സെൻട്രൽ ജാവ: നിരന്തരമായ അവഗണനയും ഒറ്റപ്പെടുത്തലും സഹിക്കവയ്യാതെ മരുമകൻ അമ്മായി അമ്മയെ വിഷം നൽകി കൊലപ്പെടുത്തി. ഇന്തോനേഷ്യയിലെ സെൻട്രൽ ജാവയിലാണ് ഞെട്ടിക്കുന്ന സംഭവം നടന്നത്. പുർവാഡി വാഹ്യുദി (40) എന്നയാളാണ് ക്രൂരമായ കൃത്യത്തിന് പിടിയിലായത്. 57-കാരിയായ അമിനയാണ് കൊല്ലപ്പെട്ടത്.(Poisoning Case Indonesia, Man Arrested for Poisoning Mother in Law in Central Java Indonesia)
ഭക്ഷണത്തിൽ എലിവിഷം കലർത്തി അമ്മായി അമ്മയെ കൊലപ്പെടുത്തുകയായിരുന്നു പ്രതിയുടെ പദ്ധതി. ഓൺലൈൻ കൊറിയർ സർവീസ് വഴി അമിനയുടെ വീട്ടിലേക്ക് ഭക്ഷണം എത്തിച്ചാണ് പ്രതി കൃത്യം നിർവ്വഹിച്ചത്. കൊറിയർ ആരുടേതാണെന്ന് സംശയം തോന്നാതിരിക്കാൻ തന്റെ ഭാര്യയുടെ സഹോദരിയുടെ പേരും ഫോട്ടോയും ഇയാൾ ദുരുപയോഗം ചെയ്തു. ഡെലിവറി ഏജന്റിനെ നേരിട്ട് കണ്ടപ്പോൾ താൻ അമിനയുടെ മകനാണെന്ന് കള്ളം പറയുകയും, ഈ ഭക്ഷണം അമിനയുടെ മൂത്ത മകൾ നൽകിയതാണെന്ന് ധരിപ്പിക്കാൻ ഡ്രൈവർക്ക് നിർദ്ദേശം നൽകുകയും ചെയ്തു.
അജ്ഞാത കേന്ദ്രത്തിൽ നിന്ന് എത്തിയ ഭക്ഷണം കഴിക്കരുതെന്ന് മകൾ അമിനയ്ക്ക് മുന്നറിയിപ്പ് നൽകിയിരുന്നെങ്കിലും അത് അവഗണിക്കപ്പെട്ടു. ഭക്ഷണം കഴിച്ചതിനെ തുടർന്ന് അമിന മരണപ്പെട്ടതിനൊപ്പം, വീട്ടിലെ കോഴികളും ചത്തത് സംശയമുയർത്തി. തുടർന്ന് മകൾ നൽകിയ പരാതിയുടെ അടിസ്ഥാനത്തിൽ മെയ് മാസത്തിൽ സംസ്കരിച്ച മൃതദേഹം പുറത്തെടുത്ത് നടത്തിയ ഫോറൻസിക് പരിശോധനയിൽ ആന്തരികാവയവങ്ങളിൽ എലിവിഷത്തിന്റെ സാന്നിധ്യം കണ്ടെത്തുകയായിരുന്നു. സംഭവത്തിൽ തന്റെ ഭാര്യാസഹോദരിയെ പ്രതിയാക്കി കേസിൽ നിന്ന് രക്ഷപ്പെടാനും പ്രതി ശ്രമിച്ചിരുന്നു. ആസൂത്രിത കൊലപാതകത്തിനും വധശ്രമത്തിനുമാണ് പുർവാഡി വാഹ്യുദിക്കെതിരെ കേസെടുത്തിരിക്കുന്നത്. കുറ്റം തെളിയിക്കപ്പെട്ടാൽ വധശിക്ഷയോ ജീവപര്യന്തം തടവോ അല്ലെങ്കിൽ 20 വർഷം വരെയുള്ള കഠിനതടവോ പ്രതിക്ക് ലഭിച്ചേക്കാം.
Story Summary
A 40-year-old man, Purwadi Wahyudi, has been arrested in Central Java, Indonesia, for murdering his mother-in-law by poisoning her chicken ‘sate’ with rat poison. The accused meticulously planned the crime by using his sister-in-law’s identity to send the food via a delivery service and attempted to frame her for the murder, but forensic evidence from the victim’s exhumed body eventually exposed his scheme.
