ന്യൂഡൽഹി: ദേശീയ യോഗ്യതാ പരീക്ഷയായ യുജിസി നെറ്റ് (UGC NET) 2026 സെഷന്റെ വിജ്ഞാപനം നാഷണൽ ടെസ്റ്റിംഗ് ഏജൻസി (NTA) പുറപ്പെടുവിച്ചു. പരീക്ഷയ്ക്കുള്ള ഓൺലൈൻ രജിസ്ട്രേഷൻ നടപടികൾ ഏപ്രിൽ 29 മുതൽ ആരംഭിച്ചു. രാജ്യത്തെ സർവകലാശാലകളിലും കോളേജുകളിലും അസിസ്റ്റന്റ് പ്രൊഫസർ തസ്തികയിലേക്കുള്ള യോഗ്യതയ്ക്കും ജൂനിയർ റിസർച്ച് ഫെലോഷിപ്പിനുമായാണ് (JRF) പരീക്ഷ നടത്തുന്നത്.
അസിസ്റ്റന്റ് പ്രൊഫസർ, ജെആർഎഫ് എന്നിവയ്ക്ക് പുറമെ പിഎച്ച്ഡി പ്രവേശനത്തിനുള്ള മാനദണ്ഡമായും നെറ്റ് സ്കോർ പരിഗണിക്കും. കമ്പ്യൂട്ടർ അധിഷ്ഠിത പരീക്ഷയായി (CBT) 83 വിഷയങ്ങളിലായാണ് ഇത്തവണയും പരീക്ഷ നടക്കുക. പരീക്ഷാ തീയതികൾ എൻടിഎ പിന്നീട് ഔദ്യോഗികമായി പ്രഖ്യാപിക്കും.
യോഗ്യരായ ഉദ്യോഗാർത്ഥികൾക്ക് യുജിസി നെറ്റിന്റെ ഔദ്യോഗിക വെബ്സൈറ്റായ ugcnet.nta.ac.in വഴി ഓൺലൈനായി അപേക്ഷിക്കാം. അപേക്ഷാ ഫീസ് ഓൺലൈനായി അടയ്ക്കാനുള്ള സൗകര്യമുണ്ടാകും. നിശ്ചിത സമയപരിധിക്കുള്ളിൽ അപേക്ഷാ ഫോമിൽ തിരുത്തലുകൾ വരുത്താനും അവസരമുണ്ടാകുമെന്ന് അധികൃതർ അറിയിച്ചു. സിലബസ് ഉൾപ്പെടെയുള്ള കൂടുതൽ വിവരങ്ങൾ വെബ്സൈറ്റിൽ ലഭ്യമാണ്.
Story Summary: The National Testing Agency (NTA) has released the official notification for UGC NET 2026. Online registration commenced on April 29th via the official website for candidates seeking JRF, Assistant Professorship, and PhD admissions across Indian universities.
