അയോധ്യ: അയോധ്യ രാമക്ഷേത്രത്തിലെ സംഭാവനയിൽ നിന്ന് ലക്ഷങ്ങൾ തട്ടിയെടുത്തിരുന്ന വൻ അഴിമതി പുറത്ത്. ക്ഷേത്രത്തിൽ സംഭാവന എണ്ണിത്തിട്ടപ്പെടുത്തുന്ന ജോലിയിലുണ്ടായിരുന്ന ജീവനക്കാരാണ് ഈ തട്ടിപ്പിന് പിന്നിൽ. പ്രതികൾ ദിവസവും 6 മുതൽ 8 ലക്ഷം രൂപ വരെ മോഷ്ടിച്ചിരുന്നതായാണ് അന്വേഷണത്തിൽ തെളിഞ്ഞിരിക്കുന്നത്.(Ayodhya Ram Temple Donation Theft Employees Stole Lakhs Daily)
പ്രതികളിലൊരാളായ അവിനാശ് ശുക്ല കുടിവെള്ളം വിൽക്കുന്ന ജോലിയെടുത്തിരുന്ന വ്യക്തിയായിരുന്നു. 14,000 മുതൽ 15,000 രൂപ വരെ ശമ്പളമുള്ള ജോലിയിൽ രാമക്ഷേത്രത്തിൽ പ്രവേശിച്ചതിന് ശേഷമാണ് ഇയാൾ വൻതോതിൽ പണം തട്ടാൻ തുടങ്ങിയത്. മോഷ്ടിച്ച പണം ഉപയോഗിച്ച് അയോധ്യയിൽ ആഡംബര വീട് പണിയുകയും ലക്ഷങ്ങൾ വിലമതിക്കുന്ന എസ്.യു.വി കാർ വാങ്ങുകയും ചെയ്തു. ഇതെല്ലാം പോലീസ് കണ്ടുകെട്ടിയിട്ടുണ്ട്.
മറ്റൊരു പ്രതിയായ ലവ്കുശ് മിശ്ര ഇതേ ശമ്പളത്തിൽ ജോലി ചെയ്തിരുന്നെങ്കിലും, ചുരുങ്ങിയ കാലത്തിനുള്ളിൽ 25 ലക്ഷത്തോളം രൂപ വിലമതിക്കുന്ന ഭൂമി ബാനിപുർ മേഖലയിൽ വാങ്ങിക്കൂട്ടി. അന്വേഷണസംഘം ഈ ഭൂമിയും കണ്ടെടുത്തിട്ടുണ്ട്. സംഭാവനക്കൊള്ള പുറത്തായതോടെ ട്രസ്റ്റ് ബാങ്കിൽ നിക്ഷേപിക്കുന്ന തുകയിൽ വലിയ വർധനവുണ്ടായി. നേരത്തെ ദിവസവും 16 മുതൽ 18 ലക്ഷം രൂപ വരെയായിരുന്നു നിക്ഷേപിച്ചിരുന്നത്. എന്നാൽ തട്ടിപ്പ് പുറത്തായതോടെ ഇത് ദിവസവും 24 മുതൽ 26 ലക്ഷം രൂപയായി ഉയർന്നു. ഈ കണക്കുകൾ പരിശോധിച്ചാണ് പ്രതികൾ ദിവസവും എട്ടുലക്ഷത്തോളം രൂപ കവർന്നിരുന്നതായി അന്വേഷണസംഘം സ്ഥിരീകരിച്ചത്. മഹാകുംഭമേള പോലുള്ള തിരക്കേറിയ ദിവസങ്ങളിൽ പ്രതികൾ ഇതിലും വലിയ തുക അപഹരിച്ചിരുന്നതായും സൂചനയുണ്ട്. ബാങ്ക് ജീവനക്കാരെയും കേസിൽ അന്വേഷണസംഘം ചോദ്യം ചെയ്തിട്ടുണ്ട്.
Story Summary
A massive donation theft has been uncovered at the Ayodhya Ram Temple, where employees earning a monthly salary of ₹15,000 were found stealing ₹6-8 lakh daily. The investigation, which led to the seizure of properties and vehicles bought by the accused, was triggered by a significant increase in daily bank deposits after the theft was exposed, revealing the scale of the embezzlement.
