ബെംഗളൂരു: കർണാടകയിലെ ചന്നമനക്കരെയിൽ ബ്യൂട്ടീഷ്യനായ യുവതിയെ ലൈംഗികമായി പീഡിപ്പിച്ച സംഭവത്തിൽ ജോത്സ്യൻ അറസ്റ്റിലായി. മോഹൻകുമാർ എന്നയാളെയാണ് പോലീസ് പിടികൂടിയത്. കുടുംബത്തിൽ സാമ്പത്തിക ഐശ്വര്യമുണ്ടാക്കാൻ പൂജ നടത്താമെന്ന് വിശ്വസിപ്പിച്ചാണ് ഇയാൾ അതിക്രമം നടത്തിയത്.(Astrologer arrested for raping woman in Bengaluru, forcing her husband to surround a tree )
യുവതിയുമായി അടുപ്പം സ്ഥാപിച്ച ഇയാൾ പൂജയ്ക്കായി വീട്ടിലെത്തുകയായിരുന്നു. പൂജയുടെ ഭാഗമായി ഒരു മണിക്കൂർ നേരം പുറത്തുള്ള മരത്തെ വലംവെക്കണമെന്ന് പറഞ്ഞ് യുവതിയുടെ ഭർത്താവിനെയും മകനെയും ഇയാൾ വീടിന് പുറത്തേക്ക് അയച്ചു. ഈ സമയത്താണ് ഇയാൾ യുവതിയെ ലൈംഗികമായി ഉപദ്രവിക്കാൻ ശ്രമിച്ചത്.
യുവതി അതിക്രമത്തെ എതിർത്തപ്പോൾ, താൻ വലിയ മന്ത്രവാദിയാണെന്നും എതിർത്താൽ ദുർമന്ത്രവാദം ചെയ്ത് കുടുംബത്തെ ഒന്നടങ്കം നശിപ്പിക്കുമെന്നും പറഞ്ഞ് ഭീഷണിപ്പെടുത്തി. ഭയന്ന യുവതിയെ ഇയാൾ പീഡനത്തിന് ഇരയാക്കുകയായിരുന്നു. സംഭവത്തിന് പിന്നാലെ കടുത്ത മാനസിക വിഷമത്തിലായ യുവതി ആത്മഹത്യയ്ക്ക് ശ്രമിച്ചതായും റിപ്പോർട്ടുകളുണ്ട്. പിന്നീട് കുടുംബാംഗങ്ങളോട് വിവരം വെളിപ്പെടുത്തിയതോടെയാണ് പോലീസിൽ പരാതി നൽകിയത്.
