കൊച്ചി: തമിഴകത്തിലൂടെ കരിയർ ആരംഭിച്ച്, ലിജോ ജോസ് പെല്ലിശ്ശേരി ചിത്രം ‘നൻപകൽ നേരത്ത് മയക്കത്തിലൂടെ’ മലയാളികൾക്കും പ്രിയങ്കരിയായി മാറിയ നടിയാണ് രമ്യ പാണ്ഡ്യൻ (Ramya Pandian interview). മമ്മൂട്ടി നായകനായ ഈ ചിത്രത്തിലേക്ക് താൻ തിരഞ്ഞെടുക്കപ്പെട്ടതിന് പിന്നിലെ രസകരമായ അനുഭവങ്ങൾ പങ്കുവെച്ചിരിക്കുകയാണ് താരം ഇപ്പോൾ. തനിക്ക് ഈ വലിയ അവസരം ലഭിക്കാൻ കാരണമായത് ബിഗ് ബോസ് റിയാലിറ്റി ഷോയാണെന്നും അതിന് പിന്നിൽ മെഗാസ്റ്റാർ മമ്മൂട്ടിയുടെ ഇടപെടലുകളുണ്ടായിരുന്നുവെന്നും രമ്യ വെളിപ്പെടുത്തി. ഒരു പ്രമുഖ യൂട്യൂബ് ചാനലിന് നൽകിയ അഭിമുഖത്തിലാണ് താരം മനസ്സ് തുറന്നത്.
തന്റെ അഭിനയജീവിതത്തിൽ വഴിത്തിരിവായ ‘ജോക്കർ’ എന്ന തമിഴ് സിനിമ കണ്ട നാൾ മുതൽ മമ്മൂട്ടിക്ക് തന്റെ അഭിനയം ഇഷ്ടപ്പെട്ടിരുന്നുവെന്ന് രമ്യ പറയുന്നു. “മമ്മൂട്ടി സാർ എന്നെ ആദ്യമായി കണ്ടപ്പോൾ പറഞ്ഞത്, ‘ജോക്കർ’ സിനിമ കണ്ടിരുന്നുവെന്നും എന്റെ പ്രകടനം വളരെ നന്നായിരുന്നുവെന്നുമാണ്. ആ സിനിമ കണ്ടയുടൻ അദ്ദേഹത്തിന്റെ അടുത്ത ചിത്രത്തിൽ എന്നെ നായികയാക്കാൻ നിർദേശിച്ചിരുന്നു. എന്നാൽ ചില ആശയക്കുഴപ്പങ്ങൾ കാരണം ‘ജോക്കറി’ൽ അഭിനയിച്ച മറ്റൊരു മലയാളി നടിയെയാണ് അവർ കാസ്റ്റ് ചെയ്തത്. ‘മമ്മൂട്ടി സാർ ഒരു മുത്താണ്’, അവർ വന്ന സ്ഥിതിക്ക് അവർ തന്നെ അഭിനയിക്കട്ടെ എന്ന് അദ്ദേഹം പറയുകയായിരുന്നു. അങ്ങനെ അന്ന് എനിക്ക് ആ അവസരം നഷ്ടമായി,” രമ്യ ഓർത്തെടുത്തു.
പിന്നീടാണ് രമ്യ തമിഴ് ബിഗ് ബോസ് ഷോയിൽ മത്സരാർത്ഥിയായി എത്തുന്നത്. ഇത് മമ്മൂട്ടിയുടെ മാനേജർ ജോർജും കുടുംബവും സ്ഥിരമായി കാണാറുണ്ടായിരുന്നു. ബിഗ് ബോസ് ഷോ ഒരു ഓർമ്മപ്പെടുത്തലായി മാറിയെന്നും ഷോ കഴിഞ്ഞയുടൻ തന്നെ തേടി ‘നൻപകൽ നേരത്ത് മയക്ക’ത്തിലേക്ക് വിളി വരികയായിരുന്നുവെന്നും താരം പറഞ്ഞു.
“ലിജോ ജോസ് പെല്ലിശ്ശേരി-മമ്മൂട്ടി ചിത്രത്തിലേക്ക് കോൾ വന്നപ്പോൾ എനിക്ക് ആദ്യം വിശ്വസിക്കാൻ കഴിഞ്ഞില്ല. അവർ പറഞ്ഞ പേരുകളെല്ലാം ഇൻഡസ്ട്രിയിലെ വമ്പന്മാരുടേതായിരുന്നു. ശരിക്കും എന്നെത്തന്നെയാണോ വിളിക്കുന്നത് എന്ന് ഞാൻ ചിന്തിച്ചു. സിനിമയിൽ റിലീസായി പേര് വരുന്നത് വരെ ഞാൻ അമിതമായി പ്രതീക്ഷ വെക്കാറില്ല. അതുകൊണ്ട് തന്നെ ഷൂട്ടിങ് സ്പോട്ടിലെത്തി മമ്മൂട്ടി സാറിനെ നേരിൽ കണ്ടപ്പോഴാണ് എനിക്ക് പൂർണ വിശ്വാസമായത്,” രമ്യ കൂട്ടിച്ചേർത്തു.
മമ്മൂട്ടിയുടെ ഫിറ്റ്നസിനോടും സിനിമയോടുമുള്ള കടുത്ത സമർപ്പണത്തെക്കുറിച്ചും രമ്യ അഭിമുഖത്തിൽ പ്രശംസിച്ചു. ലോകസിനിമകളെക്കുറിച്ചും ഫിലിം ഫെസ്റ്റിവലുകളിൽ എത്തുന്ന ചിത്രങ്ങളെക്കുറിച്ചും നിരൂപക പ്രശംസ നേടുന്ന സിനിമകളെക്കുറിച്ചും അദ്ദേഹം എപ്പോഴും അപ്ഡേറ്റഡ് ആണെന്നും അത്തരം കാര്യങ്ങൾ അദ്ദേഹം തനിക്ക് കാണിച്ചുതന്നിട്ടുണ്ടെന്നും രമ്യ വ്യക്തമാക്കി.
Story Summary: Tamil actress Ramya Pandian shared how her stint in Bigg Boss helped her land a role in Mammootty’s acclaimed Malayalam film ‘Nanpakal Nerathu Mayakkam’. She revealed that Mammootty had noticed her talent in the movie ‘Joker’ and eventually selected her for the project after re-assessing her presence on the reality show.
