കൊച്ചി: താരസംഘടനയായ ‘അമ്മ’യിൽ കഴിഞ്ഞ കുറച്ചുദിവസങ്ങളായി തുടരുന്ന ആഭ്യന്തര കലഹങ്ങളിലും ആരോപണ-പ്രത്യാരോപണങ്ങളിലും കടുത്ത അതൃപ്തി രേഖപ്പെടുത്തി നടൻ സുധീർ സുകുമാരൻ (Sudheer Sukumaran against Tiny Tom). എക്സിക്യൂട്ടീവ് കമ്മിറ്റി അംഗങ്ങളായ ടിനി ടോമും അൻസിബ ഹസ്സനും പരസ്പരം ചെളി വാരിയെറിയുകയാണെന്നും അറിയാവുന്ന പണി ചെയ്ത് ജീവിക്കാൻ ഇരുവരും തയ്യാറാകണമെന്നും സുധീർ തന്റെ സോഷ്യൽ മീഡിയ സന്ദേശത്തിലൂടെ തുറന്നടിച്ചു. ഇരുവരുടെയും ഈ തരംതാണ തർക്കങ്ങൾ കാരണം നാണംകെടുന്നത് സംഘടനയെ പൊന്നുപോലെ കൊണ്ടുനടന്ന മുതിർന്ന കലൈകാരന്മാരാണെന്നും സുധീർ ഓർമ്മിപ്പിച്ചു.
രാവിലെ ഇൻസ്റ്റാഗ്രാം തുറന്നപ്പോൾ കണ്ട ടിനി ടോമിന്റെ അഭിമുഖത്തിനോട് പ്രതികരിച്ചാണ് സുധീർ രംഗത്തെത്തിയത്. സുധീർ സുകുമാരന്റെ വാക്കുകളുടെ പൂർണ്ണരൂപം താഴെ നൽകുന്നു:
“എന്തായാലും കൊള്ളാം കേട്ടോ, രാവിലെ എഴുന്നേറ്റ് ഇൻസ്റ്റാഗ്രാം തുറന്നപ്പോൾ ടിനി ടോമിന്റെ അഭിമുഖം, ‘ഞാൻ അങ്ങനെയല്ല, ഞാൻ മറ്റേതല്ല’… എന്റെ പൊന്നു ടിനി, നിങ്ങളൊരു കലാകാരനല്ലേ, അറിയാവുന്ന പണി ചെയ്ത് ജീവിക്ക്. എന്തിനാണ് മറ്റുള്ളവരെക്കുറിച്ച് പരദൂഷണം പറയുന്നത്? നമുക്കിതൊന്നും അറിയാൻ പാടില്ലാഞ്ഞിട്ടല്ല, നിങ്ങൾ നിങ്ങളുടെ പ്രഫഷനിൽ ശ്രദ്ധിക്ക്.”
ടിനിക്കൊപ്പം തന്നെ ആരോപണങ്ങൾ ഉന്നയിച്ച നടി അൻസിബയോടും സ്വന്തം കാര്യം നോക്കി ജീവിക്കാൻ സുധീർ ഉപദേശിച്ചു.
ഈ സംഘടന വെറുതെ ഉണ്ടായതല്ലെന്നും ഇതിന് പിന്നിൽ വലിയൊരു വിഭാഗത്തിന്റെ കഷ്ടപ്പാടുണ്ടെന്നും സുധീർ ചൂണ്ടിക്കാട്ടി. ‘അമ്മ’യെ പടുത്തുയർത്തിയ, ഇതിനുവേണ്ടി ജീവനും സമയവും കളഞ്ഞ ഒരുപാട് ആളുകളുണ്ട്. ഇവർ പരസ്പരം ചെളി വാരിയെറിയുമ്പോൾ കൊള്ളുന്നത് ആ മുതിർന്ന വ്യക്തികൾക്കാണെന്ന് ഇവർ ഓർക്കണം. ഇത് കഷ്ടമാണെന്നും, ഈ തർക്കങ്ങൾ ഏറ്റുപിടിക്കാൻ മറ്റ് ചില കോമാളികൾ കൂടി രംഗത്തുണ്ടെന്നും സുധീർ പരിഹസിച്ചു.
‘അമ്മ’ സംഘടന നൽകുന്ന പ്രതിമാസ കൈനീട്ടവും ചികിത്സാ സഹായവും കണ്ണിന്റെ ചികിത്സയ്ക്കുള്ള തുകയുമൊക്കെ കാത്തിരിക്കുന്ന പാവപ്പെട്ട നിരവധി കലാകാരന്മാർ ഈ സംഘടനയിലുണ്ട്. അവരെയെല്ലാം ബാധിക്കുന്ന രീതിയിൽ എന്തിനാണ് സംഘടനയെ ഇങ്ങനെ നാറ്റിക്കുന്നതെന്നും ഇത്തരം കാര്യങ്ങൾ വിളിച്ച് പറയാൻ തനിക്ക് ആരെയും പേടിയില്ലെന്നും സുധീർ വ്യക്തമാക്കി.
അടുത്ത മാസം നടക്കാനിരിക്കുന്ന ജനറൽ ബോഡിക്ക് മുന്നോടിയായി സംഘടനയ്ക്കുള്ളിലെ ഭിന്നതകൾ തെരുവിലേക്ക് വലിച്ച് ഇഴയ്ക്കപ്പെടുന്നതിൽ സാധാരണക്കാരായ അംഗങ്ങൾക്കും കടുത്ത അമർഷമുണ്ടെന്നതിന്റെ തെളിവാണ് സുധീറിന്റെ ഈ പ്രതികരണം.
Story Summary: Actor Sudheer Sukumaran strongly criticized Tiny Tom and Ansiba Hassan over their ongoing public spat within the AMMA association. He urged both artists to focus on their professions instead of tarnishing the reputation of an organization that supports many veteran actors.
