻ തുടങ്ങി. കൂടിനിന്നവരാരും വണ്ടി തട്ടിയതിന് എന്നെ കുറ്റം പറഞ്ഞില്ല, പകരം എന്നെ അടിച്ച സ്ത്രീക്കെതിരെ തിരിഞ്ഞു. ‘നിങ്ങളാരാണ് ഇവരെ കൈവെക്കാൻ’ എന്ന് ചോദിച്ച് നാട്ടുകാർ ബഹളം വെച്ചതോടെ അവർ പെട്ടെന്ന് വണ്ടിയെടുത്ത് അവിടെനിന്ന് പോയി. ആ വണ്ടിയുടെ നമ്പറോ ആ സ്ത്രീയുടെ മുഖമോ ഒന്നും എനിക്ക് ഓർമ്മയില്ലായിരുന്നു. ഞാൻ അത്രമാത്രം തളർന്നുപോയിരുന്നു. എന്നാൽ അവിടെയുണ്ടായിരുന്ന ചേട്ടന്മാർ എനിക്ക് ജ്യൂസ് ഒക്കെ വാങ്ങിത്തന്നു, വണ്ടിയോടിച്ച് എന്നെ വീട്ടിൽ എത്തിച്ചുതരാമെന്ന് വരെ പറഞ്ഞു. എന്റെ ജീവിതത്തിൽ ഇത്തരം മോശം അവസ്ഥകളിലൂടെയൊക്കെ ഞാൻ കടന്നുപോയിട്ടുണ്ട്,” അഞ്ജു ജോസഫ് പറഞ്ഞു. താരത്തിന്റെ ഈ തുറന്നുപറച്ചിൽ ഇപ്പോൾ സോഷ്യൽ മീഡിയയിൽ വലിയ രീതിയിൽ ചർച്ചയായിരിക്കുകയാണ്.
Story Summary: Popular Malayalam playback singer and actress Anju Joseph shared a bitter past experience during an interview with Dhanya Varma. Anju revealed that following a minor car accident in Kakkanad, a female scooterist unexpectedly slapped her across the face. The singer noted that she was already emotionally vulnerable, returning from a 5-hour therapy session. However, the local bystanders supported Anju and questioned the woman’s aggressive behavior before she fled the scene.
