‘കുമ്പളങ്ങി നൈറ്റ്സ്’ എന്ന ആദ്യ ചിത്രത്തിലൂടെത്തന്നെ മലയാളി പ്രേക്ഷകരുടെ ഹൃദയം കവർന്ന നടിയാണ് അന്ന ബെൻ (Anna Ben Con City Movie). പിന്നീട് ‘ഹെലൻ’, ‘കപ്പേള’ തുടങ്ങി വൈവിധ്യമാർന്ന ചിത്രങ്ങളിലൂടെ അഭിനയശേഷി തെളിയിച്ച താരം ‘കൊട്ടുക്കാളി’ എന്ന ചിത്രത്തിലൂടെ തമിഴകത്തും ശക്തമായ സാന്നിധ്യമറിയിച്ചു. കൺകോണുകളിലൂടെ മാത്രം വികാരങ്ങൾ പ്രകടിപ്പിച്ച കൊട്ടുക്കാളിയിലെ പ്രകടനത്തിന് ശേഷം, കരിയറിലെ തികച്ചും വ്യത്യസ്തമായ ഒരു പരീക്ഷണത്തിന് ഒരുങ്ങുകയാണ് അന്ന ബെൻ. ഹരീഷ് ദുരൈരാജ് സംവിധാനം ചെയ്യുന്ന ‘കോൺ സിറ്റി’ (Con City) എന്ന തമിഴ് ചിത്രത്തിലൂടെ ആദ്യമായി ഒരു ഫുൾ ലെങ്ത് കോമഡി വേഷത്തിൽ താരം എത്തുന്നു. ചിത്രത്തിന്റെ വിശേഷങ്ങൾ താരം അടുത്തിടെ ഒരു ദേശീയ മാധ്യമത്തോട് പങ്കുവെക്കുകയുണ്ടായി.
ഇതുവരെ താൻ ചെയ്ത കഠിനവും തീവ്രവുമായ വേഷങ്ങളിൽ നിന്നുള്ള വലിയൊരു മാറ്റമാണ് ‘കോൺ സിറ്റി’യെന്ന് അന്ന ബെൻ പറയുന്നു. മുൻ ചിത്രങ്ങളിലെ ഗൗരവമേറിയ കഥാപാത്രങ്ങൾ താൻ ആസ്വദിച്ചാണ് ചെയ്തതെങ്കിലും, ഈ പക്കാ ഹ്യൂമർ ചിത്രം തന്റെ കരിയറിലെ പുതിയൊരു അധ്യായമായിരിക്കുമെന്നാണ് താരം വിശ്വസിക്കുന്നത്. ചിത്രത്തിൽ നടൻ അർജുൻ ദാസിനൊപ്പം ചേർന്ന് തട്ടിപ്പുകൾ ആസൂത്രണം ചെയ്യുന്ന ‘മിത്ര’ എന്ന കഥാപാത്രമായാണ് അന്ന വേഷമിടുന്നത്. യോഗി ബാബു, വി.ടി.വി ഗണേഷ്, രമേഷ് തിലക്, ഇമ്മൻ അണ്ണാച്ചി, വടിവുക്കരസി തുടങ്ങി തമിഴിലെ വൻ കോമഡി നിര അണിനിരക്കുന്ന ചിത്രത്തിന്റെ സെറ്റിൽ ഇവരുടെ തമാശകൾ കണ്ട് ചിരിയടക്കാൻ താൻ ഏറെ പാടുപെട്ടതായും താരം ഓർക്കുന്നു.
‘കൊട്ടുക്കാളി’യിൽ സംഭാഷണങ്ങൾ കുറവായിരുന്നെങ്കിൽ ‘കോൺ സിറ്റി’യിൽ ഡയലോഗുകളുടെ പെരുമഴയാണെന്ന് താരം പറയുന്നു. തമിഴ് അത്ര വഴങ്ങാത്തതിനാൽ തുടക്കത്തിൽ ആശങ്കയുണ്ടായിരുന്നെങ്കിലും സംവിധായകൻ ഹരീഷ് ദുരൈരാജ് കാര്യങ്ങൾ എളുപ്പമാക്കിത്തന്നു. എന്നാൽ, സീനുകൾ അതിവേഗം വിശദീകരിക്കുന്ന സംവിധായകന്റെ ശൈലിയെക്കുറിച്ച് തമാശരൂപേണ അന്ന സംസാരിച്ചു. തമിഴ് മാതൃഭാഷയല്ലാത്തതിനാൽ തനിക്ക് മാത്രമാണ് ഈ വേഗത പ്രശ്നമാകുന്നതെന്ന് കരുതിയെങ്കിലും, മുതിർന്ന താരം വടിവുക്കരസിക്ക് പോലും സംവിധായകന്റെ സ്പീഡ് മനസ്സിലാക്കാൻ ബുദ്ധിമുട്ടായിരുന്നുവെന്ന് അന്ന ചിരിയോടെ വെളിപ്പെടുത്തി.
ഹ്യൂമർ കൈകാര്യം ചെയ്യാൻ ഇപ്പോഴും നേരിയ ഭയമുണ്ടെങ്കിലും ‘കോൺ സിറ്റി’ക്ക് ശേഷം എല്ലാ ജോണറുകളും പരീക്ഷിക്കാൻ തനിക്ക് ആഗ്രഹമുണ്ടെന്ന് അന്ന വ്യക്തമാക്കി. മുൻകൂട്ടി തയാറെടുപ്പുകൾ നടത്തി അഭിനയിക്കുന്നതാണ് തന്റെ രീതിയെങ്കിലും, ഈ സിനിമയ്ക്ക് വേണ്ടി മനസ്സിൽ ഒന്നും വിചാരിക്കാതെ (Blank Slate ആയി) വരാനായിരുന്നു സംവിധായകന്റെ നിർദ്ദേശം. “നോക്കാം” എന്ന അർത്ഥത്തിൽ സംവിധായകൻ സ്ഥിരമായി പറയുന്ന തമിഴ് വാക്കായ ‘പാത്തുക്കലാം’ എന്നത് ഷൂട്ടിംഗ് സമയത്ത് തനിക്ക് വലിയ പ്രഷറായിരുന്നുവെന്നും താരം പറഞ്ഞു.
സഹതാരം അർജുൻ ദാസിനെക്കുറിച്ചും അന്ന ബെൻ വാചാലയായി. ‘കൈതി’ മുതൽ താൻ അർജുന്റെ വലിയൊരു ആരാധകിയാണെന്നും, മുൻപ് ചില പ്രോജക്ടുകൾ ഒരുമിച്ച് പ്ലാൻ ചെയ്തിരുന്നെങ്കിലും ഇപ്പോഴാണ് അതിന് അവസരം ഒരുങ്ങിയതെന്നും താരം പറഞ്ഞു. ഏത് ജോണറും അനായാസം കൈകാര്യം ചെയ്യാൻ അർജുന് പ്രത്യേക കഴിവുണ്ടെന്നും താരം കൂട്ടിച്ചേർത്തു. മികച്ച നിരൂപക പ്രശംസ നേടിയിട്ടും ബോക്സ് ഓഫീസിൽ ‘കൊട്ടുക്കാളി’ വലിയ ചലനം സൃഷ്ടിക്കാത്തതിനെ താരം പോസിറ്റീവായാണ് കാണുന്നത്. അതൊരു പരീക്ഷണ ചിത്രമായിരുന്നെന്നും, ഇഷ്ടപ്പെട്ട ഒരു സ്ക്രിപ്റ്റ് തിരഞ്ഞെടുത്ത് നല്ല സിനിമകളെ സ്നേഹിക്കുന്നവർക്കൊപ്പം പ്രവർത്തിക്കാൻ കഴിഞ്ഞതാണ് തന്റെ യഥാർത്ഥ വിജയമെന്നും അന്ന ബെൻ വ്യക്തമാക്കി.
Story Summary:
Actress Anna Ben shares her excitement about her upcoming Tamil film ‘Con City’, which marks her first full-length comedy role. Starring alongside Arjun Das, Anna plays a con artist named Mithra in this out-and-out humor entertainer.
