തിരുവനന്തപുരം: ഡോ. വന്ദന ദാസ് വധക്കേസിൽ പ്രതി സന്ദീപിന് ജീവപര്യന്തം ശിക്ഷ വിധിച്ച കീഴ്ക്കോടതി വിധിയിൽ അതൃപ്തി രേഖപ്പെടുത്തി പ്രോസിക്യൂഷൻ. പ്രതിക്ക് വധശിക്ഷ തന്നെ നൽകണമെന്ന ആവശ്യവുമായി ഹൈക്കോടതിയിൽ അപ്പീൽ നൽകുമെന്ന് പ്രോസിക്യൂഷൻ വ്യക്തമാക്കി. (Death penalty is needed, Heartbroken family of Dr. Vandana Das, prosecution to appeal in High Court)
യാതൊരു പ്രകോപനവുമില്ലാതെ, ചികിത്സ നൽകിക്കൊണ്ടിരുന്ന 24 വയസ്സുകാരിയായ ഡോക്ടറെയാണ് പ്രതി കുത്തിയത്. ജോലിസ്ഥലത്ത് വെച്ച് നടന്ന ഈ ആക്രമണം സമൂഹത്തിന് തെറ്റായ സന്ദേശം നൽകുന്നതാണെന്നും ഒരു ഹോം ഗാർഡിനെപ്പോലും വധിക്കാൻ ശ്രമിച്ച പ്രതിക്ക് വധശിക്ഷ നൽകണമെന്നും പ്രോസിക്യൂഷൻ കോടതിയിൽ ആവശ്യപ്പെട്ടിരുന്നു.
പ്രതിക്ക് ഗുരുതരമായ മാനസിക പ്രശ്നങ്ങളില്ലെന്നും ഒരു അധ്യാപകൻ എന്ന നിലയിൽ ഉത്തരവാദിത്തത്തോടെ പെരുമാറേണ്ട ആളാണ് ഈ ക്രൂരത ചെയ്തതെന്നും പ്രോസിക്യൂഷൻ ചൂണ്ടിക്കാട്ടി. വിധി കേൾക്കാൻ കോടതിയിലെത്തിയ വന്ദനയുടെ മാതാപിതാക്കൾ അതീവ ദുഃഖിതരായാണ് പ്രതികരിച്ചത്. വധശിക്ഷ തന്നെ കിട്ടണം എന്ന് നിറക്കണ്ണുകളോടെ വന്ദനയുടെ അമ്മ പ്രതികരിച്ചു. നിയമപോരാട്ടം തുടരുമെന്ന് അച്ഛൻ മോഹൻദാസ് വ്യക്തമാക്കി.
സന്ദീപിന് വന്ദനയുമായി മുൻവൈരാഗ്യമില്ലായിരുന്നുവെന്നും കരുതിക്കൂട്ടി ചെയ്ത കൊലപാതകമല്ലെന്നുമാണ് പ്രതിഭാഗം കോടതിയിൽ വാദിച്ചത്. തനിക്ക് എന്താണ് സംഭവിച്ചതെന്ന് മനസ്സിലാക്കാനാണ് ജയിലിൽ വെച്ച് സൈക്യാട്രി പുസ്തകങ്ങൾ വായിച്ചതെന്നും പ്രതിഭാഗം പറഞ്ഞു. മാപ്പ് നൽകണമെന്നും പ്രായശ്ചിത്തം ചെയ്യാൻ അവസരം വേണമെന്നും സന്ദീപ് കോടതിയിൽ അപേക്ഷിച്ചിരുന്നു. ജീവപര്യന്തം തടവും ഒരു ലക്ഷം രൂപ പിഴയുമാണ് നിലവിൽ സന്ദീപിന് ലഭിച്ചിരിക്കുന്നത്.
