കൊച്ചി: മലയാള സിനിമയിലെ എക്കാലത്തെയും വലിയ സൂപ്പർഹിറ്റ് ചിത്രങ്ങളിലൊന്നായ ‘യോദ്ധ’യുടെ ചിത്രീകരണത്തിനിടെ നേപ്പാളിൽ വെച്ചുണ്ടായ ഭീതിജനകമായ ഒരു അനുഭവം തുറന്നുപറഞ്ഞ് നടി മധുബാല (Actress Madhoo Madhubala interview). ചിത്രത്തിലെ സൂപ്പർഹിറ്റ് ഗാനമായ ‘കുനു കുനെ ചെറു കുറുനിരകൾ…’ എന്ന പാട്ട് ചിത്രീകരിക്കുന്നതിനിടെ വലിയൊരു മദ്യപ സംഘത്തിനിടയിൽ പെട്ടുപോയെന്നും, അവിടെ നിന്ന് നടൻ മോഹൻലാൽ ആണ് തന്നെ സുരക്ഷിതമായി രക്ഷപ്പെടുത്തിയതെന്നും മധുബാല വെളിപ്പെടുത്തി. തന്റെ ഏറ്റവും പുതിയ ചിത്രമായ ‘ചിന്ന ചിന്ന ആസൈ’യുടെ പ്രൊമോഷന്റെ ഭാഗമായി പ്രശസ്ത അവതാരക പേർളി മാണി നടത്തുന്ന ‘പേർളി മാണി ഷോ’യ്ക്ക് (Pearle Maaney Show) നൽകിയ പ്രത്യേക അഭിമുഖത്തിൽ സംസാരിക്കുകയായിരുന്നു താരം.
മലയാളികളുടെ എക്കാലത്തെയും പ്രിയപ്പെട്ട സംവിധായകൻ സംഗീത് ശിവൻ ഒരുക്കിയ യോദ്ധയിൽ മോഹൻലാലിന്റെ നായികയായാണ് മധുബാല എത്തിയത്. ചിത്രത്തിന്റെ ക്യാമറ ചലിപ്പിച്ചത് പ്രശസ്ത ഛായാഗ്രാഹകൻ സന്തോഷ് ശിവനായിരുന്നു. സിനിമയുടെ ഷൂട്ടിങ് പൂർണ്ണമായും നേപ്പാളിലായിരുന്നുവെന്ന് മധുബാല ഓർക്കുന്നു. “ആദ്യത്തെ ഒരു മാസം എന്റെ അച്ഛൻ കൂടെ ഷൂട്ടിങ്ങിന് വന്നിരുന്നില്ല. അതുകൊണ്ടുതന്നെ എങ്ങനെയെങ്കിലും ഷൂട്ടിങ് കഴിഞ്ഞ് പെട്ടെന്ന് വീട്ടിലെത്തിയാൽ മതി എന്ന ചിന്തയിലായിരുന്നു ഞാൻ. എന്നാൽ അവിടെ എന്നെ ഏറ്റവും കൂടുതൽ കംഫർട്ടബിൾ ആക്കിയത് ക്യാമറമാൻ സന്തോഷ് ശിവനും മോഹൻലാലുമായിരുന്നു,”- മധുബാല പറഞ്ഞു.
പാട്ടിന്റെ ഷൂട്ടിങ്ങിനിടയിൽ ഉണ്ടായ നാടകീയ നിമിഷങ്ങളെക്കുറിച്ച് താരം വിവരിക്കുന്നത് ഇങ്ങനെയാണ്: “അവിടെ മാർക്കറ്റ് പരിസരത്തുള്ള ആളുകളെല്ലാം വൈകിട്ട് ഒരു ആറ് മണിയാകുമ്പോഴേക്കും മദ്യപിക്കാൻ തുടങ്ങും. ആ സമയത്താണ് ‘കുനു കുനെ’ എന്ന പാട്ടിന്റെ ചിത്രീകരണം നടക്കുന്നത്. ഒരു പഗോഡയുടെ (Buddhist Pagoda) മുകളിലായിരുന്നു ഞങ്ങളുടെ ഡാൻസ് ഷൂട്ട്. താഴെ നിന്നിരുന്ന ആളുകൾ മുകളിലേക്ക് കയറി വരുന്നതുപോലെ എനിക്ക് തോന്നി. ഞാൻ എന്റെ അസിസ്റ്റൻസിനോട് ഇക്കാര്യം ചോദിച്ചപ്പോൾ അവരില്ല എന്ന് പറഞ്ഞ് എന്നെ ആശ്വസിപ്പിച്ചു. എന്നാൽ പെട്ടെന്നാണ് ഞങ്ങളുടെ വെറും മൂന്നടി അകലത്തിൽ ആ മദ്യപസംഘം എത്തിയിരിക്കുന്നുവെന്ന് എല്ലാവരും തിരിച്ചറിഞ്ഞത്.”
സ്ഥിതിഗതികൾ കൈവിട്ടുപോകുമെന്ന് മനസ്സിലാക്കിയ മോഹൻലാൽ ഉടൻ തന്നെ ഇടപെടുകയായിരുന്നു. “ലാലേട്ടനും അപകടം മനസ്സിലായി. പെട്ടെന്ന് തന്നെ എന്റെ ഒരു കയ്യിൽ ലാലേട്ടനും മറു കയ്യിൽ സന്തോഷ് ശിവന്റെ അസിസ്റ്റന്റ് ബിജോയ്യും ചേർന്ന് പിടിച്ചു. ഞങ്ങൾ പഗോഡയുടെ സ്റ്റെപ്പുകളിൽ നിന്ന് താഴേക്ക് ചാടി. ആ വലിയ ആൾക്കൂട്ടത്തിന് നടുവിൽ ഞങ്ങളെ കാത്ത് കാർ കിടക്കുന്നുണ്ടായിരുന്നു. അവർ ഞങ്ങളെ വേഗം കാറിൽ കയറ്റി നേരെ അടുത്തുള്ള പോലീസ് സ്റ്റേഷനിലേക്ക് പോയി. ഒരു തരത്തിലും നിയന്ത്രിക്കാൻ പറ്റാത്തത്ര ജനത്തിരക്കായിരുന്നു അവിടെ. ഞാനും ഡാൻസേഴ്സായ എട്ട് പെൺകുട്ടികളും അടങ്ങുന്ന സംഘമാണ് അന്ന് പോലീസ് സ്റ്റേഷനിൽ അഭയം തേടിയത്. യോദ്ധയുടെ ലൊക്കേഷനിൽ വെച്ച് എന്റെ ജീവിതത്തിൽ ഒരിക്കലും മറക്കാൻ പറ്റാത്ത അനുഭവമായിരുന്നു അത്,”- മധുബാല ഓർമ്മകൾ പങ്കുവെച്ചു.
Story Summary: Actress Madhoo (Madhubala) recalled a frightening experience from the sets of the cult Malayalam movie ‘Yodha’ in Nepal. During an interview on the Pearle Maaney Show, she revealed that while shooting the song ‘Kunu Kune’, a drunk mob surrounded them on a pagoda. Mohanlal and cinematographer Santhosh Sivan’s assistant rescued her by pulling her down the steps into a waiting car, eventually taking shelter in a police station.
