കൊച്ചി: റിലീസ് ചെയ്ത് വെറും 58 മണിക്കൂറുകൾ പിന്നിടുമ്പോൾ ആഗോള ബോക്സ് ഓഫീസിൽ 100 കോടി രൂപയുടെ തകർപ്പൻ നേട്ടം സ്വന്തമാക്കി മോഹൻലാൽ-ജീത്തു ജോസഫ് കൂട്ടുകെട്ടിന്റെ ‘ദൃശ്യം 3’ (Drishyam 3 box office collection day 3). ഇതോടെ ‘എമ്പുരാന്’ ശേഷം ഏറ്റവും വേഗത്തിൽ 100 കോടി ക്ലബ്ബിലെത്തുന്ന രണ്ടാമത്തെ മലയാള സിനിമ എന്ന ചരിത്ര റെക്കോർഡും ജോർജുകുട്ടിയും കുടുംബവും സ്വന്തംപേരിലാക്കി. റിലീസ് ചെയ്ത് രണ്ട് ദിവസങ്ങൾ കൊണ്ടായിരുന്നു ‘എമ്പുരാൻ’ മുൻപ് 100 കോടി നേടിയിരുന്നത്. ആദ്യദിനം മുതൽ ബുക്ക് മൈ ഷോ (BookMyShow) ഉൾപ്പെടെയുള്ള പ്ലാറ്റ്ഫോമുകളിൽ വൻ തരംഗം സൃഷ്ടിച്ച ചിത്രം, ഇപ്പോഴും തീയേറ്ററുകളിൽ അഭൂതപൂർവ്വമായ ജനത്തിരക്കോടെയാണ് മുന്നേറുന്നത്.
മോഹൻലാലിന്റെ ഗംഭീരമായ പ്രകടനവും ജീത്തു ജോസഫിന്റെ അപ്രതീക്ഷിത ട്വിസ്റ്റുകളുമാണ് ചിത്രത്തിന്റെ ഏറ്റവും വലിയ പോസിറ്റീവ് എന്നാണ് തീയേറ്ററുകളിൽ നിന്നും പുറത്തുവരുന്ന പ്രേക്ഷക പ്രതികരണങ്ങൾ. യഥാർത്ഥത്തിൽ കഴിഞ്ഞ ഏപ്രിൽ 2-ന് റിലീസ് ചെയ്യാനിരുന്ന ചിത്രമായിരുന്നു ദൃശ്യം 3. എന്നാൽ പശ്ചിമേഷ്യൻ രാജ്യങ്ങളിലെ യുദ്ധ പശ്ചാത്തലവും പ്രതിസന്ധികളും കാരണം റിലീസ് നീണ്ടുപോവുകയായിരുന്നു. ഒടുവിൽ മെയ് 21-ന് മോഹൻലാലിന്റെ ജന്മദിനത്തിൽ തന്നെ ചിത്രം തീയേറ്ററുകളിൽ എത്തിക്കാൻ നിർമ്മാതാക്കൾ തീരുമാനിക്കുകയായിരുന്നു. ഇത് മലയാളത്തിന്റെ പ്രിയ നടനുള്ള ഏറ്റവും മികച്ച പിറന്നാൾ സമ്മാനമാണെന്നാണ് ആരാധകർ ഒന്നടങ്കം പറയുന്നത്.
ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ദൃശ്യം മൂന്നാം ഭാഗത്തിൽ മോഹൻലാലിനൊപ്പം മീന, അൻസിബ ഹസൻ, എസ്തർ അനിൽ, ആശാ ശരത്, സിദ്ധിഖ്, കലാഭവൻ ഷാജോൺ, ഇർഷാദ്, ഗണേഷ് കുമാർ തുടങ്ങിയ വൻ താരനിര തന്നെയാണ് അണിനിരന്നിരിക്കുന്നത്.
വിജയകരമായ തീയേറ്റർ പ്രദർശനങ്ങൾ പൂർത്തിയാക്കിയ ശേഷം മാത്രമായിരിക്കും ചിത്രത്തിന്റെ ഒടിടി (OTT) റിലീസ് ഉണ്ടായിരിക്കുക. പ്രമുഖ ഡിജിറ്റൽ പ്ലാറ്റ്ഫോമായ ആമസോൺ പ്രൈം വീഡിയോയാണ് (Amazon Prime Video) ചിത്രത്തിന്റെ ഡിജിറ്റൽ സ്ട്രീമിംഗ് അവകാശം സ്വന്തമാക്കിയിരിക്കുന്നത്. ഇതിന്റെ ഔദ്യോഗിക തിയതി പിന്നീട് പ്രഖ്യാപിക്കും. അതേസമയം, ചിത്രത്തിന്റെ ബോളിവുഡ് റീമേക്ക് അഥവാ ഹിന്ദി പതിപ്പ് 2026 ഒക്ടോബർ 2-ന് ഗാന്ധി ജയന്തി ദിനത്തിൽ ആഗോളതലത്തിൽ റിലീസ് ചെയ്യുമെന്നും അണിയറപ്രവർത്തകർ വ്യക്തമാക്കിയിട്ടുണ്ട്.
Story Summary: Mohanlal-Jeethu Joseph’s Drishyam 3 entered the ₹100 crore club within 58 hours of its global release on May 21. Following Lucifer’s sequel Empuraan, it becomes the second fastest Malayalam film to achieve this feat. Amazon Prime Video bagged the OTT rights.
