കൊച്ചി: വിവാഹ വാഗ്ദാനം നൽകി പീഡിപ്പിച്ചു എന്നാരോപിച്ച് യുവതി നൽകിയ പരാതിയിൽ മറുപടിയുമായി ഷിയാസ് കരീം (Shiyas Kareem News). താൻ മാന്യമായി ജീവിക്കുന്ന വ്യക്തിയാണെന്നും തന്റെ കുടുംബവുമായി അടുത്ത ബന്ധമുണ്ടായിരുന്ന സ്ത്രീയാണ് ഇപ്പോൾ തനിക്കെതിരെ തിരിഞ്ഞിരിക്കുന്നതെന്നും ഷിയാസ് പറഞ്ഞു.
തനിക്കെതിരെ പരാതി നൽകിയ സ്ത്രീക്ക് അറുപത് വയസ്സോളം പ്രായമുണ്ട്. തന്റെ ഉമ്മയുടെ പ്രായമുള്ള അവരെ വിവാഹ വാഗ്ദാനം നൽകി പീഡിപ്പിക്കേണ്ട സാഹചര്യം തനിക്കില്ലെന്ന് ഷിയാസ് വ്യക്തമാക്കി.ഈ സ്ത്രീ തന്റെ കുടുംബവുമായി വലിയ അടുപ്പമുണ്ടായിരുന്നയാളാണ്. തന്റെ വിവാഹത്തിനും റിസപ്ഷനും അവർ പങ്കെടുത്തിരുന്നു. തന്റെ ഉമ്മ, ഭാര്യ, സഹോദരി എന്നിവരുടെ പക്കൽ നിന്ന് ഇവർ സ്വർണ്ണവും പണവും വാങ്ങിയിട്ടുണ്ടെന്നും ഷിയാസ് ആരോപിച്ചു.
തന്റെ കുടുംബത്തിന്റെ പേഴ്സണൽ കാര്യങ്ങളിൽ ഇവർ ഇടപെട്ടതോടെയാണ് പ്രശ്നങ്ങൾ തുടങ്ങിയത്. ഇവർ സാമ്പത്തിക തട്ടിപ്പ് നടത്തുന്നതിനെതിരെ താൻ നേരത്തെ നിയമനടപടി സ്വീകരിച്ചിരുന്നു. ഇതിന്റെ പ്രതികാരമായാണ് ഇപ്പോൾ പീഡന പരാതിയുമായി അവർ വന്നിരിക്കുന്നത്.
മുൻപും തനിക്കെതിരെ ഇത്തരത്തിൽ വ്യാജ ആരോപണങ്ങൾ ഉണ്ടായിട്ടുണ്ടെന്നും അതിനെയെല്ലാം അതിജീവിച്ചതുപോലെ ഈ കള്ളക്കേസിനെയും നേരിടുമെന്നും ഷിയാസ് പറഞ്ഞു. കേരള പോലീസിലും കോടതിയിലും തനിക്ക് പൂർണ്ണ വിശ്വാസമുണ്ടെന്നും അദ്ദേഹം കൂട്ടിചേർത്തു.
തന്റെ വിവാഹം കഴിഞ്ഞിട്ട് രണ്ട് വർഷമാകുന്നുവെന്നും തനിക്കൊരു കുഞ്ഞുണ്ടെന്നും പറഞ്ഞ ഷിയാസ്, തനിക്കൊപ്പം തന്റെ കുടുംബവും സത്യമറിയുന്ന സുഹൃത്തുക്കളും ഉണ്ടെന്നും മാധ്യമങ്ങളോട് വ്യക്തമാക്കി.
Story Summary: Actor and model Shiyas Kareem has dismissed the sexual and financial exploitation charges filed against him as baseless and fake. In his response, Shiyas stated that the complainant is around 60 years old and was a close family acquaintance who had allegedly taken money and gold from his relatives. He claimed the woman filed the false rape case as retaliation after he initiated legal action against her for financial fraud and interference in his personal matters. Shiyas reiterated his faith in the legal system and vowed to fight the case.
